العناية بالشعر

العنايه بالشعر منخفض المساميه

العنايه بالشعر منخفض المساميه
الــمدونه غادة كريم

👋صباح الخييير..
اليوم ح نرجع نكمل في موضوع مساميه الشعر.. و ح نتكلم تحديدا عن الشعر المنخفض المساميه وكيف تقدري تهتمي بيه وترطبيه ..
طيب.. !!
🌸الشعر منخفض المساميه قلنا انو بيعتبر شعر صحي وقوي ومرن جدا وما بيحتاج تعب شديد عشان تحافظي عليه بشكل جميل وتحافظي على ترطيبو ..
اغلب البنات الي شعرهم منخفض المساميه مشكلتهم الاساسيه معاه انو ما بيترطب بسهوله.. ودايما تلقيها بتشتكي انو قدر ما تمسح فيه زيوت او كريمات بتحسها قااااعده والشعر ما شربها وما اتغلغلت ضمن الشعره .. وحتى تلقيهم بيشتكو انهم بياخدو فتره طويله تحت الدش عشان يحسو ان شعرهم اتبلا والمويه وصلتو وبيعاانو من القصه دي جدا ..
بس صدقوني !
انتو عندكم اجمل انواع الشعر بس محتاجين تعرفو كيف تتعاملو معاه عشان يحبكم وتحبوه وانشالله بعد ما تقرو التدوينه دي ح تعرفو الطريقه الصحيحه وترتاحو..
مبدئيا كدا في حاجه مهمه لازم تعرفوها ..
لما شعرك ( المنخفض المساميه ) يكون ناشف و وغريب كدا ومتقصف او مكسر ، ما بالضروره ابدا انو يكون فاقد زيوت او كونديشنر.. غالبا بيكون فاقد ترطيييب مويه .. لان المويه ماقادره تدخل جواه ابدا بسبب مساميتو المنخفضه والي قد تكون معدومه عند ناس كتير..
📌(في ناس حتسأل انو يا كتكوت انتي قلتي ان المويه مضره وهي سبب مشاكل الشعر.. كيف هسي بتقولي انو الشعر محتاج مويه ؟ )
طيب ركزو معاي..
القاعده الي حاجات كتيره معتمده عليها انو الشيء الي بيزيد عن حدو.. بينقلب ضدو.. والمويه لما بتضر الشعر فهي بتكون دخلت للشعر واتغلغلت بشكل زايد عن الحد ادى لانتفاخ طبقه الكيوتكل في الشعره واتفتحت كل ابواب الشعره وبقت زي الشط الي فجأه اتعرض لموجه مد فظيعه وغرقتو تماما ومسحت كل معالمو..والحاجه دي عاده بتحصل في الشعر الي مساميتو عاليه لما نغسلو بدون اخد التدابير والاحتياطات الازمه لمواجهه موجه المد دي..
اعتقد كدا الصوره وضحت..
يعني الشعر منخفض المساميه بيحتاج انو يدخلو نسبه مويه كافيه لترطيبو ولحياتو وما تنسو قوله تعالى ( وجعلنا من الماء كل شيء حي ) ..
طيب .. هنا عاوزين نتعلم سوا كيف نقدر نسمح للمويه انها تدخل الحصن المنيع دا ..
حتى الشعر المنخفض المساميه بيختلف التعامل معاه في حال انو كان شعر غزير او خفيف .. والحاجات دي بنوصل ليها سواء بزيوت معينه او ماسكات معينه وحتى انواع كونديشنرز معينه..
📝ملاحظه !
دايما فتشي الكونديشنر الي بيكون داخل في تركيبو ماده اسمها سيتيل الكحول cetyl alcohol  بيكون تم تكثيفو بالماده دي.. وهي ممتازه مع الشعر المنخفض المساميه وبتسهل ترطيبو بالذات لما تتضاف ليها زيوت خفيفه زي الارجان والجوجوبا والمكاديميا وبذور العنب وبعد دا تستعمليه على شعرك..
وما تستعجلو وتقرو الكلام من الطرف وتقولو لا دا كحول ومضر للشعر..
لا دا نوع من الكحول الدهني .. بيختلف تماما من الكحولات الي بتدخل في مستحضرات التجميل.. يعني بيعتبر حاجه كويسه وماتخافو منو.. ( ح اتكلم عنو بأسهاب في قسم العنايه بالبشره وانو آمن الاستخدام في الكريمات ) ..
📌حاجه تانيه تحطوها في بالكم ان عاده الشعر منخفض المساميه بتكون مساميتو شبه عاليه في الاطراف .. واغلب الناس كدا.. سواء مساميه شعرهم عاليه ولا منخفضه دايما مساميه الجذور بتختلف من مساميه اطراف الشعر.. لان الشعر في نهاياتو هو الي دايما بيكون متضرر وتعبان ومتقصف و دا بسبب ارتفاع مساميتو ..
عشان كدا دايما تركيزنا نحاول نوجهو لاطراف الشعر اثناء اتباع اي برنامج عنايه.. لان الاطراف هي الي محتاجه يشتغلو عليها ..
عكس ما كل الناس متخيله ودايما بتركز على علاج الجذور وفرك الفروه باي مستحضر يشتروه ظنا منهم ان علاج الجذور بيصل للاطراف او علاج الفروه بيعالج اطراف الشعر..
لا لازم نفرق ..
علاج فروه الراس حاجه.. وعلاج جذور الشعر حاجه ، وعلاج اطراف الشعر حاجه تانيه خالص.. وهو اهم جزء في الثلاثه..
🌸طيب.. نجي لطريقه العنايه.. والحاجات الي بتنفع مع الشعر منخفض المساميه ..
في معلومه منتشره على الانترنت بتنصح باستخدام الباكنج صودا لغسيل الشعر وانو دي حاجه كويسه ..
خلينا نقيف شويه عند الحته دي لان ناس كتير فقدو شعرهم بسبب المعلومه دي..
في بدايه كلامنا عن برنامج العنايه بالشعر كنت كلمتكم عن ان فروه الراس زيها زي البشره عندها نسبه حموضه .. والنسبه دي لازم تفضل ضمن المعدل الطبيعي عشان ما تحصل المشاكل..
الشعر والبشره عموما عدوهم اللدود هو الوسط القلوي.. يعني لما تكون نسبه الحموضه فوق ال ٧ ..  ولو مسكنا الباكينج صودا ح نلقى انو قلوي جدا جدا جدا ونسبه الحموضه فوق ال ٩ ودي حاجه كارثيه بالنسبه للشعر والفروه وكفيله بانها تنتهي نهايه بطل من شعرك وتدخلك في متاهات ما تطلعي منها الا بعد فترات علاج وتأهيل طويله لاستعاده البنيه التحتيه للشعره..
ولكن هل دا معناه ان الباكنج صودا ما نستعملها نهائي في حاله الشعر منخفض المساميه !!  خاصه وانها عندها قدره عجيبه على فتح بوابات طبقه الكيوتكل المسؤوله عن توصيل المويه لداخل الشعره وبالتالي الحصول على الترطيب الي بنسعى ليه في الشعر المنخفض المساميه؟
الاجابه انو ممكن تستعملوها لكن بحذر وباتباع التعليمات دي :
☝اولا تاخدي قسم من شعرك ويا حبذا يكون من الجهه الي ورا وتعملي اختبار وتشوفي هل ح ينفع معاك الباكنج صودا ولا لا..
تجيبي ملعقتين زبادي كبااار وتلخبطي معاهم ربع ملعقه شاي باكنج صودا وبعد دا تعمليها على الحته الي اخدتيها من شعرك وتفركيها على كامل الشعره من الجذور للاطراف.. وبعد دا تغسليها بالمويه وتشوفي اثناء الغسيل استجابه شعرك للمويه كيف.. وهل حسيتي ان الشعر اتبلا سريع وبقا رطب جدا وعكس الوضع الي انتي متعودا عليه ولا كيف ,, وبعد دا برضو شوفي استجابه الشعر الي عملتي عليه التجربه للزيت المرطب بعد الحمام او الكريم او اي مستحضر بتحطيه وكنتي بتحسي ان شعرك ما بيشربو..
وانتبهو تماما انكم تحلو الباكنج صودا في مويه سخنه الاول قبل ما تضيفوها للزبادي  ..
لان ذوبانها صعب شويه من ناحيه تكوين ذري.. ولو ما ذابت كويس وقمتي عملتيها على شعرك ح تتوزع بنسب مختلفه على طول الشعر والنتيجه حتكون ما مفهومه لان كل حته من شعرك اخدت نسبه تركيز مختلفه وبالتالي رد الفعل حيكون مختلف .. فا انتبهو للحته دي شديد..
وكميه الباكنج صودا انتي برضو الي بتتحكمي فيها .. يعني ممكن الربع ملعقه دي تزيديها لو حسيتي انو لا والله لسا شعري ما اتبل كويس ومحتاج زياده من الباكنج صودا..
📌طبعا اول استعمال للباكنج صودا للناس الي شعرهم منخفض المساميه بيكون فل الفل والنتيجه بتذهلهم وبيكونو مبسوطين جدا من شعرهم وبيحسو انهم لقوا حل مشكلتهم خلاص وما بتبدا تظهر المشاكل الا بعد ثالث او رابع استخدام وبتكون مشاكل حقيقيه..
لكن المشاكل دي بتحصل للناس الي استخدمو الباكنج صودا مباااااشره على الشعر بدون وسيط.. يعني لخبطوها مع مويه وبدو يغسلو بيها شعرهم .. في الحاله دي هم عرضو شعرهم لهجمه مرتده حاده جدا في مستوى الحموضه وعاده بتادي لنتايج وخيمه ..
لكن لو استعملنا وسيط بين الباكنج صودا والمويه وعملنا تعادل حمضي ح نقدر نستفيد منها ونخفف كتييير من قلويتها المضره.. والوسيط دا ممكن يكون زبادي او البلسم بتاع شعرك الي بتستعمليه.. ( انتبهو اني قلت البلسم وليس الشامبو ) لان برضو خلط الباكنج صودا بالشامبو مضر جدا جدا..
طيب .. الوسيط قلنا بيعادل الوسط الحمضي ويخلي استجابه طبقه الكيوتكل منطقيه وما بيفتح البوابات على مصراعيها وبيخليها مواربه بحيث انها تسمح بدخول المويه بشكل معتدل.. والدخول دا ح يأمن مستوى ترطيب للشعر بدون اذى ..
في ناس ح تقول طيب يا كتكوت خل التفاح الي بتنصحي دايما بيه وضعو شنو باعتبار انو يعتبر حمضي..
يلا دا سؤال حلو ..
اي حاجه حمضيه بتشتغل مع الكيوتكل شغل ظريف.. بترقد البوابات بشكل مستوي تماااما ..يعني شبه بتقفلها.. والحاجه دي حلوه مع الناس الي مساميه شعرهم عاليه ( والي هم الاغلبيه العظمى) بيكونو محتاجين لحاجه تمنع دخول المويه لان لو لحقت دخلت بتدخل بشكل مزعج وبتفوووت الحدود المحتمله للشعره وباتؤدي في النهايه الى انتفااااخ داخلي للشعره وتهتك لطبقه الكيوتكل الي بيترجم على شكل تقصف وتكسر وضعف في الشعر..
طيب دا بالنسبه للغسيل ولكن ارجع واكرر انو لااازم تعملو اختبار الاول على جزء بسيط من شعركم عشان تشوفو رده الفعل وهل ح ينفع معاكم ولا شعركم ح يتحسس من الباكنج صودا..
وبرضو حطو في بالكم ان كل بني ادم رده فعلو تجاه اي مستحضر بتختلف من التاني حتى ولو اشتركو في نفس صفه الشعر المنخفض المساميه .. نحن هنا بندي خطوط عريضه ومنطقيه للحاله العامه وقد تنفع معاك او قد لا تنفع.. شعرك هو الوحيد الي بيقدر يحدد الحاجه دي على هواه..
🌸طيب نجي لكيف استعمل الزيوت او الكريمات على شعري وهو منخفض المساميه بدون ما تقعد على سطح الشعره بشكل مزعج وتفضل تلزق وتدي الشعر منظر دهني تعيس وما حلو ابدا..
بتعملوا كالاتي :
📌بعد ما تغسلي شعرك وانتي لسا في الحمام بتجيبي الزيت بتاعك او الكريم او الكونديشنر عموما الي بتستعمليه لتصفيف شعرك وتقلبي راسك على تحت وتبدي تمسحيه على شعرك وليس الجذور.. تمسحي وانتي قالبه راسه على تحت وتمسحيه كلو لحد الاطراف.. وما تعملي كميه كبيره ، حاجه بسيطه بس تؤدي غرض التصفيف والتسريح بسهوله..
بعد ما تمسحي الزيت بترفعي راسك وترجعي شعرك وتدخلي تاني تحت الدش دخله سريعه تبلي شعرك تاني وتغلغلي اصابعك بينو وكأنك بتوزعي الزيت الحطيتيه او الكونديشنر.. وتطلعي على كدا..
بكدا بتكوني ضمنتي غسيل ممتاز وترطيب ممتاز بالمويه قبل الزيت وتوزيع ممتاز لزيت حول الشعر بدون مظهر دهني وبدون ما يتعبك في التسريح بعد الحمام..
دا في حال انو استعملتي الزيوت..
ولكن .. دايما الافضل للشعر منخفض المساميه استبدال الزيوت ب جل النباتات الطبيعيه..
زي شنو يا كتكوت ؟
☝زي جل بذور الكتان
✌او جل الالوفيرا ( ملاحظه: جل الالوفيرا في ناس شعرهم منخفض المساميه لكن ما بينفع معاهم وبيكلكع في الشعر وما بتغلغل وفي ناس بيكون ممتاز معاهم عشان كدا بيحلو الجل بمويه الاول لكن عموما جل بذور الكتان افضل بكتير ) ..
👌او جل الباميه !!
الباميه الواااحده دي بتبليها والجل الي بيطلع منها ممتاز جدا جدا لترطيب الشعر منخفض المساميه..
بتخليه شويه على شعرك بعد تحليه بمويه ( قصدي اي نوع جل نباتي خفيف ) وبعد دا شطفه خفيفه وشعرك بيكون مهذب ومرطب وكل شعره قاعده في مكانها بدون اي احساس دهني مزعج..
🌸مفتاح الشعر المنخفض المساميه انك تعايني كويس جدا لاي منتج عاوزه تشتريه وتركزي على المكونات بتاعتو..
ابعدي من المنتجات الي فيها جلسرين وسيلكون وبارابين وزيت الخروع واللوز والزيتون او زبده الشيا ..
لان الحاجات دي تقيله على الشعر منخفض المساميه … حتى في ناس ما بينفع معاهم زيت جوزالهند ولكن ما كلهم..
ركزو على الزيوت الخفيفه والي عاده ما بتسيب وراها طبقه تقيله على الشعره ..زي زيت الجوجوبا وزيت بذور العنب وزيت الارجان والمكاديميا وحتى لما تستعملي الزيوت دي ما تحطي الا كميه تكون كافيه للترطيب وتمنع الجفاف .. يعني ما تغرقيه.. لكن لاااابد منها الزيوت وابدا ابدا ما توقفيها لان الزيوت هي الي بتضمن تغليف للشعره وحفظ للترطيب جواها..
لو شعرك منخفض المساميه ما تعملي حركه حمام الزيت قبل الغسيل لان اصلا الشعر بواباتو مقفله وما محتاج زياده اقفال.. ممكن تعملي الزيت على اطراف شعرك فقط والي هي النهايات الي بتكون متضرره والضرر دا ادى لارتفاع مساميه الشعر فيها..
📌بالنسبه للبروتين للشعر منخفض المساميه دا حيكون عنوان الجزء الثاني..

يتبع ……………..

 

المصدر :-

International Journal of Cosmetic Science

للإطلاع على موضوع مسامية الشعر إضغطي هنا

تحياتي
ودمتم في نووور

عن الكاتب

غادة كريم

ما قيل للورده حتى جعلها تتفتح.. يشبه ما قيل لي حين صرت انثى مغرمه بالجمال..في مدونتي اهتم بجمال الروح وحياه القلب واشارككم شيئا من رسائل الحياه..