عـن غـــادة

سودانيه ابآ عن جد ومحسيه واهلي رطانه ..وامي مصريه ابآ عن جد واسكندرانيه جدعه واهلي السودانيين بيقولو عليها مصريه جعليه من مواقفها وعشرتها السمحه..

وعشت ف السعوديه من اول ايام حياتي وعاشرت عرب كلهم نخوه واصاله .. و بسبب طبيعه عملي ودراستي كاطبيبه عاشرت خواجات و اسيويين وهنود وافارقه واتعلمت منهم كتيييير وكتير ..
تنوع الثقافات والبيئات والناس الي حولي صقل شخصيتي و وسع مداركي وخلا بالي طويييييييل طويل طويل جدا وخلق مني غاده كريم ..
كل مرحله من حياتي بتعلم منها حاجه وبديها حقها.. زواجي اتعلمت منو كتير .. امومتي اتعلمت منها اكتر .. حياتي العمليه ودراستي علمتني اكتر واكتر..

مدوناتي والتدوين والتصفح والبحث في الانترنت بشكل عام اتعلمت منها كتيييييييييير جدا .. لكن صدقوني.. مافي حد بيتعلم ببلاش وياما دقت على الراس طبووول وياما ضحكنا وياما بكينا في مواقف وفصول من كل مرحله..

*اهتمامي وشغفي الكبير هو عالم الازياء واخر صيحات الموضه البتتناسب مع مجتمعنا الشرقي بدون تحفظ ممل او ابتذال منفر..
وغالبا بضيف لمستي على اي حاجه بلبسها عشان تكون جميله بطريقتي ومتفرده بأسلوبي ..
بختار القطع البتعجبني من دور الازياء العالميه وبعرضها بنفسي وبكتب رأيي في القطعه ومكان وكيفيه الحصول على القطعه المعروضه سواء كانت ملابس او اكسسوار او مكياج او اي منتج بستخدمو.

*بحب اكتشف واجرب اغلب مستحضرات العنايه بالبشره وبتشدني المنتجات الطبيعيه والخاليه من المواد الضاره بالجسم

وبحرص على الاطلاع على مكونات اي مستحضر للبشره والتاكد انو خالي من المواد المصنفه بانها سميه من قبل هيئات الغذاء والدواء العالميه.

*بهتم بعمل خلطات البشره والجسم المنزليه بمكونات خام وامنه بطرق علميه ودقيقه عشان احصل على احسن النتائج وبحرص على تدوين التجارب بالتفصيل الممل حتى ان البعض ممكن يفتكرو نفسهم في حصه كيمياء ,

لكن دا بسبب حرصي وهدفي الاساسي من التدوين على وجود مرجع شامل وكافي لبنات جيلي من كل انحاء المعموره بلغه عربيه بيضاء وبسيطه وسهله,

توفر عليهم عناء البحث الشاق على صفحات الانترنت ساعات طويله للحصول على معلومه واحده بلغه اجنبيه قد تكون صعبه على البعض منا ,

ورغبه قويه مني لتعزيز المحتوى العربي على صفحات الانترنت وفتح مدارك وافاق جديده للبنات الي بيهتمو بالبشره وعاوزين دايما يشوفو ويطلعو على الجديد..

* نفسي البنات كلهم يكونو حلوين وكلهم اناقه من جوا ومن برا ويكون عندهم وعي وثقافه في اي حاجه بيستخدموها وما يندفعو ورا الهوس العام بالبياض والجمال بدون اسس طبيه و ثقافه عاليه ,

ممكن اي بنت توصل لاي نتيجه هي بتحلم بيها لو اتبعت النصائح الي بقدمها هنا في المدونه بدقه وتفصيل ..

*بحب اطور اسلوبي واستفيد من اخطائي في كل مايتعلق بحياتي الخاصه والعامه..

*بحب الطبخ جدا وبيقولوا اني طباخه ماهره ..يعني ما تتفاجأو لو لقيتوني فجأه منزلا ليكم وصفه طبخه لذيذه في وسط زحمه العنايه بالبشره والازياء..

*طبيبه نساء و ولاده بس شغفي بالازياء والموضه والعنايه بالبشره غطا كتير على (شخصيه الطبيبه) عندي مع اني مازلت على رأس العمل ..
..وبحاول قدر الامكان التوفيق في المجالي وبحاول امسك العصايه من النص..

*زوجي سوركتي عبد العزيز .. مذيع واعلامي في قناه النيل الازرق ولاني فخوره بيه جدا ما ممكن ما اذكر اسمو في خانه (من انا) دعمني ومازال بيدعمني في اي مجال
بختارو وتوجيهاتو بتفيدني كتير كتير في اي حاجه بحتاج توجيه فيها..

*ام عزيز (اهم كاتيجوري في حياتي)
وحتلقو في سكشن كامل في الموقع اسمو عزيز وكل ما يتعلق ب عزيز العزيز..

*اسرتي الكبيره امي وابوي واخواتي مصدر قوتي ونقطه ضعفي..

* عندي صديقات اقل مايقال عنهم ملكات .. لكل وحده فيهم دور في مرحله من مراحل حياتي ما بستغني عنهم ابدا حتى لو بعدتنا المسافات .. لبنى ، روئ ، اعناب ،يسرا ،سلمى ،الشيماء وتسنيم..

*مابحب اتدخل في حياه الناس وبحترم خصوصيتهم لابعد الحدود وبتوقع في المقابل التعامل بالمثل..

*في النهايه بحب اختم تعريفي عن نفسي بأني بعشق طبيعتي كا بنت افريقيه  وبحب نفسي جدا وبتلفتني اي بنت عندها اسلوب حياه وطابع خاص بيها من كل انحاء المعموره …

*و دي هي اختكم غاده كريم…

تحياتي

ودمتم في نوووور …