العناية بالشعر

بحر زيوت الشعر واختيار الزيت المناسب

بحر زيوت الشعر واختيار الزيت المناسب..
الــمدونه غادة كريم

ح اتكلم عن زيوت الشعر، ما لها وما عليها وكل شارده و وارده عنها..

شعر راسك عباره عن حي .. او حله او مجمع سكني.. يعني منظومه كدا عامله بالضبط زي الاحياء السكنيه..
كل شعره علاقتها بالشعره الجنبها مفروض تكون بالضبط زي علاقه الجيران (المحترمين) ببعض لا هم الناس السغيلين المكرهينكم عيشتكم جنبهم ولاصقين فيكم اليوم كلو ومافي مساحه للخصوصيه ابدا مدينها ليكم ولا هم الناس الكريهين برضو الي ما بتشوفوهم لا في افراح ولا اتراح ولا كأنكم جيران ولا بتتقابلو صدفه زاتو وجيران بالاسم بس..
يكونو كدا جيراااان بس .. بكل الحدود والروابط والصلات والاحترام والشكل النهائي الظريف بتاع الجيران ..
يلا علاقه كل شعره بالشعره الجنبها لو بقت بنفس الطريقه بتكون المنظومه دي في كامل جمالها .. لا شعرك بيكون ملصق في بعضو زي كانك ما غسلتيه ليك ٣ سنين ولا كل شعره طايره في حته كأنو طاقاك كهربا .. بتكون كل شعره متفاهمه مع الجنبها بأدب ..
المسؤول من العلاقه دي وطريقه تعامل شعرك مع بعضو هو الزيت الي بتستخدميه..
زيوت الشعر مهمه جدا ولازم تفهمو وتعرفو عنها حاجات كتير..
طيب.. الشعر عموما مشكلتو الاساسيه المويه.. وما اي شعر عندو مشاكل مع المويه.. الشعر التعبان والي وصل مرحله ان مساميتو بقت مرتفعه جدا ودخول المويه جوا اعمق طبقاتو بقا سهل جدا ..
طيب وين المشكله لو دخلت المويه يا كتكوت جوا الشعره ؟ المشكله انها لما تدخل بتوسع الشعره من جوا وبتعمل تمدد شديد .. وكل التمدد دا بيضغط على طبقه اسمها الكيوتكل ودي اهم طبقه في الشعره لانها عامله زي الغشاء البيحافظ عليها.
وبما ان الكيوتكل دي ما بتقدر تتمدد فالنتيجه بتكون تصدع فيها بيؤدي لتكسر الشعر والتقصف وكل المشاكل العارفنها دي..
يلا الزيوت فايدتها انها بتلعب على الحته دي..
في زيوت تركيبها بيسمح ليها بأختراق طبقات الشعر لدرجه بتسمح للزيوت دي بالتدخل في بروتين الشعر وتخليه ضد المويه..
لانها بتكون بتحمل شحنات موجبه بتتجاذب مع الشحنات السالبه الي بيتمتع بيها بروتين الشعر ، والتجاذب دا بيدي في النهايه منظر محترم للشعر وسيفونيه جميله..
( ملاحظه: الزيوت ما فيها ايونات لكن دي قصه طويله لو حكيتها هنا ممكن عادي تقومو تجرو) خلونا في الزبده..
والزبده ان الشعر الصحي والقوي طبيعتو بتكون ضد المويه اما الشعر المنخفض المساميه اومعتدل المساميه بيكون نوعا ما ضد المويه وهي في النهايه مسئله بتاعت تعادل وتوازن..
وهدفنا بيكون انو نمنع الشعر من انو تدخلو كميات كبيره من المويه في زمن بسيط ..
وكل الزيوت النباتيه بتعمل كدا لكن بطرق مختلفه..
يا اما انها تقعد على الشعر من فوق بس زي طبقه عازله او انها تخترق طبقات الشعر نفسو.
ودا كلو بيعتمد على تكوين الزيوت دي وعدد جزيئات الدهون الثلاثيه الي بتدخل في تركيبها ونسبه الدهون المشبعه الاحاديه ..
يعني مثلا ..
لو شعرك جاف جدا ومساميتو عاليه وخشن وفعلا بتحسي انو طاقاك كهربا وانتي بتسرحيه معناها ح تحبي جدا انك تتعاملي مع زيوت مخترقه للشعر لانها ح تريحك وتريح شعرك جدا..
اما لو شعرك بتحسيه كويس بس متضرر من الشمس او من حراره الاجهزه البتستعمليها زي السيراميك والاستشوار (بتعرفي الحاجه دي بأنك بتلاحظي الضرر على اطراف شعرك بس او الجزء السفلي من شعرك) فا غالبا ح تحبي الزيوت الي مخترقه نسبيا للشعر..
اما لو شعرك ناعم جدا فاستخدام الزيوت دي ح يديك احساس انو مزيت وملصق في بعضو الا لو استعملتيها بنسب بسيطه جدا جدا..
انا هنا ح اديكم تقسيمه للزيوت بعتبارها مخترقه او مخترقه نسبيا او غير مخترقه للشعر..
والتقسيم دا معتمد على تركيبه كل زيت ونوع الدهون الثلاثيه والاحماض الدهنيه و كميه الدهون المشبعه الاحاديه الي داخله في تكوينو..
الزيوت المخترقه للشعر :
زيت جوز الهند العضوي..
زيت دوار الشمس العضوي..
زيت نواه النخيل..
زيت ثمره الباباسو البرازيليه..
زيت حمض الكابريك..

الزيوت المخترقه نسبيآ للشعر:
زيت الخروع
زيت الزيتون
زيت السمسم
زيت الارغان
زيت الافوكادو
زيت الذره
زيت الفول السوداني
زبده الشيا
زيت الورد
زيت المشمش
زيت اللوز الحلو
زبده الكاكاو
زيت بذوز العنب
زيت بذر الكتان

الزيوت الغير مخترقه للشعر بتاتا البته :
زيت الجوجوبا
زيت نخاله الرز
الزيوت المعدنيه..

ملاحظه: اغلب مستحضرات الشعر بيستعملو الزيوت الغير مخترقه لان هدفهم بيكون بس حاجه ترقد الشعر وتديه لمعه ما شغلتهم شعرك يتعالج ولا يستفيد المهم المظهر النهائي البيخليك مقتنعه ان المنتج ممتاز.. فياريت تركزو ف الحته دي وما تفتكرو ان مستحضرات الشعر ممكن تغنيك عن الزيوت بالذات لو شعرك من النوع البيحتاج تدخل جراحي

طرق مختلفه لاستعمال الزيوت والاستفاده منها :-
☝قبل استعمال الشامبو..
دا احسن وقت ممكن تعملي فيه زيت.. قبل ما تغسلي شعرك بساعتين ل ١٢ ساعه،  غطسيه بالزيت.. الزيت دا حيكون درع حمايه لشعرك من المويه اثناء الاستحمام وبيمنع فقد البروتين وتكسر الشعر والتقصف والجفاف،  حطي في بالك كل ما زادت عدد الساعات الي بتخلي الزيت فيها على شعرك كل ما زادت حمايتو من المويه وبقيتي مبسوطه من شعرك بعد الغسيل.. وحاولي ان الزيت الي تعمليه يكون من النوعين يا اما المخترق للشعر او المخترق نسبيا..
✌اضافه الزيت للبلسم او ل ماسك الشعر الي بتعمليه بعد الغسيل..
دي طريقه تانيه ممتازه برضو لاستعمال الزيوت ..
?اضافه الزيت لكريم الشعر البتحبيه او السيروم البتعمليه لشعرك اثناء التسريح..
كم نقطه من الزيت البتحبيه عليهم ح تديك نتيجه حلوه كمان..

…………………………….. يتبع

شعره واحده ممكن تكون بدايتها منخفضه المساميه وفي نهايتها المساميه عاليه..
تابعو البوست القادم..

تحياتي…..

ودمتم في نوووور

عن الكاتب

غادة كريم

ما قيل للورده حتى جعلها تتفتح.. يشبه ما قيل لي حين صرت انثى مغرمه بالجمال..في مدونتي اهتم بجمال الروح وحياه القلب واشارككم شيئا من رسائل الحياه..

أضف تعليق