العناية بالشعر

تجربتي لمجموعة “راين فوريست” وماء الرز المخمر للشعر

الــمدونه غادة كريم

اتكلمنا المره الفاتت عن تقشير فروه الرأس وتهيئتها لاستقبال العلاجات والزيوت والماسكات
اتمنى تكونو كلكم عملتو الخطوه دي سواء بأستخدام الشامبو المنقي او بأستخدام السكر الاسمر او البني ..
المره دي ح نتكلم عن حاجه عاوزاكم تدخلوها في روتينكم الدوري للعنايه بالشعر..
لكن في الاول ح اديكم شويه معلومات عامه..

عاوزه اقعد اديكم محاضره عن التغذيه و الهرمونات والتعرض للشمس  والكلام الكتير الي كلكم عارفينو وعاملين رايحين ..
كللللكم عارفين اهميه التغذيه والفيتامينات والحديد للشعر الصحي ولا ما كان جريتو على الهيرفينيتي والبايوتين وغيرهم من المكملات الغذائيه الي هي فعلا مهمه..
لكن ح اديكم نقاط كدا حاولو ركزو فيها ..
الشعر والاظافر اكتر حاجتين ما بيتصلحو بالغذاء العادي بتاعنا مهما اكلتي من اكل صحي.. لاااازم تدخلي مكمل غذائي عشان يشتغل عليهم.. ركزو على البيوتين والسيليكا وفيتامين B و C و E والحديد والاوميغا ٣ ..دي هي المكملات البيحتاجها الشعر ..
حبوب البيوتين طبعا معروفه بأنها بتغذي الشعر جدا جدا جدا وفعلا بتحسي الشعره بقت قويه وسميكه .. لدرجه انك بتلاحظي حتى شعر جسمك بيقوم بسرعه غير عن المعتاد واظافرك بتكون صحيه وقويه ورهيبه.. لكن مشكلتو الكبيره انو بيطلع حبوب كبيره في الوش  ل اكتر من 70% من الناس البيستعملوه.. ودي بقت كدا معادله صعبه بين البشره والشعر  كانت بالنسبه لي كفيله بأني اجدعو في الزباله غير مأسوف عليه

اي وحده بتستعمل البيوتين ونافع معاها وما عمل ليها حبوب تعتبر نفسها من ال ٣٠٪ السعيدين

فا نصيحه اخويه ما تاخدو حبوب البيوتين البيور.. اشترو المالتي ڤيتامين العادي البيكون مغطي الانواع الي ذكرتها في الاول  وصدقوني حيكون كافي جدا مع اكلكم اليومي ، او ممكن تستعملو حبوب برايورين priorin ماعندها اثار جانبيه زي البيوتين..
وحاولو تاخدو الفيتامينات من مصادرها .. ولو انو بقا صعب في الزمن دا الواحد يلتزم بالاكل الصحي طول اليوم لكن حاولو على قدر الامكان تاخدو ٣ حصص من الخضار او الفواكه يوميا..

دايما اي علاج عاوزين تبدوه للشعر ابدوه في الصيف لان الشعر بينمو بسرعه في الصيف (بختكم يا ناس السودان) السنه كلها صيف عندكم

حبوب منع الحمل طبعا بتمنع التساقط عند ٨٠٪ تقريبا من البيستعملوها.. هي صح بتخفف سمك الشعره لكن بتمنع التساقط.. الي بياخدو في حبوب منع الحمل هسي يحاولو يلاحظو .. ح تلقو ان الشعره فعلا خفيفه لكن لما تسرحي شعرك ما بيقع.. ديل الي ح يظهر فيهم تأثير البايوتين .. (دا طبعا لو قررو ياخدوه)
هسي في ناس ح يجو طبعا يقولو والله مافي شي وقع لينا شعرنا غير حبوب منع الحمل.. ح اقولك ريحي نفسك وشوفي ليك شماعه تانيه لان لو جبتيها يمين ولا وديتيها شمال ماااا بتركب.. حبوب منع الحمل ( وهنا بقصد الحبوب المركبه الي فيها نوعين من الهرمون ( بتختلف من حبوب الرضاعه) فيها هرمون اسمو استروجين ودا بيعزز نمو الشعر جدا جدا .. ودا هو زاتو الهرمون الي بيرتفع كتييير اثناء الحمل عشان كدا الاغلبيه شعرهم بيطووووول وبيغزر وبيبقا حلو جدا اثناء الحمل وب مجرد الوحده ما تولد او بعد تطلع من النفاس بيبدا شعرها يقع ودا بيرجع لانخفاااض نسبه الاستروجين بعد الولاده وارتفاع التستستيرون وتبدا تدخل في نفسيات وتفتكر انو الموضوع خطير ..هو كلو لعب هرمونات و رد فعل طبيعي ..

دايما اتجنبو اي مستحضرات تجميليه للشعر زي الصبغات او العلاج بالكيراتين والبروتين في الاسبوع القبل وقت الدوره الشهريه مباشره(دا طبعا بالنسبه للناس الي دورتهم منتظمه وعارفين مواعيدها) لييييه يا كتكوت ؟؟ لان الاسبوع دا او الفتره الي بنسميها PMS بتكون فيها الترويه الدمويه عاليه جدا لكل الجسم بالذات الفروه.. ف لو استخدمتي اي مستحضرات ح تضري فروه رأسك شديد.. عكس لو استعملتي فيها الزيوت الطبيعيه والماسكات الصحيه ح تستفيدي جدا لنفس ذات السبب..

لما تكوني بتصبغي شعرك او بتعملي كيراتين او بروتين وبديتي تحسي بوخزات حاده في الفروه اثناء وصع المستحضر  تأكدي ان فروه راسك معناها جافه جدا وحالتها صعبه وح تسوء اكتر واكتر بعد الصبغ والفرد دا غير انو ح يجيك قشره اكيد بعد الحاجات دي وشعرك ح يتساقط لانو البصيلات ح تكون اتضربت اكيد..
فما تلومي المستحضر طالما انتي اصلا ما اهتميتي بفروه راسك ورطبتيها زي ما بترطبي وشك اوكي..

لما تكوني بتغسلي شعرك ومستمتعه وبتغني تحت الدش رجاءآ ما تفركي فروتك ب ظفورك .. كفايه جدا جدا اطراف الاصابع عشان ما تهردي البصيلات المهروده خلقه وبتكون قاعده على الهبشه.. الظفر حاد جدا جدا على الفروه وعلى بصيلات الشعر.. ويمكن ما تحسي انتي بالحاجه دي وتتخيلي انو مقدار الاذى الممكن يحصل بيساوى مقدار الالم البتحسيه لكن دا طبعا لو انتي والشعره مخلوقات متكافئه

الناس الي عندها راي في البلسم بالله تعالو هنا على جنب و وروني ليه ؟؟ مشكلتكم معاه شنو ؟؟ وليه الاشاعات المغرضه البتطلعوها عليه ؟؟
هو اسمو بلللسسسسم بلسم ياخي .. زيو زي مرطب وشك وقيسي على كدا..
طالما انو خالي من السيلكون والسلفات والبارابين تأكدي انو حيكون اضافه رائعه للحمام ولازم تعمليه على الفروه وترطبيها ولحد اطراف الشعر تعمليه…

في TIPS كتيره بخصوص الشعر ولو حاولت اتكلم عنها كلها ما ح اقدر اخلصها.. عشان كدا كل مره ناخد كم وحده ونذكرها عشان زاتو مخكم ما يجوط وتستوعبو كويس وتقدرو تطبقو وتستفيدو..

يلا عاوزه اتكلم عن حاجتين انا بستعملهم مرتين في الاسبوع ودي هي المرات البغسل فيها شعري .. مع العلم ان شعري عادي ولا هو جاف ولا هو دهني ..

☝الحاجه الاولى البعملها هي اني بغسل شعري وبدعك فروه راسي قبل الاستحمام والغسيل بالشامبو ب مويه الرز المخمر..
طريقه تحضيرو..
بتجيبي كبايه رز وتنقعيها في مويه بدون غسل.. وتخليها دقايق لحد ما المويه لونها يتغير شويه.. تقومي تصفي الرز وتكبي المويه دي وتنقعيه تاني في كبايتين مويه وتخليه منقوع لحد ما يتحول لون المويه ل اللون الابيض.. وتصفيه في برطمان قزاز وتزيدي على البرطمان ملعقتين من الرز الكان منقوع  وتخليه في الثلاجه 3 ايام ..

وقت الحمام بتاخدي المويه و تحطي عليها ملعقتين زيت جوجوبا( ممكن زيت جوز هند او ارغان او سمسم)  وتعملي بيها مساج لفروه الراس وتغسلي بيها شعرك كلو وتدعكيه كويس جدا لحد اطرافو..بعد دا تبدي تغسلي شعرك بالشامبو( ح نتكلم عنو ف الاخر)
بجد حاسه اني مهما اتكلمت عن مفعول مويه الرز المخمر على الشعر ما ح اقدر اوصل فوائدها..
زمان كنت بسمع عنها لكن ما حصل فكرت اجربها لاني كنت مكتفيه بالمستحضرات الخاليه من الكيماويات وخلاص .. لحد ما كلمتني عنها ممرضه من اندونيسيا شغاله معاي( بعد ماشفت شعرها طبعا) ..
قامت ونستني بأسطوره مويه الرز المخمر ..
وقمت اقتنعت وبديت اجربها ..
انا من النوع الصبور.. بصبر على الحاجه لحد ما اشوف اخرها .. ما بحكم من اول او تاني استعمال .. لكن بالجد مويه الرز طلعت تستاهل التعب لانها بتغذي الشعر وبتعالجو من مشاكل كتيره  وبتديه لمعه حلوه جدا والنتايج بتظهر من بعد الاسبوع التاني لو عملتيه مرتين في الاسبوع..

لما بحثت وفتشت انو ليه الرز بيدي المفعول دا .. طلع انو فيه ماده اسمها pitera موجوده في الرز .. والماده دي زي الڤايتمين وظيفتها انها بتعيد بناء الخلايا المتضرره .. عشان كدا شركه pitera التجميليه اسعارهم فوق السحاب وتلقي علبه الكريم او السيروم عندهم فوق ال 600 ريال ..اتاريهم شغالين بالرز بس .. طبعا الرز ومويه الرز لو دخلنا في فوائدهم للبشره ما حنلحق نكمل موضوعنا .. لكن اوعدكم اكلمكم عن الحته دي في مناسبه سعيده

الزبده يا حلوين انو مويه الرز من الليله تمشو تجهزوها وحطوها في التلاجه عشان تتخمر وتبدو تستعملوها.. اعملوها مرتين في الاسبوع ..

نجي للشامبو الي بستعملو لي فتره ما طويله لكن حبيت اجربو عشان يكون في خيارات متاحه بأسعار مناسبه للجميع..
في العاده انا من بعد ولادتي واصلت في مجموعه المكاديميا الكنت اتكلمت عنها قبل كدا .. ونفعت معاي كتير.. بس طبعا لازم الواحد يجرب حاجات تانيه ..
اخترت المره دي من بودي شوب شامبو وبلسم وماسك العسل.. هي مجموعه للشعر الجاف والمعالج ..
بعد ما بغسل شعري ب مويه الرز برجع اغسلو بالشامبو ..
اسم الشامبو
Rainforest Moisture Shampoo

الي لفت نظري ليه انو مكتوب بالخط العريض انو خالي من السيلكون والسلفات والملونات والبارابين.. يعني عز الطلب..
دا غير سعرو المناسب الي تقريبا ٣٥ ريال ..
اول ما حطيتو على شعري ما حسيت انو بيرغي كتير ودا اكبر دليل على انو فعلا خالي من السلفات الي هي اساسا سبب الرغوه المبالغ فيها في اي شامبو تجاري..
ريحتو حلوه ومنعشه ..
ولاحظت برضو انو ما بيدي الشعر الاحساس بالنعومه البنحسو عاده بعد استعمال الشامو التجاري..ودا طبعا اكبر دليل على انو خالي فعلا من السيلكون..
وبعد ما اغسلو شعري بيكون ما بين وبين.. يعني ولا هو جاف شديد من الغسيل ولا بيلزق..
بعمل بعدو طوالي البلسم وبمسحو على فروه راسي لحد اطراف الشعر ..وبعد دا بغسلو وابدا احط الماسك من نفس المجموعه..
الماسك بخليه على شعري ٥ دقايق وبوزعو على الشعر كلو كويس وبعد دا بشطفو بمويه فاتره..

يتبع……..

و دمتم في نووور

عن الكاتب

غادة كريم

ما قيل للورده حتى جعلها تتفتح.. يشبه ما قيل لي حين صرت انثى مغرمه بالجمال..في مدونتي اهتم بجمال الروح وحياه القلب واشارككم شيئا من رسائل الحياه..