العناية بالبشرة

كريم الكركم الهندي vicco

الــمدونه غادة كريم

​💁تعال صديق انا في سويه كلام ..
بعد ما اخدت فكره عن الكريمات الكوريه والفلبينيه قمت قبلت على ممرضه هنديه معاي وقلت نستفيد منها ونشوف عندهم شنو الجماعه ديل ..

وصفت لي كريم اسمو vicco قالت الكريم دا بيستعملوه من زمن غاندي 💂 وبيعتبر عندهم كريم الطيبين 👵 ولحد هسي بيستعملوه في حبسه العروس عندهم ( ااااي بيحبسو العروس زيكم ) .. 

وقمت ما كذبت خبر ومشيت جبتو بعد ما قريت مكوناتو في النت وعرفت انو عباره عن كريم كركم !! 

اه والله زي ما بؤولوكو كدا كريم كررررركم 💁

في منو نوعين .. واحد كركم ساده والتاني كركم مع زيت صندل ..

جبت النوع الاول الي هو كركم ساده وبديت استعملو..

يلا بسم الله الرحمن الرحيم اول ما تفتحيه بتجيك ريحه (خَشْخاشِيَّات بُخَار مِبْخَرَة مِبْخَار بَخِرَ مُتَبَخِّر تَبَخَّرَ تَبْخِير باخِرَة أَبْخَر بُخَارِيّ خَشْخاشِيّ مُبَخَّر بَخُور بَخْرِيّ ) 😵

الترجمه في نهايه المقال 👇

والمشكله ما بتمسك في وشك بس الريحه دي ، لااااا الغرفه كلها ، خشخاشيات من امها 😂😂

ريحه هنود اصليين .. يعني عادي بتحسي نفسك لابسه ساري وعندك نقطه حمرا بين عيونك من شده ما الريحه عامله شغل..

غايتو بس استحملوها..

هي عموما ريحه فكسيه من الدرجه الاولى.. 

الكريم كا كريم ظريف جدا و بيدي نضاره وبيكافح الحبوب ومع الاستعمال المنتظم بيقلل التصبغات والاهم انو بيشد البشره.. 

نسبه الكركم فيه ١٨٪ ودي تعتبر نسبه كبيره جدا جدا وحاجه كويسه جدا لان فوائد الكركم معروفه للبشره.. 

الكريم دا مع كتر الاستعمال بيقلل كتييير ظهور الشعر في الوجه ودي الحاجه الي قالتها لي النيرس ولقيت عنها ريڤيوز في النت.. 

مشكلتو ما بينفع للبشره الجافه ابدا لانو بينششششف الوش.. بمجرد ما تمسحيه بتحسي وشك اتشدددا شديد وبتشربو البشره بشكل كامل لدرجه انك لما تجي تغسلي وشك الصباح ما بيكون فيه ليه اثر غير شده الوش، لكن هذا لا يمنع انو ممممكن تجربوه يا ناس البشره الجافه و بعد ١٥ دقيقه من حطو لو حسيتو الوش اتشدا شديد و ح يقع خلاص امسحو اي مرطب في اماكن الشد 😅 مجرد اقتراح منطقي بعتبار ١+١=٢ وكدا ..

برضو عشان كدا لازم تغسلي وشك كويس جدا الصباح ويا حبذا ب فرشه تنظيف لان مواصفات زي دي بترفع نسبه انسداد المسام و لو ما غسلتيه كويس ممكن يطلع ليك حبوب مع مرور الزمن مش بسببو ولكن بسبب عدم غسلك ليه كويس.. 

فيه ناس ( هنود طبعا ما علينا منهم ) بيعملوه قبل المكياج.. بالذات ناس البشره الدهنيه لكن طبعا انا ما جربت الحركه دي لان الريحه لا تطاق ومستحيل اطلع بيها ، عادي ممكن اسلم على وحده وتختفي 💁 

الكريم كا مستحضر عنايه بديه ٧ من ١٠ ..

ممكن ناس تعتبرو سحر وحلال المشاكل ( زي النيرس العرفتني عليه ) وتديه ١٠ من ١٠ لكن انا خصمت ال ٣ بسبب الريحه وبسبب انو بينشف الوش شديد مع العلم ان بشرتي مركبه مائله للدهني ، يعني مع ناس البشره الدهنيه اتوقع يكون بيرفكت.. 

سعرو ١٢ ريال سعودي و فيه ٨٠ جرام ..

كبير جدا وممكن يقعدك فتره طويله.. 

ايوه ايوه ١٢ ريال ما ترجعي تقريها تاني.. 

متوفر طبعا في سوق الهنود ..

انا اشتريتو كالعاده من سوبرماركت المستشفى وكان باقي علبتين ما عارفه التانيه في زول اشتراها ولا لا 😂 الكلام دا قبل شهر ونص تقريبا ..

بقترح تجربتو على الرقبه قبل التطبيق عشان مشاكل التحسس..
👆ترجمه النص اعلاه :- 

( يعربش عطرك فوق الرفوف..

وفوق الخزائن ..

يمشي بكل الدهاليز ..

يجلس فوق البراويز ..

يفتح باب الجوارير ، ليلاً

ويدخل تحت الثياب .. ) 

خدتو بالكم من يعربش دي .. كلمممممتكم 😅

تحياتي..

ودمتم في نووور 😅

عن الكاتب

غادة كريم

ما قيل للورده حتى جعلها تتفتح.. يشبه ما قيل لي حين صرت انثى مغرمه بالجمال..في مدونتي اهتم بجمال الروح وحياه القلب واشارككم شيئا من رسائل الحياه..