العطور

النوتات والخطوط العطريه

الــمدونه غادة كريم

#النوتات_والخطوط_العطريه
🍏في ناس كتتتتير جدا جد بيجربوا العطر في المحل ويشموه ويعجبهم خالص خالص ويتحمسوا ويشتروه علطول..
يرجعو البيت ويبدوا يستعملوه وفجأه يقولوا لاء ما حلو بعد ما ياخد فتره من رشو ويندمو انهم اشتروه لان ريحتو اتغيرت وما نفس الريحه الحلوه الي عجبتهم في المحل وقت التجربه..
🍎طيب ليه بيحصل كدا ؟؟
عشان نعرف ليه بيحصل كدا لازم تعرفوا ان اي عطر مكون من ٣ حاجات اساسيه ..
💥نوته قمه العطر top note ..
💥نوته قلب العطر heart or middle note ..
💥نوته قاعده العطر base note ..
وكل نوته من النوتات الثلاثه دي بتتركب وتتكون من مكونات معينه وخلطات مختلفه بتلعب دور اساسي في ريحه العطر ..
يعني شنو ؟؟
يعني اول ما ترشي من العطر ، الريحه الي بتصلك دي هي نوته قمه العطر ، الي بتكون عاده خفيفه لكن مميزه وملفته بتكون غالبا مكونه من ازهار خفيفه او ليمون او ريحه بودره وما بتقعد اكتر من ١٠ دقايق وبعد دا بتتطاير وتختفي وتبدا تظهر نوته قلب العطر الي بتكون عاده قويه وثابته ودي بتكون هي ريحه العطر الاساسيه الي الاغلبيه بيشموها عليك لساعات حسب درجه ثبات العطر وحسب نسبه تفاعلو مع النوته القاعديه الي وظيفتها التفاعل مع جسمك..
عاده بتكون زهور و ورد و انواع مختلفه من البهارات ..
بعد ما تمر ساعات على رش العطر برضو بتبدا تتبخر نوته القلب وبيبقى الاساس او النوته القاعديه الي هي مثبته الشغل دا كلو والي هي بتتغير وبتختلف تماما من شخص للتاني حسب طبيعه جسمك وجلدك ودرجه حرارتك و دي عاده بتتكون من مواد تقيله زي الصندل والعنبر والبهارات الثقيله او المسك والعود ..
🍎فا إذا انتي اشتريتي عطر وعجبك في المحل ف غالبا ح تكوني وقعتي في غرام الافتتاحيه الي هي نوته القمه وعجبتك الريحه ودفعتي الكاش ومشيتي البيت وكانت الافتتاحيه اخدت زمنها واتبخرت وبدت نوته القلب في عزف مقطوعتها التي لم تحظى بستحسانك يا ست الحسن والجمال ..
🍏عشان كدا لما تكوني ناويه تشتري عطر ( بالذات لو غالي ) يا اما تاخدي تيستر وتمشي البيت ترشي منو و تديه زمنو وتعرفي كيف تقيمي العطر كويس او لو مافي تيسترات صغيره وبس التجربه جوا المحل ، رشي منو وخدي لفه ما اقل من نص ساعه في المول عشان يكون اخد زمنو وتقدري تقيميه كويس ..
😒وعليك الله ما تقومي ترشيه على صحبتك وتقولي ح تقيميه عليها لان تفاعل جسمك مع العطر عمرو ما حيكون زي تفاعل جسم صحبتك وعمر الريحه ما حتكون وحده ..
يعني عادي جدا نفس العطر يرشو منو اتنين ويعجبك على وحده فيهم وعلى التانيه ما تحبيه ..
اما الي بيرشو العطر على الملابس من بره بدون ما يعطرو الجسم نفسو وخاصه اماكن النبض ف انتو تعبانين ساي وصارفين قروشكم في الفاضي وغالبا ما عندكم اي ذوق في العطور عشان كدا اشترو ساي لان ما اظن بيفرق معاكم 😒
اه والله زي ما بؤولوكو كدا 👆
🍎نجي للخطوط العطريه
ماهي الخطوط العطريه يا كتكوت ؟؟
دي حاجه كدا زي العوائل الكبيره الي تحتيها في تفرعات وتفرعات لاسر صغيره لكن كلهم في النهايه بينتسبوا للعائله دي.. ودي الحاجه الي بتسهل عليك تعرفي انتي اصلا بتحبي شنو من العطور وحتلقي نفسك عاده بتشتري من نفس العائله لكن من اسره تانيه لان خطك وعشقك واحد..
او لو لاحظتو عاده في روائح مرتبطه عندكم بناس معينين زي حبوباتنا او امهااتنا او ازواجنا او اطفالنا او حتى صديقاتنا.. يعني نثلا كل ما تشمي ريحه صندل تنط في بالك امك ، غالبا لان خطها العطري مرتبط بالصندل واغلب العطور البتستعملها حتكون بترجع للعائله دي حتى لو اختلفت اسماء العطور المستخدمه لكن يبقى الاساس عالق في ذاكرتك..
او مثلا الروائح الباودريه مرتبطه بالاطفال مهما تنوعت اسماء العطور..
وهكذا..
عشان كدا لازم نعرف انواع الخطوط العطريه ودا بيسهل عليك انك حتى بدون ما تشمي العطر و بمجرد ما تقري وصف نوتاته وتعرفي تركيبها من مقدمه وقلب وقاعده ح تعرفي بينفع معاك ولا لا، وهل هو من الانواع الي بتحبيها ولا لاء..
#الخطوط_والعوائل_العطريه..
❤خط الفلورال floral
دا اكتر خط تقليدي وشائع الاستعمال خاصه بين النساء ، عباره عن خط مكوناتو الاساسيه الازهار والورود ، الروز والافندر والبنفسج وكل ازهار الربيع ، بيعتبر من الخطوط الحلوه ، عطورو بتنفع في الصيف والربيع وخاصه بالنهار ومحبوب جدا ..
من اشهر العطور الي بتمثل الخط دا عطر miss dior
بنصح بالخط دا تتعطري بيه على الزفاف .. فخم وهادي جدا وح ينعنشك ..
❤خط الحمضيات والفواكه و الاعشاب .. citrus fruit
دا خط منعش جدا وخفيف ويديك ريحه نظافه نظافه ، نوتاتو دايما بتدي ريحه برتقال او ليمون او خوخ ومشمش وجريبفروت او لافندر مناسبه برضو للصيف والفتره النهاريه لانها بتدي انتعاش يخفف من الحر ، اغلب عطور الخط دا رجاليه ، وفيه منها نسائيه بالذات الي بيدخل فيها التوت الاحمر زي فيكتوريا سيكريت الاحمر..
❤خط البهارات الشرقيه..
الخط دا بيكون اعمق واقوى من الخطين الفاتو بيكون على ريحه فانيليا وبهارات ( قرفه ومستكه وقرنفل وهيل ) وعنبر او مسك ، العطور الي في الخط دا بتتميز بأنها عطور قويه ومرتبطه بالجنس ارتباط وثيق ..
عاده بتستعمل في السهرات وفي الليالي الشتويه البارده ..
احسن مثال بيمثل الفئه دي عطورنا السودانيه ..
❤خط الاخشاب والعود..
العطور في الخط دا عاده رجاليه ، قويه وجذابه ، بتديك ريحه الارض من قوتها.. دايما بيدخل فيها الباتشولي والبرجموت والصندل، شجر الجوز والصنوبر، مناسبه جدا للسهرات .. وياسلام على ريحتهم لما تتلخبط مع ريحه السجاير👌 ( ااااه قلبي الصغير لا يحتمل💔 )
في منو الخط دا برضو عطور نسائيه لكن في الحاله دي بتدخل تحت تصنيف عطور الكبرته 😅😅
💥دي الخطوط الاربعه الاساسيه بعد دا الخطوط دي نفسا ممكن تتداخل مع بعض وتدينا مليون خط فرعي وينتج عنو عطور جديده لكن بتضل النوتات وحده وبتوصلك للريحه الانتي بتحبيها وبترتاحي معاها ..
دي كانت ترجمه مختصره من مدونه عطور انجليزيه اتمنى تكونو استفدتو منها وتقدرو بعد دا تعرفوا كيف تختارو عطوركم بكل ثقه..
النص الاصلي :-
http://www.steadyhealth.com/articles/heaven-scent-how-to-choose-the-right-perfume

تحياتي..
ودمتم في نوووور ❤

عن الكاتب

غادة كريم

ما قيل للورده حتى جعلها تتفتح.. يشبه ما قيل لي حين صرت انثى مغرمه بالجمال..في مدونتي اهتم بجمال الروح وحياه القلب واشارككم شيئا من رسائل الحياه..