أسرار غادة

روتين غادة يوم الجمعه

الــمدونه غادة كريم

ح اوريكم الحاجات الي عملتها اليوم ومعاها حاجه جديده اول مره اتكلم عنها وهي تحضير مقشر فرانك سيم سيم في البيت ?
?طيب اول حاجه بديت بيها الصباح .. عملت ماسك حليب جوزالهند والعسل.. خليتو ٣ ساعات على شعري ..
غسلت فروه شعري ب خل التفاح ( وخليتو على الفروه ١٠ دقايق بعدين غسلتو عادي بالمويه .. بعدين جبت مويه الرز المخمر وعملتها على الشعر كلووو كا بلسم للشعر وخليتها ٥ دقايق وشطفتها ب مويه صحه ( لان مويه السعوديه مالحه دايما خلي اخر شطفه بعد تنتهي من الغسيل ب مويه صحه) …
? نجي للجسم ..
طبعا كلكم اكيد سمعتو عن مقشر فرانك..
بس ما سمعتو عن مقشر فرانك المنزلي..
سيييم سيم مافي اي فرق.. عشان بس ما تضيعو قروشكم على حاجه بتتعمل بسهوله في البيت..
انا ح اوريكم طريقتي انا.. وممكن تستغنو عن بعض الحاجات فيها براحتكم..
رز مسحون .. ربع كبايه بن .. ربع كبايه سكر..ربع كبايه زيت جوزهند.. ٤ كبسولات فيتامين E وعصره برتقال ..
بتلخبطيهم كلهم مع بعض لحد ما يكون عندك خليط قوامو زي قوام الرمل الرطب..
ممكن تستغني عن الرز المسحون لو القهوه بتاعتك خشنه .. لان الهدف السنفره ولازم تكون خشنه شويه.. ولو بتعشقو الرز زيي اختاري قهوه ناعمه ( القهوه التركيه ) ونفس الطريقه..
عملت سكرب لجسمي كلوووو وركزي اكتر حاجه على الاماكن الي عندك فيها سليوليت لان القهوه معروف مفعولها الفعال لازاله السليوليت..وبرضو المنطقه الحساسه اعملي ليها تقشير..
وما تفركي شديد عشان ما تخدشي بشرتك.. مجرد حركات دائريه بضغطه بسيطه من يدك كفيله انها تشيل الجلد الميت كلو..
بعد دا رطبت جسمي بزبده شيا من now (ممتازه بالمناسبه .. لي فتره ما طويله بستخدمها ولقيتها ممتازه فعلا) ..
كدا خلصنا من الشعر والجسم ..
?طلعت مسحت يدي واظافري( اليدين والقدمين)  بزيت فيتامين E وعلى المفاصل نقط من سيروم الهايلارونك.. ومسحت عليهم زبده شيا ..
?ارتحت شويه وشربت عصير برتقال ..
وغسلت وشي بغسول كريمي من بودي شوب عشان ابدا جلسه الديرمارولر..
عقمت وشي كويس بسكينول..
وبديت الجلسه..
بعد ما انتهيت علطول رطبت وشي ب جل الوڤيرا .. ( حاولو بالذات للوش تجيبو الكوري الاصلي او الامريكي)
ممتاز بعد الجلسه مباشره لانو بيهدي وبيقلل الاحمرار واصلا جل الالوڤيرا معروف بخصائصو المضاده للالتهاب..
وعقمت الجهاز بكحول وخليتو ينشف..
?بعد ساعه بالضبط عملت سيروم الهايلارونك ..
كدا انتهينا من الوش..
شعري كان نشف تقريبا..
سرحتو ب سيروم تنعيم من سيلكيراتين ..
?وكدا انتهت المعركه  ??
الموضوع شويه مرهق لكن مره ف الاسبوع لازم تعملي الحاجات دي وتخليها روتين عشان تحافظي على شعرك وبشرتك وجسمك في حاله نضاره دايمه ..

تحياتي..
ودمتم في نووووور???

عن الكاتب

غادة كريم

ما قيل للورده حتى جعلها تتفتح.. يشبه ما قيل لي حين صرت انثى مغرمه بالجمال..في مدونتي اهتم بجمال الروح وحياه القلب واشارككم شيئا من رسائل الحياه..