العناية بالبشرة

التفتيح الآمــن للبشـرة

الــمدونه غادة كريم

الكلمه او الجمله الشهيره الي كلللللنا بنسمعها وبنرددها لما نشوف وحده كانت سمرا وفجأه بقت بيضا سواء ممثله او فنانه او بنت جيرانكم او صحبتك الغتيته الما بتوريك قاعد تعمل شنو … مبااااالغه قاعده تعمل شنو دي ياربي
وتقعدي تسرحي وتتخيلي وتتمني انو يبقا لونك زيها
والغريبه انو مافي ممثله او فنانه ( من ذوات البشره السمراء) بيفضلو على حالهم ب مجرد ما يشتهرو .. بجد قرار انك تحولي لونك من لون ل لون تاني خالص بعيد كل البعد عن شكلك وملامحك وبيئتك دا قرار شخصي جدا جدا واي واحد او حده بتاخدو بيكون متحمل تمام المسؤوليه عن كل جوانب التغيير في شكلو والتبعات المترتبه على التغيير دا..

في فرق كبير جدا بين انك تفتحي لونك وبين انك تبيضي لونك ..و اظن الفرق واضح بين العبارتين.. التفتيح دا هو الي نحن عامه الشعب ( او الاغلبيه) بيلجأو ليه كا نوع من ارضاء النفس والاحساس بالنضافه .. و بيعتبر امن جدا لو استخدمنا المستحضرات الآمنه ومشينا حسب توجيهات الناس المتخصصه في المجال دا..والكل بيلجأء ليه سواء لونك فاتح او لونك غامق .. لان دايما اي وحده عاوزه تفتح درجه او اتنين من لونها عشان تحس بالنضافه.. مع ان مافي اي علاقه بين النضافه واللون لكن مع عوامل البيئه الي كلنا بنتعرض ليها من شمس وغبار وحراره بيكون فعلا في فرق في لون وشنا ولون جسمنا او ايدينا والوحده تحس انها ما نظيفه وتلجأ للتفتيح بغرض توحيد اللون..
ودايما نتيجتو بتكون انو لونك بيفتح في حدود درجتين من لونك الاصلي لكن ما بيقتل الخلايا المنتجه لصبغه الميلانين زي ما بتعمل كريمات التبييض او مستحضرات التبييض عموما سواء كريمات او حبوب ..( الي بيلجأو ليها المشاهير ويجيبو لينا نحن المساكين ديل نفسيات .. ويبقو هم في قبل وبعد ..

هنا انا ح اتكلم بشكل متخصص شويه و اساعدكم انكم تختارو الكريم المناسب عشان لما تدخلو اي صيدليه وتطلبو كريم تفتيح للبشره تكونو بتطلبو ب فهم و ب ثقه و اطمئنان انو الحاجه الي طلبتوها ما ح تأذيكم ابدا انشالله وما تكونو شايلين هم الاستعمال لفترات طويله وعلى المدى البعيد..
اول حاجه لازم تتعلميها انك اول ما تمسكي علبه الكريم انك تقري التركيبه بتاعتو عشان تتأكدي من وجود الماده الفعاله الامنه الي ح تفتح لون بشرتك..
دي لسته صغنونه بالمواد الفعاله الي لازم تحرصو انها تكون مكتوبه في تركيبه الكريم الاخترتوه .. وطبعا ممكن بعض الكريمات يكون فيها اكتر من ماده فعاله من نفس المواد الي ح اذكرها وبعض الكريمات بيكون فيها ماده وحده بس وكلو طبعا مع اختلاف التراكيز بيكون بيختلف في النتيجه..
واغلب الكريمات الي من النوع دا بتكون معززه ب ڤيتامينات زي E و C ..غير الماده الفعاله الي بندور عليها..
اي صيدليه تدخلوها وتطلبو من الصيدلي كريم بأسم الماده الاتني عاوزاها ح يديك ليه بغض النظر عن الشركه.. وحطو في عين الاعتبار ان اغلب الكريمات الامنه سعرها اغلى بكتير من الكريمات الضاره الي فيها نسب عاليه من الهايدروكوينون والزئبق القاتل والكورتيزون..

قائمه ببعض الكريمات الي فيها زئبق واسعه الاستعمال في السودان ..
ديانا.. منيرڤا..كيلي..سلڤانا.. سيفك..وغيرها كتير..
وامثله لكريمات مافيها زئبق واسعه الاستعمال..
فيداوت و  سكين سكسيس..

ح اوصف اسم كريم واحد لكل ماده امنه الاستعمال للناس الموجوده بره وتقدر تتحصل عليه ب سهوله.. لكن ناس الخليج اغلب الكريمات موجوده في الامارات وممكن تتلقي في الصيدليات الكبيره او عيادات الجلديه الكبيره في السعوديه  وكل الشركات عندها خدمه التوصيل.. وما بالضروره ابدا تجيبو نفس الكريم انا بس بءكرو من باب الامثله وممكن تلقو مجموعه كبيره جدا من كريمات فيها نفس الماده الفعاله وتكون ما معروفه شديد.. بتاخدوها بكل ثقه لانكم عارفين مكونه من شنو..
فا الي تقدر تجيب الكريم البذكرو كان بها والي ما بتقدر تركز بس على الماده الفعاله في اي كريم تاني..

الماده الاولى والي بتصنف من اكتر المواد فعاليه واكثرها امان على البشره هي ماده الالفا اربيوتين  Alpha Arbutin ..
مستخلص نباتي امن جدا من فاكهه اسمها عنب الدب..
بتفتح لو البشره ب فهم .. وبتخلي شكلك طبيعي ومافي اي احساس فسخ في الموضوع.. يعني من الاخر شكلك بيكون منطقي ولونك حلو ونضيف..
الماده دي بتلقوها بتتياع اونلاين وبعد ما تشتريها من امازون او من اي تاجره ممكن تطلبي من الصيدلي انو بس يضيف الماده بالتركيز المناسب على اي كريم امن من عندك.. زي مثلا كريم فيتامين اي من بودي شوب.. تاخديه معاك وتخليه يضيف البودره بالتركيز المناسب الي بيتناسب مع حجم العبوه بتاعتك.. وتستعمليه عادي بكل امان.. حتى ممكن تضيفي البودره دي على اللوشن بتاعك من اي نوع سواء نيفيا ، دوڤ، ڤازلين …. الخ
alpha arbutin powder
FB_IMG_1463872601656
بتذوبي المقدار العاوزاه حسب كميه الكريم العاوزه تضيفيه ليه او اللوشن او حتى واقي الشمس في مويه دافيه وتخليه يبرد وبعد دا تضيفيه على كريمك.. لمعرفه

طريقه التحضير .. اضغطي هنا

و لو عملها ليك الصيدلي خير وبركه لانو عارف التراكيز ولو اشتريتي البودره براك ح تلقي كل التعليمات مكتوبه بالنسبه لمقدار البودره والمويه ..
لازم تستمرو على خلطتكم وتعملو الكريم مرتين في اليوم سواء للجسم او الوش ( دا في حاله استخدمتو البودره للتحضير.. او حتى لو جبتو كريم جاهز ..
زي كريم meladerm المعروف بأنو غني بالالفا اربيوتين وفعال لدرجه سحريه في التفتيح الامن للجسم والوجه..
مع العلم ان الكريم او البودره ممكن تستعملوه على اي منطقه من جسمكم حتى الاماكن الحساسه ..

FB_IMG_1463872605840 (1)
ولو وحده سألتني ليه ما وصفتيه من الاول في بوست تفتيح الاماكن المنكوبه ح اقول لانو غالي..
سعر الكريم 400 ريال ..
سعر البودره 150 ريال ..بيختلف حسب الجرام

غير انو تفتيشو صعب بالنسبه للناس الما عندها ثقافه الشراء اونلاين.. في حين انو متاح بسهوله في موقع امازون..

ناس امريكا وكندا طبعا تأكدو تماما انو بيصرف من غير وصفه طبيه لانو امن جدا ومكوناتو كلها الفا اربيوتين وكوجيك اسيد..
وهو ايضا واحد من مستحضرات التفتيح الامن للبشره..

تحياتي..
ودمتم في نووور

عن الكاتب

غادة كريم

ما قيل للورده حتى جعلها تتفتح.. يشبه ما قيل لي حين صرت انثى مغرمه بالجمال..في مدونتي اهتم بجمال الروح وحياه القلب واشارككم شيئا من رسائل الحياه..

أضف تعليق