العناية بالبشرة

التقشير بأحماض الفواكه

الــمدونه غادة كريم

عملت جرد للصفحه عشان اشوف الاسئله الي ماجاوبت عليها ..
لقيت ان ٨٠٪ من اسئلتكم بتتعلق بالبشره ومشاكلها.. سواء تصبغات او بقع داكنه او حب شباب او اثار او بشره دهنيه وزياده افرازاتها او شحوب وفقدان النضاره والرونق …
في بنات كتير بيستعملو خلطات وكريمات ماليها اول من اخر وبعضها بيجيب نتيجه وبعضها لا وبعضها بيزيد الطين بله..
بعض الاسئله جاوبت عليها بأنو المشكله دي بتحتاج تقشير بأحماض الفواكه.. ولقيت ان الاغلبيه ماعندهم فكره عن الموضوع دا او انو هي شنو احماض الفواكه دي او هو شنو التقشير او بيتعمل وين وكيف!!

طيب هي شنو احماض الفواكه دي  ياغاده ؟؟….

احماض الفواكه هي مواد طبيعية اسمها (a-hydroxy-acid  ahas)
من زمان جدا والنساء بيستعملو احماض الفواكه لكن بشكلها الطبيعي  من زمن كليوباترا الي كانت مشهوره بأنها بتستحما بالحليب الرايب المعروف بأنو فيه حمض اللاكتيك اسيد والكان بيدي بشرتها رونق وجمال..
والعسل والزبادي والليمون ومعظم الحاجات الطبيعيه العاده بيستعملوها البنات في البيوت في عمل ماسكات للبشره دي كلها عباره عن شكل طبيعي من اشكال احماض الفواكه ..
ملاحظه(مش احيانا بتعملو ماسك عسل وتحسيه هيج وشك ومانفع معاك)؟؟
دا لانو فيه احماض وخليتيه فتره اكتر من ٧ دقايق واكل من وشك واتسبب في حرق سطحي…
في السنوات الاخيره بقو يصنعو الاحماض دي على شكل مستحضرات وكريمات ومحاليل بتراكيز مختلفه عشان يعالجو بيها البشره.. منها حمض قصب السكر وحمض الزبادي وحمض التفاح والعنب الاحمر و الجريب فروت والليمون..
❄طيب يعني ايه تقشير ياغاده؟؟
التقشير هو عمليه ازاله للطبقه السطحيه للجلد او الطبقه الوسطى او العميقه..
التقشير بأحماض الفواكه بيكون دايما مستهدف الطبقه السطحيه ..
تقشيرها بيكون بتراكيز مختلفه من الاحماض ودا بيعتمد على نوع البشره وعلى المشكله العاوزين نعلاجها ..
يعني تركيز الحمض لبشره دهنيه مابيكون زي البشره المركبه وعلاج التصبغات ما بيكون زي علاج التجاعيد وهكذا…
❄طيب كيف بنعمل التقشير دا ياغاده..
التقشير لازم يكون في عياده جلديه متخصصه.. يعني ما تمشي وحده تشتريه من الصيدليه وتقول ح اعملو براي ف البيت.. لانو ممكن تحرقي بشرتك لانك ما حتكوني عارفه النسبه المطلوبه او المده الزمنيه المفروض تحطي فيها الحمض على بشرتك..
دي وظيفه الدكتور الحيقشر ليك بشرتك..
قبل اي عمليه تقشير لازم البشره تتهيأ كويس بكريمات معينه فيها نسب متفاوته من نفس الاحماض دي بعد دا بتتنظف بمحلول خاص وبعدها الطبيب المعالج بيحط الحمض المناسب على البشره وبيخليه لفتره بتتراوح مابين دقيقه ل ٣ دقايق..
شايفين المده بسيطه كيف!
و دا كلو بيعتمد على نوع البشره زي ماقلت وعلى مشكلتها العاوزين نعالجها..
بعد عمليه التقشير بيدوك كريم معالج فيه تركيز بسيط من نفس الحامض عشان تحافظي بيه على النتيجه الوصلتي ليها بالتقشير..
طبعا التقشير ممكن يكون كذا جلسه بتتعمل على اسابيع اقلها اسبوعين واقصاها ١٢ اسبوع..
خلال الفتره دي كل اسبوع بتحسي بتحسن ودرجه من التقدم بتكون بالشكل دا ..يعني من اسبوع ل ٢ بتحسي بنعومه في البشره .. من ٢ ل ٤ بتحسي بنضاره ورونق وحيويه في البشره من ٤ ل ٦ بتحسي بشد في الوجه .. من ٦ ل ٨ بتحسي بأن المسامات اختفت وبقت ضيقه وبعد دا بتبدا تختفي الاثار والتصبغات ..
يعني ما تستعجلو النتيجه ابدا ..
الحاجه المهمه والمفروض تركزو عليها هي الاحتياطات المفروض تاخديها اثناء فتره العلاج.. وهي الترطيب العميق للبشره لان الاحماض دي معروف انها بتنشف البشره وبتشيل اي دهون فيها فلازم ترطبيها مرتين في اليوم وتخلي الكريم المعالج مره بليل قبل النوم ..
الحاجه التانيه هي واقي الشمس الي بيبقى زيو زي موبايلك ما تطلعي من غيرو ابدا ابدا ولا ح تضري بشرتك جدا لو اتعرضت للشمس الفتره دي ..
وهو عموما التعرض المباشر للشمس سواء كنتي عامله تقشير ولا لا دا اكبر خطاء واكبر مدمر للبشره..
في وحده حتجي تقولي والله استعملتو وما لقيت منو فايده.. او تجي وحده تقولي عملتو ونفع معاي لكن بعد فتره رجع كل شي زي ما كان..
ح اقولك معناها لا رطبتي بشرتك كويس اثناء العلاج ولا اهتميتي بواقي الشمس ولا واصلتي في الكريم المعالج بعد دا عشان تحافظي على النتيجه ..
ما بالساهل ابدا انك يبقى عندك بشره زي المرايه بدون ما تتعبي عليها وتجتهدي وتحافظي..
ما تهملي في التفاصيل كلها من كبيرها ل صغيرها..
☝ما تستهري بالشمس..
☝ما تستعملي مكياج رخيص ..
☝ما تنومي بالمكياج على وشك..
☝ما تهملي حب الشباب..
☝ما تشيلي وشك بالشمع كتير..
☝ما تستعملي كورتيزون..
☝وما تنسي الترطيب حتى لو بشرتك دهنيه..
☝ما تنسي تشربي ٨ كبايات مويه في اليوم ..
كل دي تفاصيل ممكن تغيب عن وحده وتتسبب في اذى لبشرتها..
ح اختصر ليكم فوائد التقشير في نقاط ..
تقشير الخلايا الميتة و تحفيز ظهور خلايا جديده..
بتنعم الجلد و بتحسن ملمسه كتير..
بتوحد اللون وتفتح اللون و بتدي  نضارة وبريق..
بتعالج البثور الخفيفة وبتقلل من الافرازات الدهنية..
بتنقي البشره من الرؤوس السوداء..
بتضيق المسام ..
بتحفز انتاج الكولاجين و بالتالي بتساعد الجلد انو يقاوم الشيخوخة..
بتمسح التجاعيد الخفيفة..
بتعالج التصبغات و البقع و اثار البثور و الندبات..
بتعيد للبشرة توازنها لان بعد التقشير الحمضي بتبدا البشرة تتنفس بشكل احسن كتير و تبدا تطلع السموم بسهولة اكبر..

وقبل ما اختم كلامي عاوزه اذكر ب حاجه مهمه وهي انو في اثناء فتره العلاج واستعمال الحمض ممكن تبدا تظهر حبوب او بقع او تظهر قشور وممكن بعضكم يعتبرها اسوء من ماكانت عليه.. دا كلو بسبب ان الاحماض بتبدا تسحب كل الحاجات المدفونه في كل طبقات الطبقه السطحيه الي هي مكونه من ٥ طبقات .. فما تخافو و استمرو في التقشير لحد ما تختفي كلها تماما وتصلو للبشره الكلكم بتحلمو بيها…

افضل عيادات للتقشير السطحي بأحماض الفواكه .. عيادات اوباجي ومستشفى ادمه في الرياض..
بالنسبه للاسعار بتتفاوت من ٣٠٠ ريال ل ٥٠٠ ريال  للجلسه ..
طبعا بتكون شامله الكريمات المرطبه والمعالجه ..

ما تخلطو بينو وبين التقشير الكيميائي داك موضوع تاني وعميق وبيستعملو فيه مواد تانيه خالص..
اطلبو تقشير سطحي بأحماض الفواكه بس..

انشالله اكون افدتكم

تحياتي

ودمتم في نووور..

عن الكاتب

غادة كريم

ما قيل للورده حتى جعلها تتفتح.. يشبه ما قيل لي حين صرت انثى مغرمه بالجمال..في مدونتي اهتم بجمال الروح وحياه القلب واشارككم شيئا من رسائل الحياه..