ونسه ودردشة

إستفتتِ قـلبــك

الــمدونه غادة كريم

?نمت من بدري وصحيت قبل شويه عملت قهوتي وعاوزه اتأمل شويه في 2015  بس ح اتأمل وانا بكتب ..
ماعارفه شكل السطور حيطلع عامل كيف ولا هل قابل للنشر ولا لا لكن ….. اذا وصلتكم السطور فمعناها انو قابل للنشر ☺☺☺

?انو تكتشفي فجأه ان سنه كامله راحت وعدت بخيرها وشرها، نجاحها وفشلها، حلوها ومرها ، حزنها وفرحها بتستحق نتأملها شويه..
?2015 كنتي سنه تحول تام في حياتي وشكلها ، كنتي سنه التحديات وسنه تحقيق المستحيلات…
حاجات كتيره اتغيرت 180 درجه في شخصيتي وفي تعاملاتي وفي ردود افعالي وفي نظام واسلوب حياتي وفي شكل علاقاتي في كاريري وفي احلامي وتطلعاتي …

?انك تكون ماشي في طريق طوييييل منظم وكلو اشارات منظمه بتوريك تمشي متين وتقيف متين وانتبه امامك مطب وهدئ من سرعتك هناك حفريات وعذرا للانتظار ولكن نعمل لراحتك ولا تسرع ف الموت اسرع و .. و… و…
طريق كان بالنسبه لي ممل و روتيني و مزعج للغايه ..الازعاج الهاااادى الي بيمرض من جوااااا جوا قلبك ..
ومع انو طريق ملياااااان انوار بس ماكنت قادره اشوف نهايتو واخرو ولا حتى على مد خطوه وحده قدامي ماقادره اشوف اي حاجه ولا حتى احسها ..
وحاسه الارض مهزوزه من تحتي مع اني متاكده من صلابه الطريق .. ماشيه مع الماشين بس  ومااااااا اكثرهم ..
كل ما كانت بتجي لوحه مكتوب في عليها هناك مخرج على بعد ……. متر ، شعور بالسعاده بحسو من جواااا قلبي  مع اني بكون عارفه اني ما ح استعمل المخرج دا ابدا ..بس كانت فكره انو في مخرج اصلا بتبعث السعاده في نفسي وبتخليني ابتسم بصدق..
و كل يوم بنام وبصحا وبكمل في نفس طريقي لكن مع التفاته فيها اسى على المخرج الي فات..
وبنام وبصحا وبكمل تاني طريقي بكل تفاصيلو الممله ..
كان كلو استراحات ومحطات وقفتا فيها كتييير واتزودت بحاجات تساعدني اني اكمل الطريق وكنت باخد كتييير لاني ماشايفه نهايتو وفي خوف متملكني ومخليني ماعندي ثقه في الطريق ..
بس في اخر مره من سنه فاتت لما نمت وصحيت ……
اول ما فتحت عيني لقيت يافطه مكتوب عليها (مخرج على بعد………)
قبل ما اتسوك وقبل ما اشرب الشاي وقبل ما اصحصح كويس وقبل ما مخي يبدا يشتغل وقبل ما حد من المارين يقولي صباح الخير….. حولت اتجاه حياتي تماما باتجاه المخرج وفجأه لقيت نفسي في اول مخرج في حياتي من سنييييين طويله ..
طريق غريب ما زي الطريق المتعودا عليه من سنين.. مافيه انوار كتيره وقد يكون مظلم بس حاسه اني شايفه كويس جدا لمسافه بعيييييده مني وحاسه بأرض صلبه تحت رجلي ..
ما شايفه فيه رفقه كتيره وفيييين وفين لحد ما يظهر كائن بشري لكن مع ذلك ما حسيت بخوف من الوحده..
مافي اي يافطات تنبيهيه لاي حاجه ممكن تواجهني في الطريق من حفر او مطبات او ازعاااج او  او او او… لكن والله احساسي شايف كويس وحاسه بأماااااان ..
مافي استراحات ومحطات كتيره ولحد اليوم ما لاقتني ولا وحده عشان اخد حاجات تزودني لنهايه الطريق.. لكن ايماني بالطريق دا ورغبتي الغريبه والقويه وحاجاتي البحبها الي مرافقاني في طريقي ومحفزاني على اني اكمل فيه مخلياني مكتفيه تماما عن اي محطات ..
وما حاسه اني تعبانه وعاوزه استريح..
عاوزه بس افضل ماشيه ماشيه ماشيه في اتجاه الحاجه الحلوه الي شايفاها بتقرب مني يوم بعد يوم ☺
ماعارفاكم فهمتوني ولا لاء لكن كل الي عاوزه اقولو لاي حد بيشوف مخرج من طريق حياتو ويبدا قلبو يدق سريع سريع سريع ما يتردد في انو يسلكو ابدا.. بالذات لو كان احساسو زي احساسي بطريق حياتو المرسوم والمنظم..
انا وحده من الناس كان مانعني الخوف من المجهول .. الخوف من فقد الموجود.. الخوف من فقد الرفقه والخوف من الوحده..
بس قرار واحد كان كفيل بتغيير الدفه 180درجه..
الخوف اتحول لآطمئنان والمجهول اتحول لواقع معاش والوحده اتحولت لعااااالم كامل …☺☺
?انو يكون عندنا ثقه لامحدوده بي قدراتنا حيخلينا ناخد القرار الصح ..
?انو يكون عندنا رغبه لتطوير نفسنا لاقصى حد بنقدر عليه حيخلينا ناخد القرار الصح..
?انو نكون مؤمنين ان ما اخطأك لم يكن ليصيبك وما اصابك لم يكن ليخطأك حيخلينا ناخد القرار الصح..
?انو نكسر اي قيود صنعناها بنفسنا ونفك اي رباط حوالين عيونا حيخلينا ناخد القرار الصح..
وخلو بالكم….
القرار الصح هو قرارك انت و بس ..
وقيسو على كده اي طريق في حياتكم..
شغل . زواج . سفر ..غربه.. استقرار .. حب .. امل .. دراسه ..

ربنا يجعلها سنه سعيده على الجميع وتكون سنه تحقيق الاحلام والامنيات لكل من مرا على سطوري ….
وكل سنه وانتم طيبين….

عن الكاتب

غادة كريم

ما قيل للورده حتى جعلها تتفتح.. يشبه ما قيل لي حين صرت انثى مغرمه بالجمال..في مدونتي اهتم بجمال الروح وحياه القلب واشارككم شيئا من رسائل الحياه..