العناية بالشعر

مسامية الشعر

مساميه الشعر
الــمدونه غادة كريم

طيب.
.. نحن عشان نعمل اااااي اختبار في الدنيا دي.. سواء للشعر او غيرو وعاوزين نتايج مؤكده لازم نسأل نفسنا السؤال دا ..
هل نتايج الاختبار دا ممكن تتاثر من شخص للتاني بسبب عوامل خارجيه ما استخدمناها في التجربه دي
وعشان نكون دقيقين شويه ومركزين على الشعر بس ح اسأل السؤال بطريقه تانيه ..
هل في اي حاجه عاملنها في شعرنا او شعرنا متعرض ليها بستمرار ممكن تغير من نتيجه الاختبار وتدينا قراءه خاطئه

يلا الناس المتخصصه عشان يعملو اختبارات مساميه للشعر بياخدو مجموعه شعيرات  وغالبا بتكون منخفضه المساميه في بدايتها و معتدله في النص وفي النهايه او طرف الشعره بيكون عاااالي المساميه ( و دا اغلب انواع الشعر بتاع الناس كلها شكلو عامل كدا )
مع الاخذ في عين الاعتبار انو الشعر غير معالج لا با صبغه او حنه او بروتين او حتى خلطات البروتين الطبيعيه البتتعمل في البيت.. و بيخضعوها ل ٤ انواع من العلاجات الطبيعيه الي بتعملها عاده اي وحده في البيت..

اولا:-  شعره طبيعيه ما اتحط عليها اي اضافات.. اتغسلت بس بالمويه واتنشفت عادي بدون اي بلسم او زيوت او اي حاجه اثناء التسريح..
ثانيآ:- شعره اتحط عليها قبل الغسيل زيت جوزهند..
ثالثا: شعره استخدمو عليها بعد الغسيل كونديشنر او بلسم..
رابعآ:- شعره اتحط عليها بعد الغسيل اي سيروم او زيت خفيف او جل او اي مصفف للشعر..

( دا ما الاختبار الي انتو ح تعملوه ف البيت دا اختبار عملوه علماء عشان يعرفو كيف المساميه بتتاثر بالحاجات دي وانها اختبار غير دقيق وما ممكن يتعمل بدون ما نحط كذا اعتبار قدامنا ونشتغل على اساسو.. مش امسك وغطس بس..)

جابو مويه وحراره المويه كانت اقرب للدفء .. ما الحراره او الدفء العالي الي ممكن يحلل الزيوت الطبيعيه او المضافه للشعره ولا هي مويه بارده ..
ملاحظه :-
انتي برضو لما تعملي اختبارك العادي بتاع شعرتك انتي لازم تنتبهي للخطوات دي ..

تحطي المويه في صحن شوربه.. ما كبايه.. لان عاوزين مساحه كبيره و واسعه للسطح الي حنعمل عليه الاختبار والحاجه دي مهمه جدا وبتأثر كتير على نتيجه الاختبار لان ما عاوزين الشعره اثناء ما بنختبر فيها تحتك بأي حاجه جنبها.. يعني ممنوع تلمس حواف الوعاء الي بتستخدميه للاختبار عشان ما عاوزين اي هزه في سطح المويه والهزه دي ممكن تنتج من احتكاك الشعره بحواف الكبايه عشان كدا الكبايه ما بتحلك.. اوكي !

رصو الشعرات بررااااحه على سطح المويه وانتظرو دقيقتين ل ثلاث دقايق.. لقو ان الشعرات مازالت طافيه على السطح وما دخلت جوه المويه ابدا..
قامو غطسوها ب عود وبرضو انتظرو حبه.. لقو ان كل الشعيرات رجعت طفت تاني على سطح المويه ماعدا الشعره الي عالجوها ب البلسم.. وهي زاتها ما غطست كلها غطس ثلثينها ٢/٣ بينما الثلث الاخير طفا على سطح المويه ( والي هو غالبا الجزء المنخفض المساميه منها )
طيب هل دا معناه ان البلسم بيغير من مساميه الشعر وبيخليه مرتفع المساميه عشان كدا الشعره بتغطس في المويه ؟؟ الاجابه لاء..
طيب هل دا معناه ان البلسم بيزيد من وزن الشعره بغض النظر عن المساميه وبيخليها كمان تغطس في المويه ؟؟ برضو لا لان لو على الوزن كان غطست الشعره المعالجه بالزيت من باب اولى..
طيب دا كلو بيدل على شنو ؟؟
بيدل على ان كل شعر وظروفو وحسب الظرف الي خاضع ليه بيكون رد فعلو..
الي عاوزه اوصلو ليكم ان شعرتك الواحده دي كل يوم بتكون بمساميه مختلفه حسب تعاملك انتي معاها ( دا في حاله الشعر المعالج بواحد من الاربعه حاجات المذكوره وما بتكلم عن شعره نظيفه خاليه من الاضافات تماما )
لما تتعاملي معاها بإهمال وانتي عارفه ان طبيعتها عاليه المساميه ح تلقيها هايشه اليوم كلو وما لاقيه الي يلمها.. حطيتي عليها زيت قبل الحمام ح تلقيها محترمه وقاعده في بيتها ومساميتها رايقه ..
اشرحي اكتر يا كتكوت ما فهمنا ؟؟ اوكي ..

ح اصنف ليكم ردة فعل كل نوع مساميه لما تعامليها باي علاج منزلي..
نبدا بالشعر منخفض المساميه :-
الشعر منخفض المساميه ما بيتأذى بسهوله ولا بيفقد رطوبتو بسهوله ودا بيعني انو كمان ما بيجف بسهوله ولا بيتقصف ويتقطع ابدا..وكمان الشعر منخفض المساميه  بيتطمبج بالزيت والبلسم بسهوله اي زياده عن حاجتو طوااالي بتطفح فوق الشعره وتبقي زي المودنك الدلاله ( الحاجه دي بتحصل برضو مع الشعر المعمول فيه حنه او الشعره الي بتكون اصلا تخينه وتقيله برضو ما بتتشرب الزيت بسهوله ) كميه بسيطه من الزيت كافيه جدا بالنسبه ليه وبيكون فل الفل ولا احلى ..
الشعر منخفض المساميه ما بيتصبغ بسهوله وصبغو صعب جدا وكمان صعب يتجعد بالجل بسهوله او شبه مستحيل ( لان الجل اساسا عباره عن مويه وهو عندو حصانه ضد المويه ) وكمان ما بيتفرد بسهوله لو عاوزه تعملي عليه بروتين ولا كيراتين ولا اي علاج كيميائي ..
ظريف خلاص النوع دا
الشعر الي مساميتو عاديه .. بيتصبغ بشكل عادي بينما الشعر عالي المساميه بيلقط الصبغه في وقت قليل جدا لما تتخلعي..
لكن عموما برضو لاحظو ان لما تعملو صبغه الشعر الي تحت بيتصبغ اسرع من الشعر القريب للفروه لان عاده الشعر التحت بيكون متضرر من عوامل كتيره ومساميتو بتكون مرتفعه ) ..
وعموما لاحظي في نفسك لو شعرك من النوع البيقاوم اي حاجه عاوزه تعمليها فيه سواء صبغه او بروتين او زيوت او جل فتأكدي انو شعرك مساميتو منخفضه وقد تكون معتدله لحد ما وما بنصحك ابدا انك تحاولي تكسري حاجز الخصوصيه بتاعو دا بالغصب ( في حاجات بتكسرو) لان الي بيتكسر صعب يتصلح وتقعدي تغني ظلموه..
شعرك منخفض المساميه تحمدي ربك وتبوسي ايدك وش وظهر.. اوكي..
الشعر عالي المساميه دااايما ناشف وهايش وطوالي في حاله تقصف وتكسر ولو حاولتي تصبغيه مااا بيصدق وبيلقط الصبغه في لمح البصر والعجب لو مخك قالك اعملي هايلايت.. ح تندمي باقي عمرك لانو من شده الخلعه بيتحرق ..
ولو انتي من النوع البيقضي ساعات طويله في الشمس او بتسبحي كتير تأكدي ان شعرك عااالي المساميه.. لان الشمس سرها بااااتع..
قد لا يكون جاف وهايش وانتي شايفاه مهذب لكن لو عملتي عليه اختبار حقيقي وظابط ح تلقيه عالي المساميه لا محاله..
الزبده من كلامي دا كلو شنو ؟
الزبده يا حلوين انو كل وحده تستعمل حواسها الخمسه وهي بتستعمل اي مستحضر على شعرها عشان تعرف شعرها بيتعامل مع الحاجه دي كيف وتشوفي رده فعلو وح تعرفي نوعو بدون اي اختبارات تعتبر غير دقيقه الى حد ما..
انتي الي بتقرري كيف تتعاملي مع شعرك حسب المعطيات العندك وحسب فهمو هو شنو، الشعر الي مساميتو منخفضه تحافظي عليه بشكلو دا ( ح اشرح في الجزء التاني كيف تحافظي على الشعر الي مساميتو منخفضه وكيف تحترميه وتتعاملي معاه )
شعرك الي مساميتو عاليه بيكون محتاج بروتين وبيحتاج انك تعملي زيت قبل الاستحمام والغسيل ضروري جدا وترطيب عالي جدا جدا بعد الغسيل بماسكات وكريمات تحفظ الرطوبه الي بتطير منو بعد الغسيل مباشره ( الناس الي بيلخبطو الجلسرين مع مويه في بخاخ ويرشرشو بيه شعرهم كل شويه كدي دقيقه عليكم الله اقيفو بجاي لحد ما اجيكم .. لان الجلسرين دا مشكلتو كبيره جدا معاكم وانتو ما جايبين خبر ، الا لو كنتو عايشين في مناطق رطبه اصلا زي جده وبورتسودان لكن الباقين وقفو البتعملوه دا عليكم الله .. ح اتكلم في بوست منفصل عن الخته دي لانها مهمه وعامله لخبطه عند بعض الناس ) …..
في ناس بتلقيها بتعمل كريم وزيت ٣ مرات  في الاسبوع و هم عايشين على انو شعرهم عالي المساميه وتلقي الشعر ملصق في بعضو وحالتو حاله.. عاوزه اقولك ركززززي وانتبهي واتاكدي انو شعرك فعلا عالي المساميه ولا بيتهيئ ليك بس .. الملاحظه هي اهم واحسن من مليون اختبار.. لانو شعرك انتي وانتي ادرا بيه بس ركزي معاه شويه.. غيري من كميه الزيت البتحطيها قللي او كتري وحتلقي رده فعلو مع كل حركه غير لحد ما يرسى على رده فعل وحده ومنها ح تعرفي طبيعه شعرك كويس جدا..
كتكوت !! كيف ممكن اعمل اختبار المساميه ويكون شبه دقيق !!
طيب ..
اقطعي شعرات من راسك ( من ١٥-٢٠) وبلبليها بمويه مع نقط من اي شامبو عندك..  بالذات لو شعرك كان فيه زيوت ولا ماسكات .. وخليها كم دقيقه بعدين اشطفيها بمويه وخليها تنشف مع نفسها قبل الاختبار..
جيبي صحن شوربه زي ما قلنا وحطي فيه مويه دافيه ..
غطسي الشعرات الي غسلتيهم جوا المويه بسرعه وبشكل كاااامل تحت سطح المويه..
لو شعرك معالج بأي كيماويات من فتره ح تكون جذورو طبيعيه واطرافو لسا فيها العلاج الي عملتيه.. بتقومي بتقصي الشعره نص بالنص وتختبري النصين سوا بشكل منفصل..
دايما لما تعملي الاختبار ما تعمليه على شعره وحده.. شيلي زي ١٥ شعره واربطيهم سوا ب شعره برضو واعملي الاختبار..  لو عملتي شعره واحده عاده نسبه الخطاء بتكون كبيره وبيديك قراءه غلط..
لو شعرك طفا على السطح خلال ٥-١٠ دقايق معناها شعرك مساميتو منخفضه او معتدل الى حد ما وظريييييف.. لكن حطو في اعتباركم ان الناس الي بتعمل حنه ممكن يديكم نفس النتيجه حتى لو كانت مساميه الشعر الحقيقيه عاليه.. عشان كدا الي بيعملو حنه برضو يعملو زي البيعملو بروتين ويقصو الشعره نص بالنص ويختبرو النصين كل واحد لوحدو..
لو شعرك جزء منو طفا على السطح وجزء منو غطس جوا.. فدا غالبا معناه ان شعرك اطرافو عاليه المساميه ومتضرر ومن فوق مساميتو منخفضه ومحترم نفسو..
(دا في حاله انو ١/٣ بس الي غطس)
لو ٢/٣ ثلثينو غطس معناها نسبه الضرر عاليه لكن لسا في امل منو
اما لو ما فكر يطفى على السطح حتى بعد مرور ال ١٠ دقايق دا معناها الشعر كلو مساميتو عاليه جدا ومحتاج عنايه مركزه..

……………………………… يتبع

المصدر : International Journal of Cosmetic Science

تحياتي..
ودمتم في نوووور

عن الكاتب

غادة كريم

ما قيل للورده حتى جعلها تتفتح.. يشبه ما قيل لي حين صرت انثى مغرمه بالجمال..في مدونتي اهتم بجمال الروح وحياه القلب واشارككم شيئا من رسائل الحياه..

أضف تعليق