ونسه ودردشة

خلو اولادكم يختارو طريقهم

خلو اولادكم يختارو طريقهم
الــمدونه غادة كريم

#ونسه
مع العيد والزيارات والقصص والحكايات وفي اثناء ونسه مسائيه سألت من بنت وحده قريبتنا وكيفها مع الجامعه والجري والسودان..
فوجئت بالاجابه بانها لسا في سنه اولى ( طب ) !!!!
مع العلم انها خشت الجامعه ليها ٣ سنوات تقريبا. ومع العلم انها كانت من المتفوقين ايام المدرسه..
استغربت وسألت ليه والحاصل شنو ؟؟
اتصدمت جدا لما عرفت انو اصلا الطب ما رغبتها وانها دخلت الكليه دي تحت ضغط من امها !!
وان امها الله يهديها مازالت مصره انها تواصل في دراستو حتى بعد ما شافت بعيونها واتاكدت انو الموضوع دا ما راكب في راسها و ما بتحبوووو ما بتحبو ياخ بدليل انها ٣ سنوات بتعيد وتزيد في سنه اولى وبتضيع في عمرها لكن الأم مصرررره انها تبقى دكتووووره !!!!!!!!!!!!
والي زعلني زياده ان البنت بتجي تبببببكي للزوله البتحكي لينا وتقول ليها انا ما عاوزه اقرا طب ما بحبو وماقادره استوعبو لكن امي مصررره!!!!!
تبقى دكتوره زي بت فلان…
تبقى دكتوره زي بنت علان..
تبقى دكتوره زي بنت الجيران …
تبقى دكتوره زي وزي وزي …….
ومافي اي اعتبار لانو المخلوقه دي عاوزه تبقى نفسها وبس وما عاوزه تدرس حاجه غصب عنها عشان تبقى زي زول …
اتفتحت بعد دا مليون قصه وقصه عن مأسي بنفس الشكل.. وكميه من الاولاد والبنات الي امهاتهم وابائهم بيجبروهم على دراسه تخصص معين لارضاء طموحهم الشخصي في ان ولدو او بنتو يبقى
(( زي ولد فلان )) …!!
والنتيجه عمرها ما ح تطلع عن واحده من الحاجات دي ..
☝يا اما حصل فشل ذريع زي ما حاصل مع قريبتنا وضياع سنين ونفسيات واكتئاب..
✌يا اما ح يواصل ويتخرج من حاجه هو ما بيحبها ويشتغل في مجال ما بيحبو ويكره عمرو بسببو..
👌يا اما اخد الشهاده واداها ليك تعلقيها في الحيطه ومشا يشوف شغلتو وحاجاتو البيحبها بعد ما ارضى رغبه اهلو وضيع سنين من عمرو…

ليه ياخ !!
ليه الاسلوب دا …
ليه ما نخلي اولادنا يختارو مجالهم بنفسهم..
ليه نجبرهم على دراسه ما بيحبوها..
هل المهم عندي المظهر الاجتماعي وان ولدي او بتي بتقرا في الكليه الفلانيه ورفعت راسي قدام فلانه وعلانه وفلتكانه .. ولا المهم اراعي لاولادي هل دخلو الحاجه البيحبوها ومرتاحين فيها وح يبدعو فيها بغض النظر عن هي كليه شنو ؟؟
ليه ما نخليهم يختارو هم عاوزين شنو.. وحتى لو اختياراتهم من وجهه نظركم غلط.. كل المطلوب منكم انكم توجهوهم وتتكلمو معاهم بالمنطق والعقل.. ديل خلاص بقو ناس كبار وماشين يستقلو بحياتهم سواء في دول تانيه للدراسه او في داخليات او غيرو.. ناس ح يكونو مسؤولين من نفسهم ومن تصرفاتهم ومن حياتهم.. ليه ما تخلوهم مسؤولين من قراراتهم واختياراتهم.. لان لو حتى اختارو غلط لكن كان اختيار من قرارهم هم ح يتعلمو منو والعتره بتصلح المشي .. لكن لما يكون من الاول ما قرارهم .. صدقوني ح تدخلكم في متاهات كتيره.. اولها تحميلكم مسؤوليه كل الي ح يحصل وتبعاتو مهما كانت النتيجه..
في حاجه انا لاحظتها عند المغتريبن عموما..!!
عندهم هوس اسمو (طب) !!
دقيقه بس !!
عاوزه افهم حاجه.. هل دراسه الطب هي التاكيد الوحيد انك خلفت وربيت ؟؟؟؟؟؟؟؟؟؟؟؟؟؟
هل دراسه الطب هي الدليل الوحيد ان اولادك رفعو راسك ؟؟؟؟؟؟؟؟؟؟
انا ما عاوزه ادخل في نقاشات عن الكليه الفلانيه والعلانيه لكن كل الي عارفاه ان كليه الطب دي زاتها من مدخل الباب في حرس درسو مجالهم كانو بيحرسو الكليه ..
في مكاتب الاداره الي بتدير الكليه كللللها فيها ناس درسو اداره اعمال وسكرتاريه وترجمه وعلاقات عامه ومحاسبه وماليه ومليون مجال..
الاساتذه والدكاتره البيدرسو الطلبه في كليه ( الطب ) عشان يبقو دكاتره .. فيهم الصيادله والكيميائين وناس الاحياء والتشريح ..
في الكليه برضو في مرحله من مراحل الدراسه درسنا اللغه العربيه والقران ..
في المعامل بيتعلمو على ايدي فنيين خبراء في مجالهم..
بعد ما تتخرج وتشتغل في مستشفى ح تكتشف انك جزء من منظوووومه كامله.. اي خلل في اي مكان بيخلي وجودك زي عدمو..
يعني ما الدكتور هو محور الكون زي ما متصور ..
غايتو في المستشفى الي انا شغاله فيه.. لو التمريض ما قرر نبدا المرور مافي زول بيمر..
لو ناس التغذيه ما مرو و وزعو الاكل على العيانين الصباح مافي تمريض ح يخليك تمر ..
لو ناس النظافه ما نظفو المكان وهيئوه ناس التغذيه ما بيقدرو يمرو..
وبعد دا لو كلوووو جاهز وجيت لقيت الكمبيوتر عطلان.. كلو بيقيف لحد ما الباشا الكبير ( ناس الأي تي ) يجو ..
كلو نظاااام واحد ومافي زول احسن من زول..
يعني دراسه الطب زيها زي اي دراسه وما مقياس لاي حاجه الا داخل نفسيه الاباء من واقع مفاهيم قديمه جدا ومحتاجه يتنفض عنها الغبار..
🌷توجهيكم لابنائكم ما مفروض يكون انو ادرس دا ولا دا احسن ولا دا غصب.. التوجيه مفروض يكون في فكره الدراسه وتطوير الذات في المجال الي هم يختاروه والتفوق فيه..
خليكم دايما داعميين ايجابيين وليس داعمين سلبيين .. وشتان بين هذا وذاك..
ما تحققو احلامكم انتو في ابنائكم وخليهم هم يحققو احلامهم ويعيشوها
خلي احلامكم فيهم حدودها واسعه وما تربطوها ب مجال معين لازم ابنك يدرسو عشان انت ترتاح ! لا لازم هم الي يرتاحو..
اتناقشو معاهم و وجهوهم لكن ما تجبروهم وتغصبوهم وبراحه بدون ما تحسو بتكونو بتدمروهم..
الدراسه اصلا الزمن دا ومع كل الانفتاح الحاصل والتكنلوجيا ومشاغل الحياه بالذات للشباب بقت صعبه صعبه صعبه وزيها زي الدين.. كالقابض على جمر..
فما تبقو انتو والزمن عليهم.. مدام قررو انهم يقرو ويكملو جامعه خليهم يقرو الحاجه الهم عاوزنها مش الي نسبتهم بتدخلهم فيها.. مش عشان الوحده جابت ٩٩٪ معناها غصب وكسر رقبه تقرا طب ولا كهربا.. ياخي يمكن بتحب ترسم وعاوزه تدخل فنون.. ما تنطو في راسها وتقولو ليها حراااااام تضيعي النسبه الرهيبه دي .!!!! اكس كيوز مي ✋ الحرام انها تتحرم من حاجه بتحبها بس عشان جابت نسبه عاليه ..
#خلو_اولادكم_يختارو_طريقهم

تحياتي
ودمتم في نووور

عن الكاتب

غادة كريم

ما قيل للورده حتى جعلها تتفتح.. يشبه ما قيل لي حين صرت انثى مغرمه بالجمال..في مدونتي اهتم بجمال الروح وحياه القلب واشارككم شيئا من رسائل الحياه..