العناية بالبشرة

التقشير الدوري سر الشباب

الــمدونه غادة كريم

⭐موضوع المويه والغذاء والخضار والفواكه واللحوم والاسماك والمكملات الغذائيه دا طبعا موضوع مفروغ منو تماما والعاقل طبيب نفسه..
ممكن تعملو فولو ل صفحه التفاح الاخضر لو عاوزين نصايح غذائيه لان دا ما تخصصي ..

انا ح ادخل في الموضوع المهم وهو تجهيز البشره وتصليحها وترميمها بمستحضرات موجوده ومتوفره في اي صيدليه في العالم وبأسعار زهيده..
واخترت التوقيت دا بالذات لانو انسب فتره لتجديد البشره وتقشيرها وترميمها بيكون في الشتاء.. بالذات للناس الي بشرتهم سمرا..
لازم تستعملوه بشكل دوري وما توقفو ابدا.. شكل دوري يعني مره او بالكتير مرتين في الاسبوع ..
وطبعا زي ما قلنا في البوست الفات لازم تعرفي نوع بشرتك شنو ف الاول عشان تقدري تختاري النوع المناسب ليها..
مستحضر الدفرين Differin

FB_IMG_1463873270522
الدفرين جل للبشره الدهنيه و الدفرين كريم للبشره الجافه ..
بنات كتير بيستعملو كريمات من اغلى الماركات ممكن يصل سعر العلبه ل مئات الريالات وتجي تقول والله خساره قروش ساي ما عمل لي اي شي وتحط اللوم على المستحضر.. لازم تهيئو بشرتكم الاول لاستقبال الكريمات عن طريق التقشير..

من زمن الزمن والناس بتستعمل الرتن اي عشان يقشرو بشرتهم ويهيئوها لاستعمال الكريمات الغاليه..
لكن طبعا وقف تصنيع الرتن اي حاليا وبقا في بدايل كتيره ليه ..
هسسسسي وحده ح تجي ناطه تقولي انا استعملت الدفرين او الرتن اي وحرقني وما قدرت اواصل و حمر لي وشي وما ادراك..
ح اقولك اكاد ابصم بالعشره انك ما اتبعتي الطريقه الصحيحه لاستعمالو.. وصحبتك نصحتك بيه و مشيتي على نصيحتها او صرفو ليك دكتور ما متخصص في مجال الجلديه وخبرتو على قدو..
☝اولا الدفرين لا يمكن تستعمليه يوميا لايمكن.. لانك ببساطه بتحطي مكياج وبتطلعي من البيت وبتحومي في الجامعه وبتعملي السبعه وزمتا .. ما ممكن تقشري وشك المسكين دا زي البطاطسه كل يوم.. مرررره وحده في الاسبوع وبالكتير مرتين..
✌ثانيا ممكن تكوني ما استعملتي كريمات الترطيب بعد غسلو ..
ثالثا ممكن تكوني بتحطيه وتحومي بيه في الضوء عادي ولا فارق معاك ولا عارفه انك بتأذي نفسك كدا..
✌✌رابعا يمكن تكوني ما سمعتي ب اختراع اسمو واقي الشمس لاااازمن ولا بد تحطيه حتى لو قاعده في صاله بيتكم المشمسه..

فا مااااتلومي المستحضر وما تقولي ما نفع معاك  بل انتي الي ما نفعتي معاه واسأتي استخدامو..
مع العلم انو بيناسب كل انواع البشره..
اوكي..

طيب المره الواحده الي بنستعملو فيها دي زاتا عندها اسرار في التعامل معاه..
☝اول حاجه يفضل انك تبدي التقشير الناعم جدا بالدفرين في الشتاء ودا بيضمن ليك نتايج رهيبه جدا انشالله..
✌الحاجه التانيه الكميه البتستعمليها على وشك كلو وطريقه توزيعها..
بتاخدي مقدار بسيط جدا زي حبه الفاصوليا او البازلا الصغنونه ودي بتكفي وشك و رقبتك الاثنين..
بتمسحي من على عضمه العين ودا بيعتبر نهايه الجفن السفلي وتبعدي تماما عن محيط الجفن العلوي كلو والشفايف.. وتمسحي باقي وشك ورقبتك..
بعد ما تمسحيه تطفي النور علطول وترقدي تنومي..
ح تجي وحده هسسسسي تقول لي انا ولدي صغير ولازم كل شويه اقوم اشوفو واعمل ليه بزازه.. اعملو ولا لا.. ح اقول ليك اعمليه لكن ح تقللي من الفعاليه بنسبه ٢٠٪ تقريبا يعني ح تصلي برضو لنفس النتيجه انشالله..
و يفضل تختاري اليوم الحتكوني مؤجزه تاني يوم الصباح عشان ما تتعرضي للشمس لكن لو شغاله برضو مامشكله لكن ما تنسي الواقي..
بعد ما تصحي الصباح غسلي وشك ب الغسول بتاعك المناسب لنوع بشرتك ⚠(ما ح اتطرق لموضوع الغسولات هنا لان كل وحده عندها غسول ب تثق فيه وبتستعملو وانشالله كلها تكون بتأدي الغرض لكن احرصو بس على انها تكون مناسبه لنوع البشره بغض النظر عن الماركه) …
برضو الكريمات المرطبه انواع واشكال.. لكن المهم انها تكون بتناسب نوع البشره سواء جافه او دهنيه اي كريم من اي ماركه ح يأدي الغرض طالما بيرطب البشره كويس ودي حاجه بتقدري تحدديها انتي ..
بعد ما تغسلي وشك تماما بالغسول بتاعك وتخليه ينشف لوحدو تقريبا ٥ دقايق تعملي الواقي الشمسي اول حاجه لو طالعه من البيت وبعدو ب ٢٠ دقيقه تبدي تعملي الكريم المرطب والمكياج عادي وتتوكلي ..
من اليوم التاني بتقدري تعيشي حياتك عادي  و واصلي بس في كريم الترطيب والواقي يوميا .. وتعملي مكياجك عادي وكلو تمام..
لحد الاسبوع الجاي نفس اليوم تبدي تقشري تاني او لو بشرتك منتهيه تماما ممكن بعد ٣ ايام تعمليه تاني .. مع الواقي والترطيب طبعا ..
في ناس بشرتهم حساسه جدا وما بيعرفو الحاجه دي الا لما يستعملو مستحضرات زي دي مثلا..
طيب الحل شنو..
لو حطيتي الجل او الكريم وبعد شويه بديتي تحسي ب حكه شديده وحرقان شديد خليه يكمل ساعه وغسليه طوالي واعملي الكريم المرطب ونومي على كدا.. او لو انتي من الاساس عارفه ان بشرتك حساسه حطيه ساعه وغسليه.. الاسبوع البعدو ساعتين والبعدو لحد ما تصلي مرحله انك بقيتي بتنومي بيه عادي ..
اوكي
اوكي

لو بشرتك دهنيه جدا جدا ومساماتها واسعه جدا جدا بدون تفكير تعمليه مرتين في الاسبوع ..

وطبعا ما تنسو انو خلاص ح يبقى صديقك الصدوق وح تواصلي فيه باقي عمرك.. بتوقفيه فقط لو عندك مناسبه كبيره وعاوزه يلا تعملي فيشيل ومكياج تقيل ودنيا .. بتوقفيه اسبوعين قبل المناسبه..

طيب فايدتو شنو الدفرين جل دا او وظيفتو شنو على البشره ؟؟
الدفرين مصنف من الكريمات الرهيبه والمضاده للاثار والتصبغات والروؤس السودا والبيضا وحب الشباب والاهم من دا كلو انو محفز قوي جدا جدا لانتاج الكولاجين وبتالي فهو مقاوم للتجاعيد والخطوط الرفيعه على البشره ..
عارفين مشروب الكولاجين ؟؟
او كريمات الكولاجين ؟؟
دي طبعا اكبر خدعه سنمائيه لان مافي حاجه اسمها احفز كولاجين ب كولاجين..
الدفرين تحفيزو لانتاج الكولاجين احسن مليون مره منها..
ودي طبعا قصه بتحتاج شرح طويل ومااااالكم بالطويله..
بس اوعدكم اكلمكم في باقي الاجزاء عن محفزات الكولاجين واهمها الديرمارولر الي ح افرد بوست كامل ليه لانو يستحق ان نرفع له القبعه..
يلا هسي جات وحده سألتني انا عندي حبوب ملتهبه في وشي ياغاده استعمل الدفرين عادي..
ح اقول لا يا ستي .. انتي تستعملي قرينو الي هو اسمو الايبيديو وهو نفسو نفس الدفرين لكن داخل في تركيبو ماده اسمها بينزيل بيروكسيد ودي ببساطه مضاد حيوي ..
بتستعمليه بنفس طريقه استعمال الدفرين مرتين في الاسبوع او مره.. لكن بتنقطي منو على الحبوب فقط يوميآ..
جات وحده حامل قالت لي استعمل الدفرين عادي ح اقولك لاء ممنوع..ولو بترضعي كمان ممنوع..
اثناء فتره الحمل بالنسبه للتقشير يفضل المنتجات الطبيعيه ولو رجعتو ل بوست عنايتي فتره الحمل ح تلقوه..
اوكي

يعني مطلوب منكم تمشو بكره الصيدليه تجيبو الاتي :

لو بشرتك دهنيه او مركبه !!
دفرين جل differin gel
كريم ترطيب للبشره الدهنيه..
(اي كريم مناسب للبشره الدهنيه )
كبسولات فيتامين اي الزيتيه..
واقي شمس.. (ممكن فوتوديرم او sunsens..
ولما تجي ل خطوه الترطيب تاني يوم لما تصحي وباقي الايام العاديه.. بعد ما تاخدي في يدك المقدار العاوزه تمسحيه تكسري عليه كبسوله من فيتامين اي وتلخبطيها مع الكريم المرطب وامسحي وشك ورقبتك ..
وبعدها ب ١٠ دقايق زي ما قلنا الواقي..

لو بشرتك جافه!!
دفرين كريم differin cream
و كريم الترطيب المناسب للبشره الجافه وبرضو نفس الشي تكسري فيه كبسوله فايتامين اي ..

لو بشرتك حساسه وملتهبه!
ايبيدو كريم Epiduo crea
ونفس الفكره بالنسبه للكريم المرطب والكبسولات والواقي..
لازم طبعا تجيبو الدفرين الي تركيزو 0.1%
سواء كان كريم او جل ..

(ملاحظه) ما تكسرو الكبسوله الا وقت الاستخدام فقط وعلى الكميه العاوزه تستعمليها بس عشان ما تتاكسد وفايدتها تروح ..
اوكي
اوكي
طبها بعد ما تبدا تطلع البشره الجديده ودا بيختلف من شخص للتاني في المده الزمنيه ح نبظا نستعمل كريمات المحافظه على البشره الحلوه الي طلعت لينا ونبدا نفرش في العفش الجديد قطعه قطعه..

انتظروني في التدوينه الجايه عن بدايه ترميم المناطق المنكوبه في الجسم عشان تبدو عنايه البشره والجسم مع بعض خطوه بخطوه ..
ملاحظه..
(الموضوع الاساسي والصوره مأخوذه من جوجل من موقع ارتوس شيك بتصرف )

تصبحو على خير
ودمتم في نووور

عن الكاتب

غادة كريم

ما قيل للورده حتى جعلها تتفتح.. يشبه ما قيل لي حين صرت انثى مغرمه بالجمال..في مدونتي اهتم بجمال الروح وحياه القلب واشارككم شيئا من رسائل الحياه..