ونسه ودردشة

ذكريـــات

الــمدونه غادة كريم

كتير بتجي علينا اوقات بنكون حاسين بنوع من الوحده .. حتى لو الدنيا كلها حوالينا .. من جوا بنكون محتاجين شخص واحد بس نكون معاه ..سواء امك ، ابوك ،زوجك ، ابنك ،اخوك او اختك صديق او زميل او حتى مجرد حيوان اليف(قط او كلب)  اعتدتي وجوده في حياتك..
ويمكن يكون الزمن حكم عليك ببعد الشخص دا عنك سواء بسفر في الدنيا او سفر لجنه الله?
بتاخدنا سفينه الذكريات الحلوه معاهم ممكن تكون مصحوبه بدمعات الفقد والدعاء.. او ابتسامات الشوق وامل اللقاء..
او مجرد استرجاع لذكريات حلوه لاشخاص متواجدين يوميا في حياتك..
من رأيي احسن اختراع في الدنيا دي هو الكاميرا ?
لما تطلعي البوم صور قديم وتعيشي الذكرى في نفس اللحظه بتحسي بطاقه ايجابيه غريبه.. بتتحول من قمه الضعف الكنتي فيه لقمه الرضا ..
حتى لو بنتفرج على صور لاشخاص ربنا بعدهم عنا للابد يمكن تكوني بتبكي طول ما انتي بتتفرجي على الصور.. بس احساس جميل انك اصلا شايفه صورتو وبتفتكريه وبتدعي ليه وممكن تشيري صورتو وتخلي كل العندك لما يشوفوه يدعو ليه?
لو زوجك مسافر سفره طويله شويه وطلعتي البومك في اي ليله واتفرجتي على صوركم سوا ولحظاتكم الحلوه ونهيتي ليلتك بمكالمه او مسج ليه .. صدقيني حتنامي سعيده وحتصحي بطاقه ايجابيه ?
ولو هو معاك وبس قعدتو اتفرجتو سوا حتحسي بتجديد وطاقه حلوه?
لو اختك او اخوك مسافرين وبعيدين منك ..صوركم وانتو اطفال حتجدد اي جفا حصل من البعد وحتلقي نفسك بتضحكي من جوا قلبك على اشكالكم ومواقفكم وانتو صغار?
توثيق المناسبات السعيده البنعيشها كل فتره.. اعراس.. اعياد ميلاد.. اعياد زواج.. تخريجات.. كرامات.. كلها لما نجي نتفرج عليها بعد فتره بتحسي بتجديد في نفسيتك?
يلا في ناس لاء.. ماشين بالعكس تماما..يا اما انها ماحصل طلعت الالبومات دي و راكناها في درج ولا فوف الدولاب واظن بتكون سايباها زي حاجه يورثوها احفادها بعدين وما استمتعت بيها في ليله شتاء قدام الدفايه ومع كبايه كاكاو (جربوها).
او تكون لا النوع التاني المأساوي (دا النوع الكعب )
الي تطلعها كل فتره لكن عشان تقعد تندب حظها ?
تكون شافت صور تخريجها مثلا وهسي ماشالله متزوجه وعندها ٥ اطفال وست بيت..
بتقعد يلا تبدا.. هسي لو كنت كملت دراسات عليا واشتغلت في شركه بدل البهدله الانا فيها دي..
وياسلام لو صادف ان الواقفا جنبها في الصوره كملت واشتغلت، معناها جرعه الندب حتزيد واحساس النقص ح يتفاعل(دي المرحله الاولى)
ما بتعاين للنعمه الهي فيها هسي وتقول الحمدلله وتاخد الصوره من باب الذكرى الجميله الحنينه..
المرحله التانيه يلا عشان تقلل من احساس النقص الي هي اساسا دخلت نفسها فيه حتبدا تقول.. اساسا هي بايره ل يوم الليله ، خلي الشغل ينفعها!!!!
(اها دا النوع الكعب ولا لاء)؟؟
ليه من الاول ما تروضي احساسك على الشىء الجميل وتاخدي الحاجه زي ماهي بدون ابعاد وتعيشي اللحظه بس!
وحده تانيه تطلع صور عرسها..
ناس ياسلااااام يفتكرو يوم العرس بكل تفاصيلو من ساعه ما اتحننت ومن ساعه ما طلعت للكوافيره ولحظات المكياج ولما زوجها شافها و رده فعله و الحفله وكل التفاصيل الجميله صوره وحده ممكن ترجعنا ليها ونحن مبتسمين وسعيدين..
في ناس لاء..
اوووول كلمه بتقولها والله العرس والولاده بشتنوني بشتنه .. شوف بالله كنت سمحه كيف ولا جسمي رهيب كيف .. انت واولادك بهدلتوني  ولا ولا.. او تقعد تفتكر ليك الحاجات الكعبه الحصلت يوم العرس.. وتنكد على نفسها وعلى راجلها لو بيتفرج معاها وح تنتهي ب شكله وكل واحد فيهم ينام في غرفه..
ما بتعاين للسنين العدت ب حلوها ومرها وللاولاد الملو حياتها هنا وسعاده..
دايما التفكير الايجابي بيدينا دفعه لانو نكمل عطاء..
البوم الصور انا بعتبرو وقود محرك لمسيره حياه كل انسان .. لو عاين ليه بطريقه ايجابيه وعاش ذكرياتو الحلوه واسترجعها بكل حب..
اليوم الخميس..
والدنيا شتا..
جربي طلعي البوم صورك انتي وزوجك واعملي كبايتين شوكولا سخنه ودفي الغرفه واعزميه ذكريات?
جربي طلعي البوم صورك انتي واخوانك واتفرجو سوا واضحكو واتريقو على بعض وشاغلو بعض ?
جربي طلعي البوم صورك انتي وصحباتك و اتذكرو مواقفكم سوا وايام الشيطنه والمراهقه?
جربي طلعي البوم صور زول فقدتيه واسترجعي ذكريات جميله وبعدها ادعي ليه من قلبك?

اخترت صوره من البوم الذكرى الاولى لزواجي .. وكنت حامل ب عزوزي في الشهر السادس ..
اخدت طاقه ايجابيه جميله خلتني افكر اني اخاويه?
الليله والليله?
دا النوع الكعب شديد غايتو???
بتمنى ليكم كلكم ليله شتويه سعيده وكلها هناك

عن الكاتب

غادة كريم

ما قيل للورده حتى جعلها تتفتح.. يشبه ما قيل لي حين صرت انثى مغرمه بالجمال..في مدونتي اهتم بجمال الروح وحياه القلب واشارككم شيئا من رسائل الحياه..