العناية بالشعر

مـــــوسم تساقـط الشـعر

الــمدونه غادة كريم

معلومه كتكوتيه على الطاااير

دايما في نهايه سبتمبر واكتوبر ونوڤمبر واواااائل ديسمبر( الي هي ١٠٠ يوم ) بيزيد تساقط الشعر بصوره ملحوظه جدا تخليك تتخيلي ان شعرك خلاص سحرووووه وبقا يتساقط وتتخلعي قدام المرايه وانتي بتسرحيه وهو بينزل من جذورو..وتجيك النفسياااات
المعلومه بقا يا حلوين انو دا شي ( ط ب ي ع ي) اي والله طبيعي .. دا طبعا بالنسبه للناس العايشين في نصف الكره الشمالي..
الناس الي في نصف الكره الجنوبي التساقط بيكون في نهايات مارس وابريل ومايو.. ودا برضو طبييييعي جدا وكلها حاجات مرتبطه بالجو والطقس ( الشرق الاوسط طبعا كلو تابع لنصف الكره الشمالي )
والشعر الوقع من جذورو دا كلوووو ح يطلع بدلو شعر جديد ودي دوره حياه عاديه جدا للشعره ( اتذكرو ان اي حاجه خلقها ربنا سبحانه وتعالى ليها اجل.. والشعر من مخلوقات الله ولكل اجل كتاب يعني لازم تموت وتقع عشان يطلع بدلها تاني )
في الفتره دي حاولي قدر الامكان اتأقلمي مع الفكره وحاولي تعتني ب شعرك شدييييد لانو بيبقا زي الزول العيان والمحتاج رعاااايه وعنايه خاصه .. رطبيه من جوا وبره كوييييس جدا اشربي مويه كتير واستعملي ماسكات وزيوت مناسبه( ركزي على الزيوت المخترقه للشعره زي زيت جوز الهند وزيت دوار الشمس لانها بتخترق الشعر بنسبه ٩٥٪ وبتمنع الضرر الحاصل من المويه والغسيل لانها بتعمل زي عاااازل .. حتى عشان تتاكدو من كلامي اعملي حمام زيت بزيت جوز الهند قبل ما تغسليه بساعتين ثلاثه وبعد دا ادخلي غسليه عادي .. حتلقي انو ما بيهيش ولا بيتنفش بعد الحمام زي الطاقاك كهربا .. لا بيفضل مهذب لان الشعره مغللللفه ومحميه ) ولو ما عملتي كدا حتزيدي من عدد الشعرات الي بتقع الي هي مفروض ١٠٠ شعره في اليوم وح تفاقمي المشكله وتبقي انتي والزمن عليه
و ب بدايه ديسمبر حتبدي تلاحظي انو التساقط خف كتييير وبتلقي في شعر جديد طلع لو فحصتي فروتك عند اخصائي ( مافي داعي للفحص بس طبعا للعاوزه تتاكد زي صحبتنا) ..

⚠كلامي الفوق كلوووو عن شعر طبيعي و جسم طبيعي خالي من اي امراض او مسببات اخرى للتساقط..
الباقي ح نتكلم عنو انشالله قريب..

⚠حاجه اخيره..
صمغ الزانثان.. او الصمغ العربي .. او صمغ الغار.. او صمغ الغوار.. كلللللها بتأدي نفس الغرض بالنسبه للبوست الفات.. لانو في الاخر وظيفتو في الماسك مجرد انو بيعمل سماكه وقوام ثابت لا اكثر ولا اقل.

تحياتي
ودمتم في نور

عن الكاتب

غادة كريم

ما قيل للورده حتى جعلها تتفتح.. يشبه ما قيل لي حين صرت انثى مغرمه بالجمال..في مدونتي اهتم بجمال الروح وحياه القلب واشارككم شيئا من رسائل الحياه..