العناية بالبشرة

المفـتـــاح

الــمدونه غادة كريم

يلا صلو على النبي و خلونا نبدا موضوعنا المهم بتاع الليله وعاوزاكم تركزو كويس وتستوعبو لانو موضوع مهم جدا جدا وانا بسميه ( المفتاح ) ..

بنات كتير جدا بيشتكو من مشاكل في بشرتهم سواء تجاعيد او حبوب او قشور او جفاف او دهون وغيرها من مشاكل البشره الي بنسمع بيها كل يوم ..
نفس البنات ديل هم اكتر فئه بتسأل دااايما وابدا من احسن نوع غسول شنو واحسن كريم شنو واحسن واقي شنو واحسن فاونديشن شنو … شنووو شنوووو وشنوووو .. لانهم تعبووو من كتر ما جربو في وشهم وما لاقين حل .. وممكن يسألو طوب الارض من اي حاجه ممكن يلقو فيها حل لمشاكلهم في حين ان الحل في يدهم بس للاسف ما كان في زول ممكن يدلهم عليه..
بجد عندي لوووم كبير وعتب شديد على الفئه المتعلمه في الجتمع والعندها خبره في مجال التجميل والجلديه والطب والصيدله والكيمياء .. ودي شريحه ما بسيطه ابدا في مجتمعنا وعندهم وعي تام بالحاجات دي لكن في شح في اعطاء المعلومه انشالله لناس البيت وغالبا بتكون بدون قصد او تكون هي في روحها بشرتها فيها مشاكل وما قادره تربط بين العلم الفي راسها وبين ارض الواقع.. في حين ان مفتاح الجمال هو العلم والعقل والتفكير السليم..

حاجه تانيه تدعو للتسائل.. يوميا في السودان بتخلق صفحه جديده على مواقع التواصل الاجتماعي بأسم خبييييره التجميل فلانه الفلانيه ……. !!
طبعا السودان كلو بقا خبيرات تجميل ماشالله نعمل شنو السووووق عاوز كدا.. وما السودان بس .. الدول العربيه اكترها كدا..
للرجال يا كفر يا وتر وللنسوان يا خبيره تجميل يافنانه..
غايتو من هسي بكلمكم عشان تكونو عارفين.. عزوز ح يطلع لاعب كوره انشالله ⚽⚽
كان غلبتو الكوره كمان ماعندو غير الوتر بعد دا….. تيرا رارررارااارااااا
لا تقولو لي دكتور ولا طيار ولا مهندس
The Voice Kids بيسوي في شنو

مبدئيا كدا انا بحترم جدا جدا جدا الي كاتبين على صفحاتهم makeup artist .. زي الرائعه نوسه بشير ..بالرغم من الشهره الواسعه الي وصلت ليها في وقت قصير بسبب شغلها الحلو والاحترافي الا انها ما سمت نفسها خبيره تجميل .. والله لا بعمل ليها دعايه ولا حصل لاقيتها ولا اتعاملت معاها لامن قريب ولا من بعيد لكن الشهاده لله شفت شغلها وعجبني جدا لان نادر ما القا ميكب ارتيست بتضبط الكنتور بالطريقه دي وانتبهت انها ما كاتبه في صفحتها انها خبيره تجميل..
وفي غيرها طبعا كتير ما اطلقو على نفسهم اللقب الضخم دا ولهم التحيه والاحترام دي كل القصه..
المهم هسي الخلانا نجيب السيره دي شنوووو انو كون انك اطلقتي على نفسك لقب خبيره تجميل معناها انتي بتتحملي كامل المسؤوليه عن انك تجاوبي على اي سؤال بيخص البشره يجي رازعك من اي كائن كان.. سواء راجل او سيده او طفل او حتى وحده جات شايله كديستا العاجباها وعاوزاك تشوري عليها بشامبو ظريف يناسب شعرها الموضوع ما خطير ابدا بعتبارك خبيره تجميل
يعني مثلا وحده سألتك استعمل ياتو غسول ولا ياتو مرطب ولا اي مستحضر تجاوبي لكن على اساس علمي يخليك واثقه من كلامك.. عشان كدا بس نصيحه لوجه الله غيرو الصفحات الانتو عاملينها دي واكتبو ميك اب ارتيست عشان تكونو اكتر خصوصيه وتحددو شغلكم في ياتو اتجاه ماشي..
او اقرو كتير واتثقفو عشان تفهمو الحاصل وما تسوطو ساي ما باب يا صابت يا خابت.. والكلام دا ما ل خبيرات التجميل بس.. لاي وحده بتوزع خلطات وبتكتب روشتات وفاتحه ليها محل وعندها مناديب في الشرق والغرب والضحيه طبعا البنات المساكين الي منتظرين قششششه يتعلقو فيها في سبيل الحصول على بشره حلوه.. وبيدفعو الوراهم والقدامهم في حاجات بسيطه ..
على الاقل تكوني خليتيها تدفع قروش في حاجه انتي متأكده مليون في الميه انها ح تساعدها وما ح تضرها ابدا..

مع اني بتمنى من كل قلبي انكم تكونو وصلتو لدرجه من الوعي تخليكم تقدرو تقررو بنفسكم الحاجه النافعه معاكم والحاجه الما بتنفع وتبقو خبيرات تجميل انفسكم بكل ثقه..وتبقى استشاراتكم في حاجات ماليكم يد فيها او حاجات ماقدرتو تسيطرو عليها او تضبطوها براكم ..

نرجع ل قصه ال ( مفتااااح )
اي حاجه في الدنيا دي قائمه على التوازن..
السما والارض.. المويه والنار والهوا.. دواخلنا النفسيه .. استقرارنا العاطفي.. صحتنا ومرضنا.. اكلنا وشربنا..علاقاتنا مع الناس كلوووو قائم على نظام متوازن..
عارفين طبقه الاوزون اتقدت ليه  عشان في خلل في نسب الذرات المكونه للهواء بسبب التلووووث ..
اااي حاجه فيها عدم توازن بتأدي لنتيجه وحده وهي الخلل ..
الخلل دا بيترجم بأشكال كتيره حسب الحته الحصل فيها..
يعني مثلا لو حصل خلل في توازنا النفسي النتيجه بتكون امراض نفسيه ..
لو حصل خلل في نظامنا الغذائي النتيجه بتكون يا اما سمنه مفرطه او نقصان وزن زايد عن الحد او امراض غذائيه بيحددها نوع الغذاء..
لو حصل خلل في تعاملنا مع الناس وعلاقاتنا زي مثلا لو اديتي ثقه مااااليها حد لشخص ما وقام خذلك.. معناها كان في خلل من الاول ومافي توازن في العطاء..
حتى الحب الغير متوازن بيأدي لا محاله لخلل في واحد من اشكال العلاقه النهائيه..
يعني من الاخر التوااااازن هو اساس اي حاجه حتى بشرتنا..
كيف يا كتكوت ؟؟ علاقه البشره بالتوازن شنو ؟؟
طيب .. تتذكرو لما كلمتكم عن ان ربنا سبحانه وتعالى خلق جوانا نظام دقيق اسمو نسبه حموضه الجسم .. وان كل عضو وكل جزء من جسمنا عندو نسبه معينه بتخليه يشتغل صح حسب الحاجه المطلوبه منو..
زي مثلا المعده.. المعده وظيفتها في الحياه انها تهضم الاكل البناكلو ..والهضم عشان يتم بيحتاج وسط حمضي جدا عشان المعده تقدر تهرس الاكل دا كويس وتكسرو حته حته وتقدر تقدمو للخطوه التانيه الي هي الامتصاص ..
لو حصل خلل في مستوى حموضه المعده النتيجه حتكون سوء الهضم ومشاكل تانيه..
نفس الفكره دي بتنطبق على البشره او الجلد بصوره عامه..
جلدنا عندو نسبه حموضه ربنا خلقو بيها وبتختلف من واحد للتاني..
وعندو حاجه اسمها العازل الحمضي المسؤول عن حمايه بشرتنا من اي عوامل خارجيه وتلوث وبكتيريا وبرضو بيحافظ على رطوبتها وتعادل مستوى الدهون فيها.. وعشان يحافظ على الوظيفه دي لازم يفضل في نسبه اقرب للتوازن والي هي بالضبط 5.5 .. لو زادت عن كدا البشره بتبقى قلويه وجافه وحساسه وقد تتطور الحاله لمرحله الاكزيما..والالتهابات الي ممكن تأثر تأثير مباشر على انتاج الكولاجين وبكدا تحصل التجاعيد.. او لو قلت النسبه دي لدرجه قليله اقل من 5.5 الوش خلاااص بيبدا يهههيييج ويتحسس حتى من لمسه الفوطه والمنديل عليه وبيكون محمر وحالتو حاله.. عشان كدا ارجع واقووول ان اي خلل في نسبه الحموضه دي بتأدي للمشاكل الي معظمنا بيعانو منها وماعارفين ان مفتاحهم في حلها هو انهم يعرفو درجه حموضه بشرتهم ويختارو المستحضرات البتناسبهم لان دااااايما الخلل بيكون بسبب مستخضرات درجه حموضتها بعييييده كل البعد عن درجه حموضه البشره ..
يعني مثلا.. الصابون الي انا بكرهو .. عارفين بكرهو ليه؟؟ لانو قلوي جدا جدا وبعيد كل البعد عن نسبه حموضه البشره.. عشان كدا بيعمل مشاكل.. هنا انا اخترت صابونه لوكس وقست درجه حمضتها بالرغم من انها فيها كريم الا ان الصابون مازال طاغي ودرجه حموضتها 9 ودي عاليه جدا جدا ومهلكه للبشره..
غسولات كتيييييره بالذات الي فيها نسبه صابون بتكون مؤذيه للبشره بنفس الفهم..

والبنات المساكين مابيكونو عارفين المشكله وين .. في حين ان الغسول دا ممكن يكون نفع مع صحبتك لكن انتي جاط ليك وشك شديد وهيجو ليك.. لييييه طيب نفع مع صحبتك.. لان بشرتها بتكون درجه حموضتها اقرب للقلويه.. وانتي بتكوني اقرب للتعادل او الحمضيه..عشان كدا بيدي معاك نتيجه عكسيه..
شركات كتيره حاولت تحل المشكله دي بحيث انها تضيف للغسولات مواد معادله بحيث ان الغسول يتلائم مع بشرتك لما تغسلي بيه.. دي اغلب الغسولات الي بيكون داخل في تركيبها انزيمات واكسجين.. والمشكله بتكون غاليه جدا وما اي زول بيقدر يشتريها..
طيب عشان ماعندنا قروش نموت يعني ولا كيف ؟؟
لا طبعا.. نشتري الغسول من اي براند لكن قبل ما نغسل بيه وشنا نتأكد من ان نسبه حموضتو متعادله وما ح تأذي بشرتنا ..بالعكس ح تخليها متعادله..
عشان كدا بتلقو في ناس اتجهت لطريقه غسيل الوش بالزيت ( الزيوت طبعا ما فيها جزيئات حره عشان نقدر نقول انها حمضيه غو قلويه زي الارغان والزيتون البكر وجنين القمح ) عشان كدا استعمالها امن على البشره ..و بعدها بتستعملي الغسول وبعدو المويه.. بالطريقه دي بتكوني بتعملي تعادل حمضي لبشرتك بطريقه بدائيه شويه لكن بتضمن عدم تهيج البشره..
دي طريقه اتكلمو عنها بلوقر كتيرين بعد ما ابتكرتها مغنيه كوريه وقالت انها طريقتها المعتمده في غسيل وشها..
انا شخصيا بعتمد عليها جدا الطريقه دي ومعتمداها في غسيل وشي قبل النوم او بعد يوم عمل .. حتى المكياج بزيلو بطريقه الزيت لان مزيلات المكياج بتهيج بشرتي جدا ..

عموما دا ما موضوعنا هسي لكن بس بما اننا بنتكلم عن التعادل الحمضي للبشره كان لازم اذكرها من باب العلم بالشيء..

دايما الغسولات الكريميه بتكون نسبه حموضتها متعادله .. بالذات لو الشركه المنتجه كانت ذكيه واضافت حبيبات حمض الستريك المقشره لغسول كريمي.. بيكونو ضربو عصفورين بحجر واحد وادو توازن حمضي شبه ملائم..
زي غسولات اولاي ( بعضها) وزي غسول بودي شوب اسمو aloe claiming  .. اكتشفتها مؤخرا ولقيتها ظريفه ونسبه الحموضه فيها 6
بعد دا ما بتنفع الغسولات دي مع كل البشرات.. يعني كون انك لقيتي غسول كريمي وفيه حبيبات تقشير دا ما معناه انو هو خلاص الغسول المناسب.. لا لازم تعملي اختبارك ليه وتقيسي نسبه الحموضه وتقارنيها بنسبه حموضه بشرتك بشرايط القياس الي اتكلمنا عنها كتير..
زي مثلا غسول نيڤيا الكريمي.. بالرغم من انو كريمي وفيه حبيبات تقشير الا ان نسبه حموضتو 6.5 برضو تعتبر عاليه وقد تهيج البشره..
يعني لاااابد من القياس..FB_IMG_1463866661053
ودايما خليكم متعادلين واوزنو على الدرجه 5.5 او 6 بالكتير  الي هي انسب درجه بتعيد الحياه للعازل الحمضي ويرجع يشتغل ويحمي البشره من اي عوامل خارجيه..
التونر.. او قابض المسام الي عاده بنستخدمو بعد غسل الوش.. دا كمان قصه لانو في ناس كتير بيهيج بشرتهم وما بيكونو عارفين السبب.. برضو لازم تقيسو نسبه حموضتو قبل ما تستعملوه..وتشوفي هل بيوازن حموضه بشرتكم ولا ح يهيجا ليكم..
على الرغم من اني جربت انواع كتيره من التونر لكن تبقى مويه الرز الافضل والاروع والاجمل ام بي سي بس
درجه حموضتها متعادله تمااااما 5.5 وغالبا بتنفع مع كل انواع البشرات.. زي زيت الارغان وزيت جنين القمح ..
FB_IMG_1463866651381
مضادات الاكسده دايما بتكون متعادله زي فيتامين E ..
المقشرات والمنضفات بتكون حمضيه اكتر عشان تقدر تشتغل.. زي الدفرين درجه حموضتو 5 عشان يقشر كويس.. وعشان كدا لازم بعدو تعملي كريم مرطب متعادل الحموضه عشان تعادلي بشرتك من جديد..
منكن تلقي ناس بيعملو الدفرين او اي مقشر تاني وتكون بتجي تعمل بعدو مرطب درجه حموضتو ما متعادله.. ح تكون بتخرب الشغل الي عملو المقشر..
FB_IMG_1463866664770
حتى المكياج .. عارفين ليه دايما يقولو ليكم ما تشترو المكياج الرخيص المجدع في الطبليات ؟؟ لانو مضرررر واغلبو نسبه الحموضه بتاعتو عاليه جدا او منخفضه جدا وح تأذيك اذيه مبالغ فيها.. اغلب المكياجات وكريمات الاساس والبريمرات والارواج بتلقي مكتوب عليها توازن حمضي pH balance ودي دايما بتكون ماركات معروفه ومحترمه وبتخاف على اسمها ..
FB_IMG_1463866655407
دي كللللللها روؤس اقلام في حاجات كتيره بنستخدمها يوميا وماعارفين هل هي مناسبه لينا ولا لا..

طيب نرجع شويه ل الاسئله الي كنت سألتكم ليها في البوست الفات عشان نقدر نقرب الصوره اكتر ونقدر نعرف درجه حموضه بشرتنا ونقدر نوزنها بكل سهوله.. وصدقوني كون انك تعرفي توزني درجه حموضه بشرتك اسهل بكتييييييير من وزنه حاجات كتيره في حياتك ..

بالنسبه للناس الي كانت معظم اجاباتهم تابعه للفئه (ب)
انتو بتعانو من ارتفاع نسبه ال pH يعني نسبه حموضه بشرتكم اكتر من 6 ..
عشان كدا بشرتكم بتكون دايما جافه وبتظهر فيها خطوط رفيعه وشويه تجاعيد حتى لو سنك صغير وغالبا العازل الحمضي بتاع بشرتك مااااشغال كويس لانو ماقادر يقاوم الحاجات البيواجهها من شمس وبكتيريا وتلوث في الجو ودهنيات .. ليه ماقادر يشتغل يا كتكوت ؟؟ عشان انتي الله يهديك ما ساعدتيه بغسول مناسب ولا مقشر مناسب ولا ترطيب مناسب يخليه يرجع للمعدل الطبيعي.. لو ساعدتيه بالحاجات دي صدقيني ح يرجع يشتغل كويس جدا زي كأنك بتغيري الزيت لعربيه تعبااانه ..وترجعي الحياه والشباب لبشرتك من جديد..
لازم تختاري غسولات ومقشرات وكريمات ترطيب نسبه حموضتها 5.5 عشان ترجع الحاجات لطبيعتها .. وتهتمي بأكلك عشان من جو جسمك يتعادل وينعكس على بشرتك

بالنسبه للناس الي كانت اجاباتهم تابعه للفئه (أ) ..
انتو ممتازين .. بشرتكم ودرجه حموضتها ممتازه ومتوازنه جدا الحمدلله.. وطبعا ما صدفه اكيد وشكم بقا ظريف كدا.. لانكم اكيد بتستعملو غسولات وكريمات درجه حموضتها مناسبه لدرجه بشرتكم سواء عن درايه منكم او بوصف من دكتور شاطر.. المهم حافظو عليها بنفس المستوى..

الناس الي كانت معظم اجاباتها تابعه للفئه (ج) ..
انتو درجه حموضه بشرتكم منخفضه جدا من المعدل الطبيعي..عشان كدا بتكون مزيته ومدهنه طوااالي وحساسه وقدر ما تغسليها تحسيها ما نظفت.. دي كلها علامات انخفاض معدل الحموضه في البشره.. ودا طبعا كلو ناتج من انك بتفتكري ان الدهنيات الكتيره دي علاجها التقشير وتفضلي تهري في وشك وتقشريه كل يوم والتاني بطريقه غلط وتكوني فاكره نفسك بتنظفيه .. وبرضو تكوني بتغسليه خمسين مره في اليوم بغسول كلو حمضيات وانتي ماجايبه خبر وتزيدي الطين بله.. اهدي وروقي شويه الموضوع ما بالخطوره دي ولا مستاهل دا كلو..

ب كدا كل وحده بتكون تقريبا قدرت تحدد هي بشرتها حمضيه ولا متعادله ولا قلويه..
دا من الاختبار دا ..وان كان غير دقيق تماما..

نجي ل اهم نقطه وهي انو كيييف نقدر نحدد حموضه بشرتنا بشكل دقيق..
طيب..
كلكم طبعا بقيتو عارفين شرايط قياس الحموضه.. قلنا بتلقوها في الصيدليات او في السوبرماركت للناس العايشين بره..
(هل حصل سألتو نفسكم ليه الناس العايشين في اوربا وامريكا بيسموهم ناس بررره .. لانهم فعلا بره ونحن جووووا الجوووا زاتو.. منفتحين على الدنيا وشايفينها و ومااافي حدود بتمنعهم من اي شي.. نحن غايتو في الجنه انشالله ….
ما علينا..
يلا المهم لو كنتو جوا ولا برا جيبو الشرايط دي.. بعد تجيبي الشريط ولا مؤاخذه ب تحطي عليه من ( لعابك ) مالقيت اسم محترم تاني saliva وتقيسي نسبه الحموضه كم.. اول ما تحطيه على الشريط بيبدا اللون يتغير في ثواني بعد ٢٥ ثانيه بتقري النتيجه وتقارني اللون الي طلع ليك بالارقام الملونه الموجوده على العلبه وبكدا بتكوني عرفتي نسبه حموضه بشرتك كم بالضبط..
هم طبعا بيقولو ان الطريقه الدقيقه لمعرفه درجه حموضه البشره لازم تكون عند طبيب جلديه لكن الطريقه دي برضو بتديك نتيجه ٩٠٪ صحيحه..
واذا ربنا قدرك ورحتي ل دكتور كمان خير وبركه..

لحد هنا انتي عرفتي وضعك وين بالضبط.. يلا ابدي عليك الله لملمي لي غسولاتك ومقشراتك وكريماتك كلللللها وحطيها قدامك وقولي بسسسسم الله عشان تشوفي النافع معاك من المفروض تجدعيه الزباله ..

تحياتي
ودمتم في نووور..

عن الكاتب

غادة كريم

ما قيل للورده حتى جعلها تتفتح.. يشبه ما قيل لي حين صرت انثى مغرمه بالجمال..في مدونتي اهتم بجمال الروح وحياه القلب واشارككم شيئا من رسائل الحياه..