العناية بالبشرة

مجموعة كوجي سان للعنايه بالبشره

الــمدونه غادة كريم

قبل كدا قلت ان من المركبات الامنه في التفتيح حمض الكوجيك..( الكوجيك اسيد) بس ما اديتكم نسب لتحضيرو ف البيت لانو غير ثابت وبيتفكك بسرعه غير انو لو زادت نسبتو عن حد معين ممكن يتسبب في مشاكل للبشره عشان كدا مافي داعي تحضروه ف البيت واشترو المركبات الجاهزه..
المجموعه دي كلمتني عنها ممرضه فلبينيه معاي وطلبت مني اجربها لانها مقتنعه تماما بيها وقالت انها عالجت مشاكل بشرتها وحب الشباب الكان عندها..
عباره عن صابونه كوجي سان وكريم تفتيح وكريم ترطيب والاتنين قائمين في تركيبهم على حمض الكوجيك ..
وبعتبار ان عندي مشكله كبيره في استعمال الصابون ورأي واضح وصريح بانو مؤذي للبشره ما حاولت ولا فكرت استخدمها لوشي.. لكن عملت كالاتي : بشرت الصابونه و ذوبتها مع جل استحمام وبقيت بغسل بيها جسمي اثناء الاستحمام ٣ مرات في الاسبوع ..
كنت بتعمد اغسل نص جسمي الشمال بيها فقط عشان اشوف هل فعلا بتفتح ولا لا..
وفعلا الصابونه بتفتح الجسم وبتعمل تقشير خفييييف ودي الحاجه الحبيتها فيها.. فكره التقشير الخفيف لانها بتشيل الجلد الميت و دي حاجه ظريفه لكن بتحتاج ترطيب عميق جدا بعد الحمام بزبده شيا..
بالنسبه لكريم التفتيح الي اسمو face اكتر حاجه لاحظتها فيه انو بيشيل الهالات وبيخففها كتير.. بس ما بقدر اجزم هل بيأثر على الهالات الكبيره والواضحه ولا لا ، لان انا الهالات العندي خفيفه جدا وبسبب الارهاق والسهر مع الشغل.. بس لما بحط من الكريم وبصحا بلقاها خفت بنسبه كبيره جدا بعد استعمال اسبوع..
بالرغم من ان تركيبو مافيه حاجه غريبه او مخصصه للهالات لكن دي حاجه لاحظتها.. ولما رجعت قريت ريڤيو عنو لقيت بلوقرز كوريين كتير كاتبين عن نفس الملاحظه وبيفتح اللون للبشره عموما..
الكريم التاني الازرق .. اسمو وايت دريم.. مرطب عميق.. ترطيبو حلو خالص لكن تطبيقو كريه.. يعني ما بيمشي معاك بسهوله وانتي بتمسحي بيه وشك.. تقيل .. وبيزهج.. لكن بيخلي وشك رطب فتره طويله ..وما استعملتو غير ٣ ايام و وقفتو لانو زهجني ..
نسبه حمض الكوجيك في الكريمين ١٪ ودي نسبه بسيطه بس انا بعتبرها كافيه جدا لان الحد الاقصى ما مفروض يزيد عن ٣٪ ..
سواء الصابونه او الكريمات الاتنين استعمالهم امن جدا حتى اثناء الحمل والرضاعه..
لكن الي تعملو لازم تستعمل واقي شمس لانو بيقشر تقشير خفيف ولازم واقي..
الي عاوزين يستعملو الصابونه للوش انا قست نسبه حمضتها وطلعت ٧ .. يعني ما مضره شديد.. لكن للامانه انا ما استعملتها لوشي ابدا.. وماعندي استعداد اغير غسولي..
بس بنصح بيها بشده للناس الي عندهم حبوب في جسمهم او تصبغات وعدم توحيد لون..
ولما تستحمي حاولي خلي الصابون على جسمك من دقيقه لدقيقتين وح تحسي بنغزات خفيفه عليه لانها زي ماقلت بتعمل تقشير خفيف.. واهم حاجه الترطيب بعدها لانها بتجفف شديد..
سعر الصابونه ١١ ريال
سعر كريم face ٢٥ ريال
سعر كريم وايت دريم ٢٥ ريال
ح تلقوها متوفره في محلات الفلبينين او عند تاجرات الانستغرام..
انا شخصيا اشتريتها من السوبرماركت الي جوا المستشفى لانو بيبيع منتجات فلبينيه ولما سألتو بيجيبها من وين قال من سوق الفلبينين..
ناس السودان ماعندي فكره تلقوها وين..

تحياتي..
ودمتم في نووور

عن الكاتب

غادة كريم

ما قيل للورده حتى جعلها تتفتح.. يشبه ما قيل لي حين صرت انثى مغرمه بالجمال..في مدونتي اهتم بجمال الروح وحياه القلب واشارككم شيئا من رسائل الحياه..