العناية بالبشرة

بودرة الألفا أربيوتين وطريقه التحضير الصحيحه

الــمدونه غادة كريم

بخصوص بودره الفا اربيوتين وكيف ممكن تحسبو النسبه الي عاوزين تحطوها في كريمكم او اللوشن بتاعكم..
نحن كنا قلنا ان ماده الالفا اربيوتين هي ماده عضويه امنه جدا مستخلصه من نبات اسمو عنب الدب.. لقو انها بتشتغل شغل جميل جدا وهو انها بتثبط وتمنع من عمل الخلايا المنتجه لصبغه الميلانين المسؤوله عن تصبغات الجلد الي معظمنا بيشتكو منها سواء من التعرض للشمس او من عوامل تانيه .. فرقها من الهايدروكوينون الي كان محتل الصداره في مركبات التفتيح قبل ما يكتشفو الحاجات التانيه ( زي الالفا اربيوتين والكوجيك اسيد وغيرهم كتير) ان الهايدروكوينون بيقتل الخلايا المنتجه لصبغه الميلانين تماما عشان كدا تأثيرو في التفتيح بيكون سريع جدا جدا لكن بشكل غير آمن اطلاقآ.. غير كدا الهايدوكويوينون مصنف في هيئه الدواء والغذاء الامريكيه وفي اوربا واليابان على انو عامل مسرطن .. واتسجلت حالات سرطانيه هو كان السبب فيها..
اظن كدا الكفه رجحت تماما لصالح الالفا اربيوتين الي مجاز من هيئه الدواء في الاقطار الثلاثه الي ذكرتها..
في منو نوعين.. الفا وبيتا.. لكن دايما جيبو الفا اربيوتين لانو ثابت اكتر من بيتا وكمان تأثيرو في تفتيح البشره اكتر من بيتا واسرع بكتير..
طبعا في تفاصيل علميه دقيقه ودراسات كتيره بانو ممكن يتحول لهيدروكوينون في الامعاء لو حصل زياده سميه في الجرعات الموصى بها وتم امتصاصو بشكل كبير جدا في الامعاء.. ( ح اتطرق ليها بشكل اوسع في الموضوع الاساسي) ..
..لكن مايزال آامن من الهيدروكوينون الصريح في الاستخدام بمراحل كتيره جدا جدا..
خاصه وان كل البنات في السودان بيستعملو الهايدروكوينون في كل الكريمات البيستعملوها سواء للوش او الجسم.. دا طبعا لو ما كانو بيستعملو الزئبق..
الحاجه الوحيده الي مخليا بعض الناس مازالو متمسكين بالهيدروكوينون هو سعرو الرخيص.. لكن ف النهايه دي اجسامكم ودي عقولكم.. وعقلك في راسك تعرف خلاصك..
وانك تستعملي حاجه لفتره طويله وبالك مرتاح احسن من انك بعد تتمي شهرين من استعمالها تبدي تقلقي وعقلك يودي ويجيب..

ح تجي وحده هسي تقولي طيب غالي وما بنقدر نشتريه يا كتكوت ! ح اقولك بقا في اكياس من بودره الالفااربيوتين فيها ٣ جم الي هي ب ٥ دولار تقريبا.. يعني لو كل شهر بتجيبي ليك كريم فيه مواد ضاره صدقيني حتكوني بتدفعي اكتر من ال٥ دولار دي..

تعالي احضرينا يا بت الشيخ وقولي رأيك وممكن تتصرفي كيف ( انا اعتمدت عليك بعد ربنا بخصوص ناس السودان )

نرجع لموضوع الحسبه..
مبدئيا لازم تعرفو ان بودره الالفا اربيوتين بتشتغل في وسط نسبه الحموضه بتاعتو من ٣.٦ ل ٦.٦ عشان كدا ما تحاولو تضيفوها على مستحضر فيه فيتامين سي او حمض السيتريك.. citric acid لانو ح يوقف شغلها..
اغلب الكريمات واللوشنات الي بنستعملها نسبه الحموضه فيها بتتراوح بين ٤ و ٦ و دي مناسبه جدا لشغل البودره.. ف لما تجيبو كريمكم بس اقرو في المكونات ما يكون من ضمنها حمض الستريك واتوكلو على الله..او لو ربنا فاتحها عليك وقاعده في بلد متحضر امشي اي صيدليه محترمه وقولي ليه عاوزه pH test stripes ..( الصوره المرفقه مع البوست)
الدكتورات ! عارفين طبعا تجيبوها من وين
المهم بتجيبيها وتغمسيها في الكريم وتقيسي نسبه الحموضه فيه قبل وبعد اضافه الالفا اربيوتين وتتاكدي ان النسبه ما اقل من ٣.٦ ولا اكتر من ٦.٦ عشان يشتغل صح..
لو قستيها ولقيتي ان النسبه ياخي ما ظابطه اها ح تكشحي الكريم مثلا !! طبعا لا مع كتكوت هناك دائما حلول
لو لقيتي ان النسبه بقت اقل من 3.6 وعاوزه ترفعيها.. تجيبي ذرات معدوده من بيكربونات الصوديوم الوااااحده دي وتضيفوها للكريم وتفحصو نسبه الحموضه.. اما لو لقيتوها بقت اعلى من 6.6 وعاوزين تخفضوها بتسحني حبه فيتانين سي الفوار وتاخدي ذراااات معدوده وتضيفيها للكريم عشان تعادلي نسبه الحموضه ( لاحظو هنا استخدمنا فيتامين سي عشان نعادل بيه الوسط الي عاوزين نهيئو ل الالفا اربيواين عشان يشتغل ما عشان اي حاجه تانيه.. مجرد ذرات معدوده وبعد دا قيسو النسبه بالشريط..

ملحوزه( الناس الي متخيلا ان الشرايط البنقيس بيها دي حاجه معجزه هي في الحقيقه نفس الشرايط البيغمسوها في تحاليل البول ( الله يكرمكم ) عشان يقيسو نسبه الحاجات فيه زي الحموضه والسكر والزلال .. حاجه عاديه جدا ومفترض تكون متاحه في اي صيدليه ورخيصه جدا..
في وحده هسي بتسال ليه طيب ما عملنا الحاجه دي لما جينا نصنع فيتامين سي وقسنا حموضتو وخلاص.. ح اقولك لان اثناء ما انتي بتسوطي بيكون اتأكسد خلاص وفقد قيمتو لانو ثباتو ضعيف.. عشان كدا دايما سيرمات فيتامين سي بتتعلب في عبوات قزازها الوانو غامقه سواء بني او اسود عشان الضوء.. لو اتعرض للضوء بيفقد مفعولو تماما.. فهمتو يا حلوين ..
علم دقاااااق صح ..
لكن الثقافه حلوه برضو ..

طيب.. الحاجه التانيه انو البودره دي بتذوب بكل سهوله في المويه.. يعني اي مستحضر هيكلو الاساسي مويه بتذوب فيه بسرعه جدا زي اللوشنات عموما.. لكن للضمان ذوبو البودره في مويه ( دافيه) في الاول بعد دا ضيفوها للمستحضر سواء لوشن او كريم ..

المويه طبعا بتشيلوها بالقطاره زي ما شرشبيل بيعمل في خلطه السنافر وبتنقطو نقطه نقطه على البودره لحد ما تلقوها اتحلت وذابت تماااما في المويه واحساس الكريستالات اختفى منها.. بعد دا بتضيفوها على اللوشن او الكريم بتاعكم..
طيب يا كتكوت نشيل قدر شنو من البودره؟
يلا عشان ما ادخلكم في متاهات وحساب رياضيات.. ح اوريكم حاجه تعملوها.. ملعقه الشاي الصغيره من البودره بتعادل ٤ جم او تقريبا ٤ وشويه..
ال ٤ جرام دي لما تضيفيها على علبه كريم فيها ١٠٠ جرام بتكوني كونتي كريم فيه نسبه الفا اربيوتين ٢.٢٪ ودي نسبه بتدي نضاره واشراق وبتوحد اللون ( طبعا بالاستخدام المستمر مرتين في اليوم لمده شهرين)
لكن معظم كريمات الليل بتكون ٥٠ جرام ..زي مثلا كريم فيتامين اي الليلي فيه تقريبا ٤٧ جرام.. خلووونا نقول ٥٠ عشان الحبايب..
لما تضيفي عليه ملعقه شاي من البودره بتكوني اضفتي ٤ جرام للكريم وبالتالي بتكوني صنعتي كريم فيه نسبه الالفا اربيوتين ٥٪ ( لاحظو ان في حته فرقه خليناها عشان نقفل ال ٥٠ او ال ١٠٠ جم بعد الاضافه للكريم ) ودي النسبه الي بتفتح درجه البشره درجتين ثلاثه..وبتكون امنه جدا على البشره وفعاله..
يلا هنا عاوزه اوضح حاجه..
هيئه الدواء والغذاء الامريكيه اجازت استخدام ٢-٤ ٪ من الالفا اربيوتين في مستحضرات التجميل.. او ٠.٢٪ لو عاوزه تضيفيها على مستحضرات وخلطات التقشير..
يعني عادي تضيفيه للدفرين او ل الرتن اي عشان يفتح مع التقشير لكن النسبه تكون ٠.٢٪ الي هي صعب تحسبيها بدون ميزان فما تحاولو تعملوها ف البيت الا لو عندكم ميزان او يعملا ليكم صيدلي..
لكن عموما فعال جدا مع المقشرات وبيشتغل شغل صح..
لكن النسبه الي اجازوها دي مااا بتفتح اللون عشان اكون معاكم واضحه وصريحه.. وكمان لو زدتي النسبه لحد ٥٪ او ٦٪ ما بتضرك ابدا انشا الله..
المهم خلونا في المفيد ..
ما تزيدي من نسبه ٧٪ من البودره للكريم .. ليييييه ليه ياكتكوت مانزيد من ٧٪ مش هسي قلتي انها مامضره..
ايوووه ما مضره لكن اصلا لقو انو مافي اي زياده في تأثيرها الفعال بعد نسبه ال ٧٪ .. يعني بتكوني بتسوطي ساي.. عشان كدا احسن من ناحيه اقتصاديه انك تحتفظي بيه وتستعمليه كل ما يخلص كريمك.. بدل تمشي تشتري تاني ( مع العلم انها غاليه البودره دي ومافي داعي تجازفي بيها على الفاضي )..
حاجه تانيه.. الالفا اربيوتين ممكن تضيفي معاه مركبات تفتيح آمنه تانيه برضو بتجي على شكل بودره .. زي الكوجيك اسيد kojic acid و النياسينامايد niacinamide  الي هو ڤيتامين ب٣..ممكن الثلاثه تحطيهم سوا لانهم بيشتغلو على مستوى حموضه متقارب ليهم هم الثلاثه.. لكن عاده الكوجيك اسيد بيبوظ سريع لانو غير ثابت.. نفسيا ما مستقر .. وانا عندي مشكله مع الناس الي نفسيتهم ما مستقره لمن يجيني مركب كمان عشان كدا ما بضيفو.. في حين انكم ممكن تضيفوه عادي لو متوفر عندكم.. لكن حب الناس مذاهب.. يعني لو عندك قروش كدا ولا كدا وعاوزه تشتري ومحتاره بين الkojic acid و ال niacinamide انا بنصحك بالنياسينامايد افضل منو وثابت كيميائيا.. وشخصيتو مسقره كدا ومالي مركزو..
حاجه تانيه عاوزه اوضحها.. ما تفتكرو انكم ح تمسحو الكريم الليله وتصحو الصباح تتفاجأو ب نانسي عجرم ف المرايه.. لا ابدا.. ح تستعملوه مرتين ف اليوم صباح ومسا عشان تشوفو نتيجه بعد شهرين.. لكن الجميل ف الموضوع انو ممكن تواصلي فيه لحد ما تزهجي ومافي اي خطوره من استعمالو فترات طويله..وطبعا ما تنسو ابدا واقي الشمس لما تطلعو بالنهار عشان ما يكون هو المسكين بيبني وانتي تجي تهدمي وتقولي والله ما نفع معاي.. اوكي..
ممكن عشان تعززي امتصاصو تعملي شنووووو .. قبل ما تحطي الكريم ب ٥ دقايق.. امسحي سيروم فيتامين سي على وشك.. 4 نقط من السيروم كافيه جدا ( جبهتك و دقنك وخدودك.) بعدين امسحي كريمك ونومي..
افضل انواع سيروم فيتامين سي من اوباجي وسكينسيوتيكلskinceutical و سوسكين soskin و ريكسول rexsol .. دا ل ناس الخليج.. ناس امريكا و اوربا mad hippie و كمان skinceuticals ..
ناس السودان.. السيروم الي كلكم سألتو منو والي هو من فير اند وايت فيه نسبه هايدروكوينون ١.٩٪ فا ما بنصح بيه ..
اسألو لو فيه غيرو من الانواع الي ذكرتها او اذكرولي اسماء ممكن افيدكم فيها وتكون متوفره عندكم..
…ملاحظه.. مافي سيروم لفيتامين سي رخيص .. اقل حاجه ١٠٠ ريال.. اقل من كدا بيكون فيه انا واخواتها.. زي سيروم فيتامين سي من بودي شوب.. فيه نسبه ٣٠٪ تقريبا عطور.. عشان كدا بيهيج بشره كتير منكم..ولو انو نفع مع ناس كتير.. لكن بما انو نحن هدفنا من السيروم انو نصغر ١٠ سنوات عن عمرنا.. احسن تجيبو نوع كويس حتى لو دا نافع معاكم عسان تستفيدو على المدى البعيد ..
الي سألو من ڤيتامين سي الفوار وقالو طيب نعمل بيه شنو .. اشربووووه.. الخواجه لما صنعو صنعو عشان تشربووووه..

المهم يا حبيباتي ان الموضوع عموما سهل وبسيط ومامعقد .. حاولو ركزو شويه ح تلقوه والله بسيط.. وماتخلو زول يسرح بيكم ويديكم احساس انكم قاعدين تصنعو قنبله ولا بتخترعو في الذره وانو لازم معمل كيميائي عشان تصنعو الكريم .. الحاجات المحتاجه معامل بوريكم ليها بدون ما اراعي معتقداتكم الخاطئه ( زي سيروم فيتامين سي) وكمان الحاجه المامحتاجه معمل بوريكم ليها واطلعكم من خوفكم وجهلكم بكل ماهو حديث ومتطور عشان تنفتحو على العالم اكتر وتعرفو ان الناس دي عبرت زماااااااان للجهه التانيه و نحن لسا عندنا بنات حارسين ميسره..
ادخلو اي موقع ونسات بنات من امريكا او اوربا او كندا شوفو الحاجات البيتكلمو فيها شنو.. كلهم عاوزين يفتحو لونهم لكن ب فهم وبدون اي ضرر عليهم..اتجاوزو زمان فكره الهيدروكوينون والزئبق والبلاوي الي لسا بنات مننا غاطسين فيها وبقو بيدورو على كلمه FDA قبل ما يستعملو اي منتج.. ( اختصار ل هيئه الدواء والغذاء).. الانترنت ما فيسبوك وانستغرام و واتساب وخلاص.. في مواقع كتيره مفيده جدا .. لكن للاسف ما بتلقي المواضيع المفيده الا باللغه الانجليزيه.. و معظم البلوقرز العرب بيشتكو من فقر المحتوى العربي من كل المواضيع الهادفه..
اتحدى وحده فيكم تدخل قوقل وتلقى في موضوع باللغه العربيه في حاجه مفيده وعلى سبيل المثال عن الالفا اربيوتين.. ما حتلقو غير امثله لبعض الكريمات الي بتحتوي عليه كا ماده في تركيبتها .. وسعيده اني اكتب ف الموضوع دا و بلهجتنا السودانيه حتى لو مجرد روؤس اقلام لكن كفيله بأنها تفتح عيون البعض ولو ب حاجه بسيطه  .. جمعت الموضوع من مصادر كتيره ومختلفه.. ولو اني شايفه ان لسا ناقصو كتييير عشان نقدر نعتبرو مرجع. لكن افضل اني احتفظ بالبقيه الباقيه للموقع الخاص بي… وانشالله يكون موضوع كامل ومتكامل..

حاسه نفسي اتكلمت كتير .. لكن اتمنى اكون افدتكم ولو في اي سؤال ما تترددو.. حتى لو ما جاوبت هنا بيكون في بوست توضيحي زي دا ..

تحياتي
ودمتم في نور

عن الكاتب

غادة كريم

ما قيل للورده حتى جعلها تتفتح.. يشبه ما قيل لي حين صرت انثى مغرمه بالجمال..في مدونتي اهتم بجمال الروح وحياه القلب واشارككم شيئا من رسائل الحياه..

أضف تعليق