ونسه ودردشة

فـي بـيـتـنـا مراهقـه

الــمدونه غادة كريم

سيده جميله من اعضاء القروب سألت سؤال جميل جدا بخصوص الازياء المناسبه لبنوته في عمر المراهقه ١٤ سنه.. انشالله العمر كلو يارب وتشوفيها احسن الناس… ولان سؤالها عجبني حابه اتكلم شويه عن لبس المراهقات في العمر دا …

” كل البنوتات في فترة المراهقة عندهم عشق للملابس والأزياء.. ودا بالنسبا ليهم موضوع اسااااسي بيكون شاغل بالهم كل يوم. وبيكونو دايما في حاله تفكير مستمرفي كيفية اختيار الملابس المناسبة والرائعة الي تلفت الانتباه ليها في المناسبات المختلفة. عشان كدا موضوع  الملابس أمرا أساسي ومهم بيحدد وبيئثر  بشكل كبير على ثقة البنت في نفسها ومدى ثقتها فى شكلها وفى الملابس الي  هي لابساها. الأهل من واجبهم  وخاصة الأم أنها تساهم بشكل أساسى في انها تبني حس الذوق العاليٍ عند بنتها عن طريق  اختيار الملابس المناسبة وانها تعلمها كيف تختار الملابس الي مفروض تكون مناسبة لسنها وذوقها وللمناسبة الي حتلبس فيها الملابس دي . وبصفة عامة انتي كأم لازم تساعديها انها تفهم ان  ملابسها مامفروض تكون مستفزة !! مع الاخد في الاعتبار أن البنت في  المرحله دي لازم تفهم  أن الملابس المكشوفة شديد  ممكن تدي  عنها انطباع مغلوط وما بيمثل شخصيتها ابدا..
برضو كأم لازم تشوفي وتاخدي  نظرة على مجلات المراهقات والأفلام الموجهة ليهم و تتعرفي أكثر على ذوق البنات فى مرحلة دي..
لازم تتعلم من هسي لما تجي تختار ملابسها انها تفكر في كذا حاجه  مش بس اذا كانت الملابس عاجباهاولا  لا. وانتي مطلوب منك تساعديها في كدا بالذات في الملابس الخاصه بالمناسبات وكمان لازم  تكوني صريحة مع بنتك إذا طلبت منك رأيك في الملابس الي هي لابساها .. مع الاخد في الاعتبار أنك برضو ما تسفهي  من رأيها. لازم   تكوني حريصة على اختيار ألوان ملابس مناسبة لشخصيتها ولون بشرتها ودي الحاجه الي  حتزيد من ثقتها في نفسها. شوفي ليها الالوان التى تتماشى مع شعرها ولون عيونها ولون بشرتها .. دا كلو حايبرز ملامحها الجميلة أكثر وأكثر..
وبرضو في المرحله دي لازم و بمساعدتك ليها  أنها تلقى نظرة موسعة على  المحلات الي بتعرض أزياء مختلفة وكمان تتعلم وانتي معاها  البحث أونلاين على المواقع المختلفة عشان تتعرف على  الأزياء والألوان والتصاميم المنتشرة..  وتاخذ منها الي  يناسب ذوقها وبيئتها..
خصوصا ان معظم الناس بقت بتشتري وتبيع اونلاين.
وما تعتمدو فقط على  محالات الملابس والأزياء المشهوره شديد . لا الافضل انك  تشوفي  كمان  في المحلات الصغيرة الي في منطقتكم  والي ممكن تكون بتعرض ستايلات متميزة وفريدة من نوعها، مع الوضع في الاعتبار أنو لازم عليها  كا بنوته في مرحلة المراهقة أنو يكون ليها ستايل خاص بيها هي.
شجعيها انها تاخد نظره عامه على المحالات الي بتعرض ملابس لكل الأعمار. واذا حسيتي انها بقت بتختار في حاجات ما بتتناسب معاها ابد في الحاله دي لازم تكوني حازمة تجاه الموضوع دا  ولكن بشرط أنك توصلي قرارك دا ليها بطريقة تقنعها وكلام منطقي ما على شكل اوامر .. بعدين البنت في العمر دا بتحب كتيييير  تسمع مدح أمها على ذوقها إذا اختارت ملابس شكلها جميل…
وحاولي تخليها تاخد نظره على أمثلة إيجابية في حياتها .. الحاجه دي ممكن تساعدها كتير  فى تكوين ستايل ملابس خاص بيها ومناسب للمرحلة العمرية الخاصة بيها وهى مرحلة حرجة بتحتاج فيها  لدعم كتير و حب وتشجيع.
وكمان حاولي اقعدي معاها اتفرجو سوا على بعض الافلام.. وممكن بعد كدا تناقشيها في  الأمور الإيجابية والسلبية في ملابس الممثلات..
سؤالك كان قمه في الروعه وحبيتو منك كتيييير وعجبني انك فكرتي في بنتك في المرحله دي …. عشان كدا انا عملت الموضوع دا بوست يمكن يستفيدو منو باقي البنات .. واتمنى اكون افدتك ..
تحياتي ودمتم في نووور

عن الكاتب

غادة كريم

ما قيل للورده حتى جعلها تتفتح.. يشبه ما قيل لي حين صرت انثى مغرمه بالجمال..في مدونتي اهتم بجمال الروح وحياه القلب واشارككم شيئا من رسائل الحياه..

أضف تعليق