ونسه ودردشة

ادرا كادابرا.. تعويذات الجمال

الــمدونه غادة كريم

جيبو كراسيكم وتعالو عاوزه اونسكم ???…
سمعتو قبل كدا عن التعويذات و السحر الكانو بيعملوه زمان عشان يبقوا سمحين ..
ايوه ايوه السحر الواحد دا ?

عاوزه تبقي جمييييله ?
ولا عاوزه الحبوب الفي وشك كلها تروووح ويبقى وشك صاااافي ?
طيب عاوزه التجاعيد تختفي من تحت عيونك وترجعي شبابك ?
عاوزه شعرك يبقى طويييل وناعم ?

كلوووو ممكن طبعا مع سحر وتعويذات الجمال?

جاده انا بطلو ضحك ?

?حتى كمان بيعملوها البنات من زمن الزمن وعلى مر العصور ..
وبيدفعو فيها قروش خياليه عشان ياخدو الطريقه من الساحره ..

يلا انا ح اديكم ليها ب بلاش بعتباري ساحره طيوبه وما عندي مقشاشه طايره بيها???

اشهر تعويذه جماليه كانت بتاعت حبوبتكم كليوبترا .. مجنونه المره دي ياخ .. بجد كانت تستاهل تكون ملكه?
كان عندها تعويذه فرعونيه بيعملا ليها الكاهن الاعظم وكبير السحره مخصوص ليها هي بس ..
وكان ما مسموح بأنو يبوح بسر التعويذه دي لاي كائن ولا حياتو كانت حتكون هي الثمن..
غايتو الله يرحمو ما عارفاه كلم منو و وصل لينا الشمار ..
المهم يلا جيبو ورقه وقلم وسجلو التعويذه دي..

?طبعا هي بتتكون من 113 ماده من عناصر نادره جدا و اجزاء مستئصله من اجساد عرافات .. ولازم تكون الخلطه محروسه بروح 14 ساحره عذراء ..
لاااازم تكون عذراء ?
ما تقلقو الحاجات دي كلها بتتباع اونلاين في موقع ح اديكم اسمو في الاخر .. بس مطلوب منك انك بعد ما تجيبي الخلطه تحطي فيها ٣ شعرات من شعر ابطك و ١٤ شعره من نص راسك او من حواجبك على كيفك .. بس انا بفضل تاخديها من راسك عشان ١٤ كتير صراحه من الحاجب ..
وتنقطي فيها ٧ دمعات من عينك الشمال ..
ماعارفه تبكي نفسك كيف غايتو لكن انا عاده بجهز بصله جنبي لزوم الدموع وكدا..
اخر حاجه بتحطي فيها جزء من ظفر اصبع رجلك الكبير .. حته صغيره بس لكن المهم من رجلك اليمين..
طبعا الحاجات دي بتكون كلها في حله كبيره على النار ولما تبدا تغلي كل المطلوب منك (لا لا ما تنطي جواها دقيقه ✋)
بس استنشقي البخار الطالع منها ? والغريب انو كل البخار بتحسيه ما بيتشتت يمين ويسار .. بيكون ماشي في اتجاه واحد كأنو مرسوم .. بمجرد ما تبدي تستنشقي بعمق بيبدا يدخل جواك ..
طبعا النتيجه بتكون فوريه عشان كدا خلي جنبك مرايه بس?

?التعويذه التانيه دي كمان قصه..
دي بتخليك تغيري لون شعرك حسب اللون البخطر على بالك بدون ما تصبغيه وتتعرضي للمخاطر بتاعت الصبغات ..
بتعمليها كالاتي :
لازم يكون يوم جمعه و القمر يكون بدر او شبه بدر ..
يعني عندكم الايام البيكون فيها القمر ظااااهر وكبير..
تاخدي بعضك وتمشي حته تكوني فيها برااااك على الاقل ربع ساعه .. تولعي ٣ شمعات لونهم احمر او برتقالي لكن رصيهم على شكل مثلث على الارض.. غمضي عيونك واتخيلي ان لون شعرك الحقيقي اختفى وبقى لونو ابييييض وكأن لونو الحقيقي قاعد بينزل منو ، يلا امسكي اطراف شعرك وكأنك بتمسكي اللون النازل منو وبتملي بيها يدينك ، برااااحه نزلي يدك بحيث تكون فوق الشموع وفتحي عيونك وركزي على اللهب الطالع من الشموع وانتي في قمه التركيز على اللهب ارفعي يدينك براحه على راسك وابدي امسحي على شعرك وانتي بتتخيلي اللون الي نفسك فيه بالضبط (عاوزه لون احمر او اشقر او بنفسجي او ذهبي .. اي لون بس اتخيليه انو بقا لون شعرك .. واثناء ما انتي بتمسحي على شعرك ومركزه على اللهب الطالع من الشموع.. رددي التعويذه دي :

?يا نار يا حمرا واحساسك دافي ..
اسحري لي شعر راسي ..
حركي لهيبك فوق وعالي .. وحولي اللون (قولي لون شعرك الحالي) ل (لون الشعر العاوزاه) ..
الامنيه دي امنيتي انا ..
وانتي الحاتحقيقيها لي ..?

انا غايتو ما جربتها لكن صحبتي جربتا وبقا شعرها نفس اللون الاتمنتو ..
صح يا Lubna Siddiq
دا بالنسبه للصبغه لكن لو عاوزه هايلايت ولا امبري ماعندي ليها تعويذه للاسف?

?في دي كمان تعويذه رهييييبه لحب الشباب ..
بتجيبي تفاحه حمرا ?(لازم حمرا)
واقطعيها نصين بشكل افقي .. لما تقطعيها بالتساوي حتشوفي شكل نجمه خماسيه..
ح تمسكي النص الاول من التفاحه وتبدي تفركي بيه وشك بالذات على الحبوب .. وانتي بتفركي لازم تقولي التعويذه دي :
يا تفاحه الملك ..
ايتها الروح الكامنه المقدسه..
يامن تملكين الحركات والبركات..
وعندك مفتاح الفلاح من مزارع التفاح ومنقذه الارواح ..
انقذيني من خجلي وافتحي لي باب الجمال..
بعد دا تاخدي تفاحه تانيه لكن تقطعيها بالطول وبرضو تبدي تفركيها على وشك بنفس الطريقه الفاتت وتقولي التعويذه دي :
يا تفاحه الملك..
ايتها الروح الكامنه المقدسه..
يامن تملكين الحركات والبركات..
وعندك مفتاح الفلاح من مزارع التفاح ومنقذه الارواح ..
ضاعفي جمالي ٧ اضعاف ..
لاااازم تتكلمو باللغه العربيه الفصحى (استيقظ وركز واصحى )
اي عليكم الله ما تخربو لينا التعويذ ?
بعد دا بتاخدي التفاحه الاولى وتدفنيها جنب اي شجره.. او حتى شتله ورد ما مشكله والتفاحه الثانيه بترميها في مويه جاريه .. في النيل مثلا ..اها ناس السودان لقينا ليكم حاجه عندكم وما عندنا هنا تاني عندكم كلام ?

واذا المكان الانتي فيه مافيه نهر( ناس السعوديه)  ممكن بس تدفنيها في اي مكان لكن تصبي عليها مويه كتييييييره ..
وطبعا ما تنسي مرايتك تكون معاك عشان زي ما قلنا .. المفعول فوري وبتشوفي النتيجه علطول..

عليكم الله مش اسهل من برنامج دفرين وادابالين واكرتين ..
تفااااحه بس تحل ليكم مشاكل الحبوب كلها..
وكمان ازيدكم من الشعر بيت..
اي تعويذه طبعا ممكن تقلبيها على اي زول بتكرهيه..يعني ممكن الحبوب الفي وشك دي تكبيها في وش وحده بتكرهيها ???
غايتو انا عندي زي ١٣ وحده كدا عذبتهم معاي ???

سحر سحر ??

?يحليلكم.. سرحت بيكم صح ..
والله الجمال مامحتاج ل دا كلو..
لكن البنات مستعدين يعملو اي شي في مقابل الجمال والنضاره والرونق والنعومه..
القصص الفاتت دي كلها مذكوره حقيقي في كتب السحر الي اتكلمو عنها المؤرخين بالذات اليونانين والرومان وقدماء المصريين ..حتى في زمن العصور الوسطى اتسجلت احداث بتحكي عن شغف المرأه بالجمال و عن طقوس وصلوات وتضرع لمقامات في سبيل انهم يكونو جذابين وشكلهم جميل..
والفكره في حد ذاتها ما غريبه ابدا لان الناس كلها بالذات الجنس اللطيف عندهم رغبه ربنا خلقها جواهم بحب الجمال والسعي ليه بأي طريقه ..
لكن كل عصر وليه ظروفو ..
عصورهم كانت بدائيه وما كان بيدهم حيله غير السحر والشعوذه ..وحتى وان كان في عندهم خلطات للجمال كانت بتكون مقتصره على الاميرات والملكات ومحرمه على عامه الشعب ..
زي كليوباترا الكانت بتستحما باللبن..
او ماري انطوانيت الجميله..
بالله فتشو في قوقل عن قصتها وجمالها وكانت بتعمل شنو في روحها المره دي عشان تفضل جميله .. مبالغه ح تعجبكم قصتها شديد..
(ما ح احكيها هنا لان البوست ح يبقى دشلميه سطر) ..

الزمن اتطور وبقا في ميك اب وعدسات وكريمات وعمليات ومناكير وصبغات والوان واشكال ودنيا بحالها.. خلت اليونان زي الرومان زي المصريين زي السودانيين زي العرب زي الهنود.. كلووووو بجره مكياج بيبقا حلوووو…

?هل فعلا لازم نؤمن بتعويذات الجمال ؟؟
لا طبعآ ما لازم نؤمن بيها حتى ولو كانت حقيقه في وقتها..
لكن نؤمن ان الحاجات الطبيعيه قوتها اكبر بكتير من السحر ..
حتى وان كان السحر دا عباره عن تركيبه جوا علبه من مستحضرات التجميل والمكياج ومن اشهر الشركات والمعامل العالميه..
?طول عمري بحب اعرف تركيب الحاجه البستعملا عشان افهم هي شغاله كيف وعلى شنو بالضبط..

?يعني مثلا شجره الويتش هازل او شاي الويتش هازل نوع من انواع الشاي الاخضر .. معروف انو مويتها بتضيق مسام البشره عشان مليانه ب حمض اسمو حمض التانيك ..
عشان كدا بيدخل في صناعه مستحضرات كتيره بتضيق المسام وبتعالج من الهالات ..
اها بالله سحر دا ولا ما سحر يا متعلمين يا بتوع المدارس ؟؟

?كمان التفاح معروف انو بيشيل وبيخفف من حب الشباب .. مش عشان قلنا يا تفاحه الملك.. ويا ايتها الروح المقدسه..
لا، عشان التفاح فيه تراكيز عاليه جدا من ماده البكتين و من معززات المناعه ومضادات الاكسده .. ولو بدينا نتكلم عن التفاح ف احسن نتكلم عن ماري انطوانيت لان موضوعها اقصر من موضوع التفاح?

?الكركم مثلا.. ليييه بيعتبروه مضاد للشيخوخه وبيدخل في تركيب معظم الكريمات المضاده للتجاعيد والتقدم في العمر ؟؟
لانو عامل مؤكسد ولا اروع.. وقوي جدا جدا جدا ..
(بالمناسبه .. الكركم شربو احسن مليون مره من انك تتمسحي بيه )
ذكروني اوريكم خلطه عصير الكركم في احد الايام السعيده اوكي .. وبتنقص الوزن كمان .. (عشان تفضلو تزنو على راسي?)

?الزبده من كلامي دا كلو يا حلوين انو خلينا نشغل مخنا ونفهم صح.. نخلي عندنا اساس علمي قوي للحاجات الحوالينا عشان نقدر نسخرها لصالحنا ونتعامل معاها بفهم عالي..

?بعد كلامي دا كلو .. ياترى لسا بتؤمنو بتعويذات الجمال والسحر.. لسا بتؤمنو بالعرافات والساحرات الحيخلو جمالكم ٧ اضعاف !! هل ح تجربو على نفسكم التعويذات دي كلها وتنتظرو القمر يبقا بدر ؟؟
ولا ح تبدو تشغلو مخكم وتطلعو اكتر وتتثقفو اكتر وتبقو ساحرات انفسكم وملهميها ?

تحياتي..
ودمتم في نووور

عن الكاتب

غادة كريم

ما قيل للورده حتى جعلها تتفتح.. يشبه ما قيل لي حين صرت انثى مغرمه بالجمال..في مدونتي اهتم بجمال الروح وحياه القلب واشارككم شيئا من رسائل الحياه..