الصحه والرشاقه

مشروب جل الصبار من forever living

الــمدونه غادة كريم

​🌵صباحكم سكر..

عدنا والعود احمد ..

🌹نبدا اول تدوينه في ٢٠١٧ بموضوع يخص الصحه والرشاقه وانشالله تستفيدو منو..

🌵ح اكلمكم عن مشروب (جل الصبار)..

كلكم طبعا بتعرفوا الصبار واغلبكم بيستعملوا الجل بتاعو في حاجات كتيره للبشره والشعر والحروق و تهدئه الالتهابات الجلديه ، لكن اغلبكم برضو ما عارفين ان مشروب جل الصبار برضو عندو فوائد كتيره للصحه العامه وخاصه الجهاز الهضمي  والمناعي وبرضو مفيد لمرضى السكر ..

يلا ركزو في اني بتكلم عن ( جل الصبار ) وليس ( عصاره او حليب الصبار المطاطي , الي هو اسمو latex ) لان شتان بين هذا وذاك في الفوائد والاضرار والاثار الجانبيه.. 

🌵طيب مبدئيا كدا لازم نعرف ايه الفرق بينهم..

جل الصبار هو الماده الشفافه الهلاميه الموجوده داخل اوراق الصبار..

اما العصاره المطاطيه هي الماده الصفراء الموجوده تحت جلد اوراق الصبار ان صح التعبير..  

🌵جل الصبار هو المسموح بشربو للاستفاده من مكوناتو الغذائيه الجباره وفيتاميناتو الكتيره .. 

🌵اما عصاره الصبار المطاطيه والي المكون الاساسي فيها هو ماده الالوين فا دي بتعتبر ممنوعه للاستخدام الداخلي الا بنسب بسيطه لا يفهمها الا المختصين الي بيستخدموها في تصنيع بعض الادويه ( خاصه الملينات )  ، وبالتالي التعامل معاها بشكل مباشر وشربها ممنوع لان اثارها الجانبيه قاااااتله وتأثيرها المباشر على اعضاء الجسم الحيويه زي الكبد والكلى مدمر..

🌵ودا السبب الرئيسي البيخليني اقول لاي وحده ح تقترح عمل مشروب جل الصبار في البيت لاااء وستين لاء ، لان أثناء التحضير وتقطيع الاوراق اكيد ح يسيل جزء من العصاره الصفراء وتختلط بالجل وبالتالي تحصل اثار جانبيه ، قد يكون في ناس بتقدر تحضرو في البيت لكن لو اخدنا في عين الاعتبار انو نحن ما عارفين نسبه ماده الالوين الي ح تنزل من من اوراق الصبار اثناء التقطيع اكيد ح نتراجع عن الفكره.. 

الحاجه التانيه المهم تعرفوها برضو هي انو في تقريبا ٣٠٠ نوع من شجر الصبار وخمسه فقط هم المناسبين للاستعمال الادمي الي هم تابعين لما يسمى barbadensis وطبعا يستحيل تعرفي النوع العندك في البيت صالح للاستهلاك البشري ولا لاء .. لان دا شغل معامل.. عشان كدا الجل الجاهز من شركات مضمونه هو الخيار الانسب .. 

🍁في شركات بتلقيها بتسوق لمشروب الصبار او حتى الصبار المعد للاستخدام الخارجي بأنهم بيكتبو محضر من كاااامل اوراق الصبار وبيستغلوا حته انو الناس ما عارفه انو استعمال كامل اوراق الصبار بدون فرز الجل من العصاره المره غير امن وغير صحي بتاتآ البته لكن طبعا لان تحضيرو سهل جدا عليهم لانو بيتهرس بس داخل مكنات معينه وبيختلط الحابل بالنابل والنتيجه تكون منتج رخيص وسيئ ومضر جدا عكس الشركات الي بتتعب في تحضيرو وفرز الجل وعدم خلطه بالعصاره .. عشان كدا ما تتخلعوا دايما بالعبارات المكتوبه على منتجات كتيره.  بالنسبه للمسوق حيكون في امان لانو موضح على العبوه انها محضره من كذا وكذا في نفس الوقت الي استخدم فيه نفس العباره للتسويق للناس الي ما عندهم فكره كذا وكذا دي يعني شنو .. فهمتو يا حلوين ..

🌵جل الصبار هو الجزء الي فيه الفايده والي مسموح ومرخص بأستعمالو الداخلي ب نسب ومقادير معينه خلال اليوم يعني برضو ما سبهللي  ..

🌵 فوائد مشروب جل الصبار :- 

مفيد للجهاز الهضمي عموما وخاصه بعض الامراض المتعلقه بالقولون..

يعتبر ( جل الصبار )  ملين او مسهل ولكن نسبه من للناس بيعمل ليهم امساك خاصه في الايام الاولى للاستعمال.. 
🍁طبعا الي بيستخدم كا ملين قوي هو العصاره وليس الجل وكان فعلا زمان بيتباع في الصيدليات ملين اوراق الصبار لكن تم سحبه من السوق العلاجي بعد ما هيئه الدواء والغذاء الامريكيه سحبت الترخيص منو وصنفتو كا دواء غير امن لانو فيه نسب كبيره من ماده الالوين الي زي ما قلنا تعتبر قاتله لو اتاخدت ب نسب كبيره.. 

لكن بالنسبه للجل ومن واقع تجربتي الشخصيه هو لا بيعمل كا ملين ولا بيعمل امساك.. بالنسبه لي كان عادي  مع العلم اني كنت باخد مقدار ٦٠ ملل قبل النوم بس .. وما كنت بشربو الصباح زي ما هو موصى بطريقه استعمالو.. 

🌵 مفيد للناس الي متبعه حميه غذائيه لانو خالي من السكريات والبروتين وبينححححف الناس الي اصلاااا وزنها زايد لكن ما بيأثر على الناس الي وزنها طبيعي.  يعني ما ح يزيدك ضغفه لو انتي اصلا ضعيفه..

🌵بيقلل نسبه السكر في الدم.. عشان كدا مفيد لمرضى السكر.. لكن لازم مراجعه الطبيب المعالج في حاله مرض السكر لتنظيم الجرعات لانو ممكن يأثر ويتداخل مع الجرعات العلاجيه للدواء..

🌵مفيد جدا للناس البتعاني من التهاب المفاصل لانو زي ما قلنا في مركبات مضاده للالتهاب ومحفزه للجهاز المناعي.. 

🌵محسن عام لمظهر الجلد بسبب مضادات الاكسده الموجوده فيه..

🌵في دراسه اتعملت في ايطاليا سنه ٢٠٠٩ على استخدام جل الصبار للناس الي عندها سرطان المعده والرئه وبياخدو علاج كيماوي ولقوا انو استجابه الجسم للعلاج الكيماوي بتزيد كتير مع جل الصبار عكس الدراسات الاتعملت على عصاره الصبار والي لقوا انها قد تكون مسرطنه ..

🌵مضاد فيروسي وفطري وبكتيري.. حتى لو اتمضمضتي بيه ساي بيعالج التسوس..

🍁شركه forever living ( الامريكيه ) عندهم مشروب جل الصبار دا جاهز ومعد ومثبت ومستقر كيميائيا ونسبه جل الصبار الخاااام الطبيعي فيه ٨٥٪ باقي ال ١٥٪ دي مثبتات كيميائيه عشان ما يتأكسد ويفقد قيمتو الغذائيه ومضاف ليه برضو سكوربيك وسيتريك اسيد  .. على العبوه مكتوب جل صبار خام ١٠٠٪ لكن كذابين  ، فقط ٨٥٪ فقط جل طبيعي..

خالي طبعا من عصاره الصبار الي زي ما قلنا ما بنحبذ استخدامها المباشر ..

🌵ممنوع تماما استخدامو للحوامل لانو مهيج ومحفز لتقلصات الرحم وممكن يعمل اجهاض..

🌵برضو ممنوع استخدامو للمرضعات لانو ح يعمل اسهال للبيبي..

🌵برضو ممنوع للاطفال اقل من ١٢ سنه لانو بيعمل ليهم بواسير…

🌵طعمو كريه جدا وغير قابل للبلع 😫 عشان كدا بلخبطو وبخلطو مع عصير وشرايح برتقال او فراوله ، لكن ابدا ما تحاولي تضيفي ليه سكر.. 

🌵العبوه فيها لتر ..والاستخدام ما مفروض يزيد عن ١٢٠ ملل في اليوم من وجهه نظري الشخصيه ، مع العلم انو مكتوب على العبوه انو ما يزيد عن ٢٠٠ملل وطبعا ما ح تستخدموه طول العمر ، يستخدم على فترات ، يعني ممكن تستخدميه لمده شهر وتوقفي و ترجعي ليه تاني لو حسيتيه نفع معاك ( هنا بتكلم عن الناس الي عاوزه تستخدمو للصحه العامه وتحسين مظهر الجلد.. اما بالنسبه للناس الي ح تستخدمو كا علاج فا غلبا فتره العلاج حتكون ٣ شهور متتاليه ) 

🌵اي وحده عندها حساسيه من الصبار وسيرتو تبعد تماما من الاختراع دا ..

🌵اي وحده بتاخد اي علاج من اي نوع تستشير طبيبها الاول لو عاوزه تستعملوا لمنع التداخلات الدوائيه..

🌵اي وحده مقرره تعمل عمليه جراحيه من اي نوع توقفو قبل اسبوعين من العمليه وما ترجع ليه الا بعد اسبوعين برضو من العمليه . 

🌵سعرو من الشركه ٩٥ ريال ( لتر )  ..

عندهم مليون صفحه على انستغرام لكل منطقه او دوله..

اكتبو foreverliving في خانه البحث في انستغرام وكل وحده تشوف المنطقه المناسبه معاها وتطلب منها..

بالنسبه لي اخدتو من تاجره سعوديه في الدمام ودا رقمها بتاع التوصيل 0506242370

🍁الشركه عندها منتجات كتيره جدا جدا ومستحضرات تجميل ح انزل ليكم كل فتره حاجه من عندهم بعد التجربه طبعا لكن الي مخليني متحمسه ليها انها طبيعيه وبتعتمد على الطبيعه في مستحضراتها.. 
تحياتي❤

ودمتم في نووور ..

عن الكاتب

غادة كريم

ما قيل للورده حتى جعلها تتفتح.. يشبه ما قيل لي حين صرت انثى مغرمه بالجمال..في مدونتي اهتم بجمال الروح وحياه القلب واشارككم شيئا من رسائل الحياه..