مفضلتي

تـجربتي لـمجموعه إن لايتن الــكوريه

الــمدونه غادة كريم

نهاركم سعيد..

موضوعنا اليوم عن واحد من مستحضرات التجميل الكوريه الي عملت ضجه كبيره الفتره الفاتت .. الي هو كريم إن لايتن كلاود..وح اتكلم برضو عن كذا منتج من نفس المجوعه ..

مستحضرات التجميل الكوريه عموما غزت العالم بشكل لطيف.. وبقا عندها قاعده جماهيريه في العالم العربي ورواج كبير..
ودا طبعا راجع لاسعارهم الي تعتبر ارخص بكتير من السوق الاوربيه والامريكيه وإن كانت لا تقل جوده ابدا عنهم ..
وبرضو راجع لتصدير الدراما الكوريه للعالم العربي في الفتره الفاتت بشكل ملفت للنظر وبقت بتنافس الدراما التركيه الي تربعت على العرش طيله السنوات الفاتت..
والكل متفق على حاجه وحده في المسلسلات الكوريه بغض النظر عن محتوى المسلسل والحبكه الدراميه وهي انو الناس دي بشرتها بتشع نضاره وشباب.. بشكل غريب وملفت للنظر..
🌸حاتكلم عن مجموعه NLIGHTEN كل منتج على حدا ، ورأيي فيه..
ح ابدا ب كريم كلاود cloud cream ..
كريم للوجه..

PicsArt_06-25-11.23.07
اسمو كريم السحاب .. ماعارفه مسمينو كدا ليه لكت غالبا لان شكلو فعلا زي السحاب .. لما تفتحي العلبه وتشوفي ملمسو ح تعرفي سبب التسميه ..
مفعولو بيدي تفتيح فوري اول ما تمسحيه على بشرتك ..
الجميل فيه انو خالي تماما من اي احساس دهني او دبق .. وبيخلي الجلد شكلو صحي ونضر من اول استخدام..
مكوناتو كلها طبيعيه وامنه.. معتمد على النياسيناميد الي هو فيتامين ب٣ .. وخلاصه الرز وبروتين الحليب .. والثلاثه ديل بيساهمو في المحافظه على البشره من البقع الغامقه واي تصبغات لانو بيساعد على الحد من افراز صبغه الميلانين ..
ودا غير انو فيه واقي وبيمنع من الاشعه الضاره.. يعني ممكن تعمليه برضو الصباح وتطلعي بيه عادي وح يديك نضاره ومظهر حيوي..
خالي تماما من البارابين والزيوت المعدنيه والتالك والاصباغ الصناعيه والبينزوفينون..
تقيمي ليه ممتاز ويستاهل سعرو ..
عيبو انو غير متوفر في الاسواق بيتباع اونلاين من موقعهم وسعرو تقريبا ٤٥ دولار ..

🌸المنتج الثاني هو غسول فقاعات الاوكسجين ..

PicsArt_06-25-11.24.32
جميل جدا جدا جدا..
وعموما الغسولات الي داخل في تركيبها مركبات الاوكسجين وانزيمات.. دي تشتريها وانتي مغمضه و واثقه من نتيجتها.. لانها بتنفع لكل انواع البشره ..
طريقه استعمال الغسول كالاتي :-
بتاخدي الكميه المناسبه على يدك ( تقريبا ٣ ضغطات) وتمديها على بشرتك وهي جافه.. يعني ما ترطبي بمويه ابدا.. بعد ثواني حتبدي تلاحظي تكون فقاعات الاوكسجين وتبدي تحسي بدغدغه على بشرتك.. لانو بيعمل تقشير خفييييف وبيعيد تجديد البشره .. بتخليه دقيقه كامله على وجهك و بعد دا بتغسليه باالمويه عادي..
برضو تقيمي له ممتاز جدا ويستاهل سعرو..
سعرو برضو في حدود ال ٤٥ دولار..
🌸المنتج الثالث من المجموعه هو كريم الجسم..

PicsArt_06-25-11.21.32
الكريم دا كا مركب وكا تكوين ممتاز جدا..
داخل في تركيبو برضو النياسيناميد و جل الصبار و كميه من الفيتلمينات ومستخلصات الفواكه ..
بيرطب البشره وبيديها ملمس حريري..
لكن مشكلتو انو برضو بيعمل تبييض فوري ..
يعني فورا بتحسي انو لون بشرتك اتغير وبقا فاااتح.. وهي طبعا ما بتعتبر مشكله ابدا لذوات البشره الي اصلا فاتحه.. لكن المشكله لصاحبات البشره الغامقه..لان التفتيح الفوري دا بيقلب معاهم على لون شاحب او رمادي ..
فا الي ح يحبوه ويقعو في غرامو الي اصلا بشرتهم فاتحه.. لانو بيديك احساس توحيد اللون بعد ما تمسحيه وكأنك عملتي لجسمك فاونديشن رهيب..
الجميل فيه انو بمجرد ما تمسحيه فورا بتمتصو البشره وما بيترك اي اثر دهني ولا كأنك ماسحه حاجه.. بيفضل منو فقط الاحساس الحريري واللون ..
طبعا ما تخافو من التفتيح الفوري وتفتكرو انو فيه مواد ضاره.. ابدا دا كلو بسبب دخول ماده تيتانيوم اوكسيد فيه مع مواد تانيه من نفس القبيله ودي نفس المواد الي داخله في تركيب واقيات الشمس الفيزيائيه.. ومامنها اي خطوره ابدا..
يعني من مميزات الكريم دا انو بيعتبر كمان واقي رهيب من اشعه الشمس..
نصيحتي كالاتي بخصوص الكريم دا :-
لو بشرتك فاتحه واصلا معتناه وناعمه جيبيه و ح ينفع معاك جدا.. بالذات للطلعات والمناسبات ح يوحد لونك يديك الملمس الحريري..
شايفين الفرق واضح كيف في الصوره..

PicsArt_06-25-10.11.03
انا شخصيا بستعملو لما اكون عندي تصوير او مناسبه..
حلو جدا للناس الي شغالين في الميديا عموما..
لانو زي ما قلت نضيف.. وما بيدي اي احساس دهني وما بيصبغ على الملابس نهائيا.. وثباتو قوي لدرجه عاليه.. وبيدي اللون الانتي عاوزاه وبيعكس كويس جدا على الشاشه او في الصور الاحترافيه..
والحلو فيه كمان انو ما بيطلع بالغسيل العادي. الا تغسليه بليفه او سكرب عشان يطلع.. يعني ما تخافي وتفتكري نفسك ماسحه فاونديشن..
اما لو بشرتك غامقه ما بنصحك تشتريه ابدا ابدا..
برضو سعرو تقريبا ٥٠ دولار..
🌸المنتج الرابع من المجموعه دي هو ال سي سي كريم..

PicsArt_06-25-11.17.48
دا بالجد عباره عن سحر..
من اجمل اجمل السي سي كريم الي استعملتها.. فكرتو كمان جديده وغريبه.. لانو تعليبو حلو جدا.. ومضاف ليه مويه عشان يسهل مدو وامتصاصو..
ترطيبو وتغطيتو عاليه وفيه واقي بنسبه ٥٠ لعامل الوقايه من الشمس..
وفعلا بيدي في النهايه مظهر فلوليس للبشره ونعومه..
وخالي تماما من المواد الضاره.. البارابين والتالك والزيوت المعدنيه..
الجميل فيه انو درجه واحده وبتناسب كل انواع ودرجات البشره..

PicsArt_06-25-11.19.27
سعرو برضو ٥٠ دولار..

 

برضو في تبع المجموعه صابونه مركبه منفيتامين ب٣ الي هو النياسيناميد ومجموعه فيتامينات تانيه ومضادات التهاب.. انا بصراحه ما استعملتها.. سعرها ٧ دولار

PicsArt_06-25-11.16.06

طبعا الاسعار دي من الموقع بتاعهم . لانو زي ما قلت عيب المجموعه دي انها ما بتباع في الاسواق وغير متوفره الا اونلاين..

وعموما اغلب الحاجات الكويسه صعب تتلقي في السوق .. و بتتباع اونلاين.. الا الماركات العالميه طبعا..
ولازم تتاكدو لو اشتريتو من موقع وسيط انكم بتاخدو المنتج الاصلي ومافيه اي تلاعب..
الحاجه دي بتتعرف من التعليب..
تعليب منتجات إن لايتن فخم جدا وانيق .. وصعب التقليد فيه.. لو جاتك العبوه بلاستيك اعرفي انها تقليد..

دا موقعهم الاصلي

http://www.thealphanetworld.com

وطبعا الناس الي في الخليج والي عندهم اي احتكاك بالشعب الفلبيني ح يكون ساهل جدا انهم يوصو عليه من بره عن طريقهم..

تحياتي

ودمتم في نووور

عن الكاتب

غادة كريم

ما قيل للورده حتى جعلها تتفتح.. يشبه ما قيل لي حين صرت انثى مغرمه بالجمال..في مدونتي اهتم بجمال الروح وحياه القلب واشارككم شيئا من رسائل الحياه..