مفضلتي

تجرتي لبعض منتجات فيس شوب

الــمدونه غادة كريم

#روتيني_للعنايه_الليليه_قبل_النوم

سا الخييييير🙋
دا روتين عنايه اتبعتو الشهر الي فات ( شهر كاااامل بالتمام والكمال )
المنتجات كلها من the Face shop
اول مره اتعامل معاهم واول مره اجرب حاجاتهم ..

🕵اول منتج والي وقعت في غرامو و ح اواصل فيه حتى الشهر الجاي هو white seed وايت سيد بيور فايتمين سي مركز جدا تركيزو ١٠٪ بيجي في شكل انبوب صغنون طولو ما اكتر من ٦ سم وفيه ١٢ ملل ..
بعمل كالاتي :-
بعد ما اغسل وشي كويس ( بستعمل فرشه لغسيل الوجه عشان اتاكد انو نضف تماما ) مع غسول معادل لحموضه البشره..
بخليه ينشف لوحدو بدون ما انشفو وبعد دا بمسح طبقه خفيييفه جدا جدا على وشي .. ( هو مكتوب عليه انو يتحط ب تركيز على اماكن التصبغات وانا ما عندي تصبغات عشان كدا بمسح على كامل الوجه طبقه خفيفه جدا والكميه ما بتتعدا حجم حبه بازلاء )
قوامو ما بين الكريم والسيروم ولونو اصفر وما بيخلي اي اثر دهني وراه ولا كأنك ماسحع حاجه.. اول ما تحطيه بتحسي بوخزات ( بالنسبه لي كانت خفيفه ) وبتستمر من ١٥ ل ٣٠ دقيقه بعد دا ما بتحسي ب حاجه ..

🚩اول مره حطيتو وصحيت الصباح كنت بجد متشوقه اشوف وشي ف المرايه لان عندي قناعه اي حاجه بتعمل وخز جلدي اول ما تحطيها فهي شغاله في واحد من الاتجاهين يا اما شغل نضيف وتحفيز للكولاجين يا اما تحسس وتهيج للبشره .. وانا حاسه بالوخزات وقلت لازم اكمل التجربه لان الريفيوز عنو ممتازه وما حسيت انو ح يخذلني.. وفعلا صحيت الصباح وشي نضر جدا ( اييوووه من اول استخدام ) وفيه حياااه كاني ماسحه بي بي خفييييف ..
مع العلم ان انا بشرتي اصلا معتناه يعني بقشر بشكل دوري بالدفرين وبعمل ماسكات بانتظام وبعمل ديرمارولر مرتين في الشهر فا بالنسبه لي تجربتو كانت على مستوى النضاره لكن الريفيوز عنو كلها بتأيد انو مزيل للتصبغات من الدرجه الاولى..
اهم حاجه لما تستعملوه انكم ما تعملوه بالنهار وخلوه بس وقت النوم.. واوعو اوعو اووووعو تلخبطوهو مع اي كريم تاني وتتمسحو بيه ابدا ما بينفع..
بالنسبه لي المنتج دا بديه ٩ من ١٠
الواحد خصمتو لان كميتو بسيطه جدا وسعرو قد يكون غالي للبعض مقارنه ب كميتو..
سعرو تقريبا ٩٠ ريال من المحل مباشره لكن على امازون ارخص بكتير.. تقريبا ١٥ دولار..
🕵المنتج التاني برضو من فيس شوب عباره عن محلول لعلاج الحبوب clear away spot
عباره عن حمض سالساليك مخفض وكالامين مع نسبه كحول بيجي على شكل بودره محلوله جوا ماده كحوليه مثبته .. حتى مكتوب على العلبه من بره انو ما ترجيها عشان ما يتخلط مع بعض ، بيكون طول الوقت مفصول لطبقتين ..
طريقه استعمالوا بتاخدي عود قطن ( اعواد تنظيف الاذن ) وتغمسي العود لحد ما تصلي للبودره الي تحت وتسحبي العود.. وتنقطي فقط على الحبوب العندك..
( عندي حبه بتطلع لي وقت البيريود وكل مره بستعمل ليها حاجه وقلت اجرب دا برضو ) بعد ثالث استخدام بالضبط الحبه نشششففففت و وقعت براها بدون ترك اثر..
حلو جدا وعجبني وسعرو رخيص وبيقعد معاك فتره طوييييله .. سعرو ٦٥ ريال من المحل وفي امازون ١٠ دولار..
فيهو ١٨ ملل..
🕵الحاجه الثالثه هي زبده الشيا لليد والاقدام..
كل فتره بجرب زبده شيا من شركه مختلفه وبيتفاوتو صراحه في نسبه الجوده والترطيب ..
زبده الشيا من فيس شوب الحلو فيها انها ما بتخلي اثر دهني ابدا ابدا ابدا.. معالجنها بطريقه ممتازه وحلو لي مشكله مسكه الموبايل وانتي على السرير بعد ما تتمسحي خلاص وبتكوني عاوزه تعملي اي حاجه بالموبايل.. مافي اي احساس دهني ولا حاجه بتلزق ولا حاجه بتدبق على الشاشه ومع دا ترطيبها ممتاز وريحتها نااااعمه ومريحه .. بمسح منها يديني و رجولي و برضو كنت بعمل منها تحت عيوني لكن بضيف ليها نقطتين من زيت جنين القمح ، مريحه للجلد تحت العين ومرطبه ومعالجه لمشاكل كتير..
عندهم برضو عبوه على شكل كريم عصار باخدها معاي الشغل ما قاعده استخدمها ف البيت ( قوامو اخف من زبده العلبه ومناسب للشغل ) ..
🕵برطب شفايفي ب زبده فيتامين اي ..ترطيبها ممتاز و بتناسبني جدا.. باخدها من talaby_shop
🚩دا روتين عنايتي ببشرتي قبل النوم طول الشهر الفات ( اغسطس ) وراضيه عن المنتجات الي استخدمتها تمام الرضى وحبيت اشارككم التجربه للعاوزه تجرب ..
تصبحو على خير 😘

تحياتي..
ودمتم في نوووور ❤

عن الكاتب

غادة كريم

ما قيل للورده حتى جعلها تتفتح.. يشبه ما قيل لي حين صرت انثى مغرمه بالجمال..في مدونتي اهتم بجمال الروح وحياه القلب واشارككم شيئا من رسائل الحياه..